Kae e Feafeaʼi Ki Tokotou ʼu Kāiga?
1 Tokolahi ia tatou ʼe lahi tonatou ʼu kāiga ʼe mole ʼi te moʼoni. ʼE tou lotomālohi ke nātou fakatahi mo tatou ʼo haʼele ʼi te ala ʼo te maʼuli! ʼE tou loto tāfito ke maʼu e totatou famili totonu ia te maʼuli heʼegata. Tatau aipe peʼe kua fualoa tatatou faiga ke nātou ʼiloʼi te moʼoni, ʼe mole tonu anai ke tou manatu ʼe mole feala anai ke nātou maliu ʼi he ʼaho.
2 ʼI te temi ʼaē neʼe fai faka mafola ai ia Sesu, “neʼe mole tui ʼona tēhina kia te ia.” (Soane 7:5) ʼI te tahi moʼi temi, neʼe ʼui e tona ʼu famili kua vale ia. (Maleko 3:21) Kae neʼe mole līʼakina nātou e Sesu. ʼAki te temi, neʼe tali e tona ʼu tēhina te moʼoni. (Gāue 1:14) Neʼe liliu tona tēhina ko Sake ko he tagata lagolago mālohi ʼo te kokelekasio faka Kilisitiano. (Kal. 1:18, 19; 2:9) Kapau ʼe koutou loto ke tali e tokotou ʼu kāiga ia te moʼoni, pea ʼaua naʼa tuku takotou ʼu faiga ʼaē ke nātou ʼiloʼi te logo lelei ʼo te Puleʼaga.
3 Tou Fakaloto Fīmālie, Ka Mole Tou Fakaloto Mamahi: ʼI te temi ʼaē neʼe fai faka mafola ai ia Sesu ki te hahaʼi, neʼe logoʼi e te hahaʼi ʼaē neʼe fagono kia ia he loto fīmālie, kae neʼe mole fakamālaloʼi ai ia nātou. (Mat. 11:28, 29) Neʼe mole ina fai he ʼu akonaki neʼe mole nātou mahino kiai. Moʼo fakaloto fīmālieʼi ʼo tokotou ʼu kāiga ʼaki te ʼu vai ʼo te moʼoni, ʼe tonu ke koutou foaki faka feʼauga age, kae ʼaua naʼa lahi fau! Neʼe ʼui fēnei e te tagata taupau feʼaluʼaki: “ ʼE maʼu te ʼu fua lelei e nātou ʼaē ʼe nātou uga tonatou ʼu kāiga ke fia logo ki te moʼoni ʼaki tanatou fai faka mafola māmālie.” Kapau ʼe tou fai feiā, pea ʼe feala mo nātou ʼaē ʼe fakafeagai, ke nātou kamata fai he ʼu fehuʼi pea mo tupu ai hanatou fia ʼiloʼi ia te moʼoni.—1 Pe. 2:2; vakaʼi ia 1 Kolonito 3:1, 2.
4 Tokolahi te kau Kilisitiano ʼe nātou fai faka mafola ki tonatou ʼu ʼohoana ʼaē ʼe mole ʼi te moʼoni, ʼo nātou tuku ava he tohi pe ko he nusipepa ʼi he alatike ʼe feala ke fia lau e tonatou ʼohoana. Ko te tuagaʼane neʼe ina fai te faʼahi ʼaia, pea mokā ina fai te ako ʼo tana fānau, ʼe ina fai ke logo kiai tona ʼohoana, pea mo fai he ʼu fakamahino ʼe ʼaoga anai kia ia. ʼI ʼihi temi neʼe ina fehuʼi age ki tona ʼohoana: “Neʼe ʼau ako te meʼa ʼaenī ʼi taku ako ʼi te ʼaho nei. Koteā koa tau manatu ʼo ʼuhiga mo te faʼahi ʼaia?” Ki muli age neʼe tali e tona ʼohoana ia te moʼoni.
5 Tou Aga Fakaʼapaʼapa, Mo Tou Faʼa Kātaki: Neʼe ʼui fēnei e te tuagaʼane “ko totatou ʼu kāiga ʼe nātou maʼu te loto faʼitaliha ʼo ʼuhiga mo te ʼu faʼahiga manatu ʼaē ʼe nātou loto kiai.” Koia ʼe tonu ai ke tou fakaʼapaʼapa mokā ʼe nātou ʼui mai tanatou ʼu manatu, peʼe mokā nātou ʼui fakahagatonu mai ke ʼaua naʼa tou palalau age kia nātou ʼo ʼuhiga mo te moʼoni. (Tnk. 3:7; 1 Pe. 3:15) Kapau ʼe tou faʼa kātaki mo lotoʼofa pea mo tou fakalogo lelei ki te ʼu meʼa ʼaē ʼe nātou ʼui mai, ʼe feala ke tou kumi ai he ʼu temi faigamālie moʼo fai faka mafola ai kia nātou. Ko te faʼahiga faʼa kātaki ʼaia ʼe feala ke tou maʼu ai he ʼu fua lelei, ohage ko te meʼa ʼaē neʼe hoko ki te tēhina, neʼe ina kātakiʼi lolotoga te ʼu taʼu e 20 tona gaohi koviʼi e tona ʼohoana ʼaē ʼe mole ʼi te moʼoni. Kae ʼi te kamata fetogi ʼo te aga ʼa te fafine, neʼe ʼui fēnei e tona ʼohoana: “ ʼE ʼau loto fakafetaʼi kia Sehova ʼi tana tokoni mai kia ʼau ke ʼau maʼu te faʼa kātaki fualoa, koteʼuhi ʼe feala ke ʼau sio ʼi te temi nei ki tona ʼu fua: Kua kamata haʼele toku ʼohoana ʼi te ala ʼo te moʼoni!”
6 Kae e feafeaʼi ki tokotou ʼu kāiga? ʼE feala ʼaki takotou aga ʼaē ʼe lelei pea mo takotou ʼu faikole ʼaē ʼe koutou fai ʼo ʼuhiga mo nātou, “ke koutou fakamaliu ia nātou kia Sehova.”—1 Pe. 3:1, 2, kiʼi nota ʼi te lalo pasina.