Te ʼAho Fakamanatu—Ko He Toʼotoʼoga ʼe Maʼuhiga ʼAupito!
1 ʼI te ʼAhotapu, ʼaho 23 ʼo Malesio ʼi te ʼosi tō ʼo te laʼā, ʼe tou fakamanatu anai te ʼAho Fakamanatu ʼo te mate ʼo Kilisito. (Luka 22:19) ʼE mahino ia ʼe ko he toʼotoʼoga ʼe maʼuhiga ʼaupito! ʼI tana taupau tana agatonu kia Sehova ʼo aʼu ki tona mate, neʼe fakahā e Sesu ʼe feala ke pipiki maʼu he tagata haohaoa ki te ʼAtua, māʼiape la mokā hoko kia ia he ʼu ʼahiʼahi, pea neʼe lagolago ki te faitotonu ʼo te pule faʼitaliha ʼa Sehova. (Hep. 5:8) Tahi ʼaē meʼa, ʼaki te mate ʼo Kilisito neʼe foaki ai te sakilifisio ʼo he tagata haohaoa moʼo totogi ʼo te malamanei, pea mo faka fealagia ai kia nātou ʼaē ʼe tui ki te sakilifisio ʼaia. (Soane 3:16) Ko tatatou kau ki te ʼAho Fakamanatu, ʼe ko he faka fealagia ʼaia ke tou fakahā tatatou loto fakafetaʼi ki te ʼofa ʼo Sehova, pea mo te sakilifisio ʼaē neʼe fai e Sesu maʼa tatou.
2 ʼE fakaloto mālohiʼi ia tatou fuli ke tou mulimuli ki te polokalama ʼo te lau ʼo te Tohi-Tapu, ʼaē ʼe kamata ʼi te ʼaho 8 ʼo aʼu ki te ʼaho 23 ʼo Malesio, ohage ko tona tuʼu ʼi te Calendrier des Témoins de Jéhovah 1997. Tahi ʼaē meʼa, ko he ako faka famili ʼo ʼuhiga mo te kapite 112 ki te 116 ʼo te tohi Te tagata ʼaē ʼe lahi tokotahi ʼo te ʼu temi fuli, ʼe tokoni anai kia tatou ke tou tokagaʼi te vāhaʼa maʼuhiga ʼaupito ʼaia ʼi te hisitolia ʼo te tagata.
3 ʼE feala koa ke koutou fakalahi te temi ʼaē ka koutou fakaʼaogaʼi ki te fai faka mafola ʼi te māhina ʼo te ʼAho Fakamanatu? ʼE lahi te ʼu kaugā fai faka mafola ʼe nātou pionie vaeluaʼi temi anai ʼi te māhina ʼo Malesio, koteʼuhi ʼe ko tona ʼu fakaʼosi vāhaʼa e nima. He koʼe ʼe mole tou kau anai kia nātou ʼaia? Ko tatou fuli ʼe feala ke tou fai faka mafola ʼo fakahā ki te hahaʼi ʼe maʼuhiga ke nātou kau ki te ʼAho Fakamanatu. Mai tona ʼaluʼaga ʼaē ʼe tō te ʼaho ʼaia ʼi te ʼAhotapu, ʼe lagi faigafua anai te ʼolo ʼa te tokolahi ki te ʼaho ʼaia. Tou tokakaga ʼo fakaafe te kau ako Tohi-Tapu fuli, pea mo ʼihi age hahaʼi ʼe fia logo ki te moʼoni ke nātou fakatahitahi mo tatou. Tou fakahā kia nātou te meʼa ʼaē ʼe tuʼu ʼi te palakalafe 18, ʼo te pasina 127, ʼo te tohi Te ʼAtamai Mālama, ʼaē ʼe talanoa ʼo ʼuhiga mo te ʼaho ʼaē ʼe tonu ke faka maʼuhigaʼi ʼi te taʼu.
4 ʼE tou fakaōvi ki te toʼotoʼoga lahi ʼaia ʼo te taʼu 1997 ʼaki he loto fakafetaʼi ʼaupito ʼo ʼuhiga mo te mate ʼa Sesu maʼa tatou. Tou kau ki te toʼotoʼoga ʼaē ka fai ʼi te afiafi ʼo te ʼaho 23 ʼo Malesio, ʼaia ka fakatahitahi ai te kau Kilisitiano moʼoni ʼo te potu fuli moʼo fai ia te ʼAho Fakamanatu.