Ko Te ʼu Fono Gāue ʼo Fepualio

Vāhaʼa ʼe Kamata ʼi Te 3 Fepualio

Katiko 27

10 min: Ko te ʼu logo ʼo te kokelekasio. Te ʼu Tonu ʼo Te Minisitelio ʼo Te Puleʼaga. Te ʼu Logo Faka Teokalatike.

15 min: “Tou Kau Ki Te Gāue ʼAē ʼe Mole Toe Fai Anai.” ʼO fai ʼaki he ʼu fehuʼi pea mo he ʼu tali. Kapau ʼe feʼauga te temi, pea ʼe feala ke fakahā he ʼu puani ʼi te tohi fakafalani Prédicateurs ʼi te kupu tāfito “Rester aux aguets: comment?” ʼi te pasina 714 ki te 715.

20 min: “ ʼE Tou ʼIloʼi Papau ʼe Maʼuhiga Te Fakahā ʼo Te Logo Lelei.” (Palakalafe 1 ki te 5) ʼI te ʼosi fai ʼo he fakamatala nounou ʼi te palakalafe 1, ko te tēhina ʼe talanoa anai ki te palakalafe 2 ki te 5 mo he toko lua peʼe ko he toko tolu kaugā fai faka mafola. ʼE nātou vakaʼi anai te ʼu puani ʼo te ʼu faʼifaʼitaki, pea ʼe nātou fakamatala pe koʼe ʼe lelei anai te ʼu faʼifaʼitaki ʼaia ʼi te telituale. ʼE fai anai e te ʼu kaugā fai faka mafola te ʼu faʼifaʼitaki. ʼE fai anai he ʼu fakamālo e te tēhina, pea mo ina foaki anai he ʼu tokoni ke toe hikihiki te lelei ʼo te ʼu faʼifaʼitaki ʼaia. ʼOsi ʼaia pea ina fehuʼi kia nātou ʼaē ʼi te fono te ʼu fakatuʼutuʼu ʼaē ka nātou fai moʼo kamata ʼo he ʼu ako Tohi-Tapu. Foaki he ʼu manatu makehe ʼo ʼuhiga mo te kamata ʼo he ako Tohi-Tapu ʼaki te tohi Te ʼAtamai Mālama.

Katiko 106 pea mo te faikole fakaʼosi.

Vāhaʼa ʼe Kamata ʼi Te 10 Fepualio

Katiko 29

5 min: Ko te ʼu logo ʼo te kokelekasio. Lau ʼo te falā.

10 min: “ ʼE Tou ʼIloʼi Papau ʼe Maʼuhiga Te Fakahā ʼo Te Logo Lelei.” (Palakalafe 6 ki te 8) Fai te ʼu faʼifaʼitaki ʼo te palakalafe 6 ki te 7. Faka maʼuhigaʼi te ʼaʼahi ʼo nātou ʼaē neʼe nātou fakahā tanatou fia logo ki te moʼoni.

30 min: “ ʼE Kumi​—Te ʼu Pionie Vaeluaʼi Temi e 190.” ʼO fai ʼaki he ʼu fehuʼi pea mo he ʼu tali e te tagata taupau ki te gāue. Faka maʼuhigaʼi te talanoa ʼi te pasina 3. Vakaʼi te polokalama ʼo te pasina 6. Ko te ʼu kaugā fai faka mafola fuli ʼaē kua papitema, ʼe tonu ke nātou vakaʼi takitokotahi ʼi te faikole peʼe feala hanatou pionie ʼi he māhina e tahi peʼe laka age. Ko te ʼu kaugā fai faka mafola ʼaē ʼe mole heʼeki papitema, ʼe feala ke nātou fakalahi tanatou kau ki te minisitelio ʼo nātou fai he fakatuʼutuʼu ʼo ʼuhiga mo tonatou ʼu hola ʼi te māhina fuli.

Katiko 43 pea mo te faikole fakaʼosi.

Vāhaʼa ʼe Kamata ʼi Te 17 Fepualio

Katiko 30

10 min: Ko te ʼu logo ki te kokelekasio. Talanoa ki te ʼu puani ʼo te ʼu nusipepa foʼou ʼaē ʼe feala ke fakaʼaogaʼi ʼi te gāue ʼi te vāhaʼa ʼaenī.

13 min: “Te ʼAho Fakamanatu​—Ko He Toʼotoʼoga ʼe Maʼuhiga ʼAupito!” ʼO fai ʼaki he ʼu fehuʼi pea mo he ʼu tali. Fai he fakaloto mālohi ke liliu te māhina ʼo Malesio ko he māhina makehe ki te selevisi pionie vaeluaʼi temi. Fakahā te fakaʼaogaʼi ʼo te ʼu pepa fakaafe ki te ʼAho Fakamanatu.

22 min: Tou Kamata He ʼu Ako Tohi-Tapu. ʼI te ʼu māhina ʼaenī kua ʼosi neʼe tufa te ʼu tohi ʼe lauʼi teau. Ko te faʼahi ʼaia ʼe ko te fakatafito ʼaia moʼo kamata ʼo he tahi ʼu ako Tohi-Tapu. Vakaʼi te meʼa ʼaē neʼe fakahoko ʼi te telituale moʼo tufa ʼo te ʼu tohi pea mo te ʼu kaupepa pea mo te ʼu nusipepa. Fakaloto mālohiʼi te ʼu kaugā fai faka mafola ke nātou ʼaʼahi ia nātou fuli ʼaē neʼe fia logo ki te moʼoni. Ko he ʼu kaugā fai faka mafola ʼe nātou fakamatala tāfito anai te meʼa neʼe nātou fai moʼo kamata ʼo he ʼu ako Tohi-Tapu. Faka maʼuhigaʼi totatou maʼua tāfito ʼaē ko te fai ʼo ni ʼu tisipulo. (Mat. 28:19, 20) Ko te faʼahi ʼaia ʼe feala ke fai fakalelei mo kapau ʼe tou faiga ke tou mulimuli ki te ʼu manatu ʼaē ʼe tuʼu ʼi Te Minisitelio ʼo Te Puleʼaga ʼo Sūnio 1996.

Katiko 47 pea mo te faikole fakaʼosi.

Vāhaʼa ʼe Kamata ʼi Te 24 Fepualio

Katiko 70

18 min: Ko te ʼu logo ʼo te kokelekasio. Fakahā te ʼu higoa ʼo nātou fuli ʼaē ʼe pionie vaeluaʼi temi ʼi Malesio. Fakamahino ki te ʼu kaugā fai faka mafola ʼe mole heʼeki tauhala tanatou fai tanatou pepa pionie. Fakaloto mālohiʼi ia nātou fuli ke nātou kau ki te gāue fai faka mafola ʼi te Moeaki, ʼaho 1 ʼo Malesio. Fakahā te tahi ʼu fakatuʼutuʼu ʼe fai ʼi te kokelekasio ʼo ʼuhiga mo te gāue lolotoga te māhina. Vakaʼi fakalelei te alatike Te Tali Ki ʼAkotou ʼu Fehuʼi.

12 min: “Kae e Feafeaʼi Ki Tokotou ʼu Kāiga?” Ko he taumatuʼa ʼe nā talanoa ki te alatike ʼaia pea nā fai he puleʼaki peʼe feafeaʼi tana talanoa ki te logo lelei ki tona ʼu kāiga ʼaē ʼe mole tauhi kia Sehova.​—Vakaʼi Te Tule Leʼo fakafalani ʼo te ʼaho 15 ʼo Fepualio 1990, pasina 25 ki te 27.

15 min: Vakaʼi Te Tufa ʼo Malesio​—Te ʼAtamai Mālama ʼAē ʼe Ina Taki Ki Te Maʼuli Heʼegata. Palalau fakanounou ki te maʼuhiga ʼo te maʼu ʼo te ʼatamai mālama ʼo te moʼoni, ke tou maʼu ai te maʼuli fiafia pea mo heʼegata. (Vakaʼi te tohi Te ʼAtamai Mālama ʼi te pasina 7, palakalafe 4 ki te 5.) Vakaʼi te tānakiʼaga ʼo te ʼu kupu tāfito ʼo te tohi, ʼi te pasina 3. Fakaafe ia nātou ʼi te fono ke nātou fili he ʼu kapite ʼe feala ke nātou fakatafito kiai te fakahā ʼo te tohi. Ko he kaugā fai faka mafola kua māhani ʼe ina fai he faʼifaʼitaki ʼo fakahā ai peʼe feafeaʼi te fakahā ʼo te tohi. Ko te ʼu faʼifaʼitaki ʼaē ʼe fakahā ʼi Te Minisitelio ʼo Te Puleʼaga ʼo Novepeli 1996 ʼi te pasina 6, ʼe feala ke tou fakaʼaogaʼi. Fakamanatuʼi kia nātou fuli ʼaē ʼi te fono ʼe feala ke nātou toʼo te ʼu tohi ʼaia ke feala hanatou fakaʼaogaʼi ʼi te fakaʼosi vāhaʼa ʼaenī.

Katiko 48 pea mo te faikole fakaʼosi.