ʼE Feala Ke Nātou Sio ʼe Tou Kehe Mo Nātou
1 ʼI te taʼu ʼaenī kua hili, ko hahaʼi foʼou ʼe toko 300 000 tupu neʼe nātou papitema. Koteā te sio ʼa te hahaʼi ʼaia ki te kau Fakamoʼoni ʼa Sehova ʼo tupu ai tanatou fia kau ki te kautahi ʼa te ʼAtua? He koʼe ʼe tonu ke tou kehe age ʼi te hahaʼi fuli ʼo te tahi ʼu lotu? Koʼeni he ʼu tali neʼe fai ki te ʼu fehuʼi ʼaia:
—ʼE tou mulimuli ki te Tohi-Tapu kae mole tou mulimuli ki he ʼu manatu fakatagata: ʼE tou mulimuli ki te meʼa ʼaē neʼe ʼui mai e Sesu, ke tou tauhi kia Sehova ʼAtua “ ʼaki te laumālie pea mo te moʼoni.” Ko tona faka ʼuhiga ke tou līaki te ʼu loi faka lotu pea mo tou mulimuli ki te Folafola ʼa te ʼAtua.—Soane 4:23, 24; 2 Tim. 3:15-17.
—ʼE tou ʼolo ki te hahaʼi kae mole tou atalitali ke nātou ʼōmai kia tatou: Neʼe tou tali te fakatotonu ʼa Kilisito ke tou fai faka mafola pea mo akoʼi te hahaʼi, pea ʼe tou mulimuli ki tana faʼifaʼitaki ʼo tou kumi ia nātou ʼaē ʼe loto fakamalotoloto. ʼE tou kumi nātou ʼo tou ʼolo ki tonatou ʼapi, ʼi te ala, peʼe ʼi te potu pe ʼaē ʼe feala ke tou maʼu ai nātou.—Mateo 9:35; 10:11; 28:19, 20; Gāue 10:42.
—ʼE tou akoʼi te Tohi-Tapu ki te hahaʼi fuli pea ʼe mole totogi: ʼE lahi tatatou ʼu koloā pea mo totatou mālohi ʼaē ʼe tou fakaʼaogaʼi, ʼo tou fakaʼaogaʼi ʼi te taʼu fuli hola e tahi miliale tupu ʼi tatatou tauhi ki te ʼAtua. ʼE mole tou fakapalatahi heʼe tou ako te Tohi-Tapu mo te faʼahiga hahaʼi fuli pe.—Mateo 10:8; Gāue 10:34, 35; Fkhā. 22:17.
—ʼE akoʼi lelei tatou ke tou tokoni ki te hahaʼi ʼi te faʼahi fakalaumālie: ʼAki tatatou ako takitokotahi te Tohi-Tapu pea mo totatou akoʼi ʼi te ʼu fono ʼo te kokelekasio pea mo te ʼu fakatahi, ʼe tou maʼu ai he ako faka teokalatike maʼuhiga pea mo fai hoholo, ʼe tokoni mai anai kia tatou ke tou fakamālamaʼi te hahaʼi ʼi te faʼahi fakalaumālie.—Isaia 54:13; 2 Tim. 2:15; 1 Pet. 3:15.
—ʼE maʼuhiga kia tatou te moʼoni, pea ʼe tou maʼuliʼi ʼi te ʼaho fuli: Ko totatou ʼofa ki te ʼAtua, ʼe ina uga tatou ke tou fai he ʼu fetogi, ke ʼalutahi totatou maʼuli mo tona finegalo. Ko tatatou ʼulugaaga foʼou ʼaē ʼe tatau mo Kilisito ʼe ina uga ai te hahaʼi ke nātou ʼōmai ki te moʼoni.—Kol. 3:9, 10; Sake 1:22, 25; 1 Soane 5:3.
—ʼE tou faiga ke tou maʼuʼuli pea mo gāue tahi mo te hahaʼi ʼi te tokalelei: Ko tatatou maʼu te ʼu kalitate fakaʼatua ʼe tokoni kia tatou ke tou tokaga lelei ki tatatou aga pea mo tatatou ʼu palalau. ʼE tou “kumi te tokalelei pea tou haga maʼuliʼi” ʼi tatatou ʼu felogoi mo te hahaʼi fuli.—1 Pet. 3:10, 11; Efesi 4:1-3.
2 Ko te ʼu faʼifaʼitaki lelei ʼaia ʼa te kau Kilisitiano, ʼaē ʼe sio kiai te hahaʼi ʼi te kautahi ʼa Sehova, ʼe ina uga ai te tokolahi ke nātou tali te moʼoni. Tou fakaʼamu ke malave feiā tatatou faʼifaʼitaki ki totatou ʼu feʼiloʼiʼaki ʼaē ʼe nātou sioʼi tatou.