“Koutou Haga Fai Te Meʼa ʼAenī Moʼo Fakamanatu Kia Te ʼAu”
1 ʼAki te temi, ʼe tautau galoʼi e te hahaʼi te faka ʼuhiga ʼo te ʼu meʼa maʼuhiga. Ko te tupuʼaga la ʼaia, ʼi tana fakatuʼu “te taumafa ʼo te ʼAliki,” neʼe fakatotonu fēnei e Sesu ki tana ʼu tisipulo: “Koutou haga fai te meʼa ʼaenī moʼo fakamanatu kia te ʼau.” Talu mai ai, ʼi te ʼaho fakamanatu ʼo te mate ʼa Sesu, neʼe fakalogo te kau Kilisitiano ʼo nātou haga “kalagaʼi tuʼumaʼu te mate ʼo te ʼAliki, ʼo aʼu ki tana haʼu.”—1 Ko. 11:20, 23-26.
2 ʼE mole kei fualoa pea ko Sesu ʼe ina tali anai ʼi te lagi, te toe ʼo te “kiʼi faga ōvi” ʼaē ʼe fakaʼaluʼalu ʼo siʼisiʼi. (Luka 12:32; Soane 14:2, 3) ʼI te taʼu ʼaenī, ko te toe ʼo te kau fakanofo ʼo fakatahi mo te toe hahaʼi tokolahi ʼo te “tahi ʼu ōvi,” ʼaē ʼe tuputupu tuʼumaʼu, ʼe nātou toe maʼu anai te pilivilesio ʼaē ke nātou fai te Taumafa ʼo te ʼAliki, ʼi te ʼaho 11 ʼo ʼApelili. (Soane 10:16; Fkhā. 7:9, 10) ʼE toe mālohi ai anai tatatou loto fakafetaʼi ki te fakahā ʼa Sehova tona ʼofa lahi ʼi tana fekauʼi mai tona ʼAlo ʼulu tokotahi maʼa te malamanei. ʼE faka maʼuhigaʼi anai te faʼifaʼitaki ʼa Sesu, mo tona ʼofa, mo tona agatonu ʼo aʼu ki tana mate moʼo foaki te totogi, pea mo tana pule ʼi te temi nei ʼi tona ʼuhiga Hau ʼo te Puleʼaga ʼa te ʼAtua ʼaē kua fakatuʼu, pea ʼe toe faka maʼuhigaʼi foki mo te ʼu tapuakina ʼaē ka foaki anai e te Puleʼaga ki te malamanei. ʼE mahino ia ʼe ko he lakaga ʼe tou manatu ai anai kia Sesu!
3 Tou Teuteu ʼi Te Temi Nei: Tou faiga fuli ke liliu te temi ʼo te ʼAho Fakamanatu ko he temi ʼe tou fakahā ai totatou loto fakafetaʼi pea mo he temi fakafiafia lahi kia tatou pea mo nātou fuli ʼaē ka fakatahi anai mo tatou. ʼE feala ke tou teuteuʼi totatou loto, ʼo tou lau te ʼu vaega faka Tohi-Tapu ʼo ʼuhiga mo te ʼu ʼaho fakaʼosi ʼo te minisitelio ʼa Sesu pea mo te ʼu meʼa ʼaē neʼe hoko kia ia ʼo iku ai ki tona mate. ʼI te ʼu vāhaʼa ʼi muʼa ʼo te ʼAho ʼo te Fakamanatu, ʼe feala ke tou toe vakaʼi fakalelei ʼi tatatou ako faka famili te kapite 112 ki te 116 ʼo te tohi Te tagata ʼaē ʼe lahi tokotahi.
4 Ko te tokofia ʼaē ʼe koutou ʼiloʼi ʼe feala ke nātou ʼōmai ki te ʼAho Fakamanatu, mo kapau ʼe koutou faiga ke koutou fakatuputupu tanatou loto fakafetaʼi ki te ʼaho ʼaia, ʼo fakaafe nātou, pea mo fakamahino age kia nātou ʼe tou fiafia anai mo kapau ʼe feala hanatou ʼōmai? Koutou kamata fai he lisi, pea koutou faiga ʼaupito ke koutou tokoni kia nātou ke nātou ʼōmai. ʼOsi ʼaia, pea koutou tokoni kia nātou ke hoko atu tanatou tuputupu fakalaumālie, ʼo koutou fakaloto mālohiʼi nātou ke nātou kau tuʼumaʼu ki te ʼu fono.
5 Lolotoga te temi ʼo te ʼAho Fakamanatu, ʼe fai anai he ʼu fakatuʼutuʼu makehe moʼo fakatuputupu te ʼu faigamālie ʼaē ki te fai faka mafola. ʼAki he polokalama lelei, ʼe feala koa ke koutou pionie vaeluaʼi temi ʼi ʼApelili? mo Maio? Moʼo fakahā ʼe tou manatuʼi ʼaki he loto fakafetaʼi te faka ʼuhiga ʼo te sakilifisio ʼa Sesu maʼa tatou, ʼe feala ke tou palalau ʼo ʼuhiga mo totatou ʼAtua, ia Sehova, pea mo tana ʼu tapuakina ʼaē ka foaki mai anai e tona Puleʼaga ʼaē ʼe hau ai ia Sesu.—Pes. 79:13; 147:1.