Ko Te ʼu Fono Gāue ʼo Fepualio

Vāhaʼa ʼo te ʼaho 1 ʼo Fepualio

Katiko 79

10 min: Te ʼu logo ʼo te kokelekasio. Te ʼu Tonu. Fakamanatuʼi ki te kokelekasio ke nātou foimo ʼaumai tanatou ʼu pepa tānaki gāue ʼo Sanualio.

17 min: “Tou Fakaafe Te Hahaʼi Ke Nātou Mulimuli Ki Te Tagata ʼAē ʼe Lahi Tokotahi.” Ko he fai palalau ʼa he tagata ʼāfea ki te alatike mo he ʼu kaugā fai faka mafola faiva e toko lua peʼe toko tolu. Fai he faʼifaʼitaki ʼo te fakahāhā ʼo te tohi. Fakahā peʼe tonu ke feafeaʼi te teuteuʼi lelei ʼo he ʼaʼahi.

18 min: Tou “Kofu Ki Te Tagata Foʼou.” Ko he akonaki, ʼe vakaʼi ai te vaega ʼo Efesi 4:​20-​24. (Koutou vakaʼi Te Tule Leʼo ʼo te ʼaho 1 ʼo Malesio 1993, ʼi te ʼu pasina 14 ki te 18, palakalafe 4 ki te 17.) Fakamahino peʼe feafeaʼi hatatou līaki te ʼulugaaga ʼāfea kae tou kofuʼi te ʼulugaaga foʼou.

Katiko 15 pea mo te faikole fakaʼosi.

Vāhaʼa ʼo te ʼaho 8 ʼo Fepualio

Katiko 51

10 min: Te ʼu logo ʼo te kokelekasio. Lau ʼo te falā.

15 min: “Tou Kamata He ʼu Ako Tohi-Tapu ʼAki Te Kaupepa Fakamaʼua.” ʼE fai ʼaki he ʼu fehuʼi pea mo he ʼu tali.

20 min: “ ʼE Tokaga Totatou Tupuʼaga Lahi Kia Tatou!” ʼE fai ʼaki he ʼu fehuʼi pea mo he ʼu tali. Koutou fakamahino peʼe lava fakaʼaogaʼi feafeaʼi te tohi Créateur moʼo tokoni ki te hahaʼi ʼaē ʼe lotolotolua peʼe nātou fakafisi ki te ʼui ʼaē ʼe ʼi ai he ʼAtua. ʼE feala ke mālohi ai tatatou tui mo kapau ʼe tou lau te tohi. Ko te ʼu kaugā fai faka mafola fuli ʼaē ʼe nātou mahino ki te Fakafalani, ʼe tonu ke nātou lau te tohi ʼaia. ʼE toe feala foki ke fakaʼaogaʼi lelei e te ʼu tamaliki te tohi ʼaia ki tanatou ʼu hahaʼi faiako. Logope la neʼe mole fakatuʼutuʼu ke fai he ʼu ako Tohi-Tapu mo te tohi ʼaia, kae ʼe feala ke fakaʼaogaʼi lelei moʼo uga te hahaʼi ke nātou vakaʼi te ʼu meʼa fuli ʼaē ʼe ʼui e te Tohi-Tapu. (Koutou vakaʼi te tohi Créateur ʼi te ʼu pasina 189 ki te 191.) Koutou fakaafe he ʼu kaugā fai faka mafola ke nātou fakahā tanatou manatu ʼo ʼuhiga mo te tohi pea mo nātou fakamatala he ʼu meʼa neʼe hoko kia nātou ʼi tanatou tufa te tohi ʼaia ki te hahaʼi.

Katiko 86 pea mo te faikole fakaʼosi.

Vāhaʼa ʼo te ʼaho 15 ʼo Fepualio

Katiko 106

10 min: Te ʼu logo ʼo te kokelekasio. Te ʼu Logo Faka Teokalatike.

18 min: He Koʼe ʼe ʼAoga Kia Tatou Ke Tou Kau Ki Te Ako ʼo Te Minisitelio Faka Teokalatike? Ko he fai palalau mo nātou ʼaē ʼi te fono ʼe fai e te tagata taupau ʼo te ako. Ko te akoako ke kita palalau ia muʼa ʼo te hahaʼi, ʼe mole ko te fakatuʼutuʼu pe ʼaia e tahi ʼo te ako. ʼE ʼi ai te tahi ʼu faʼahi ʼo te ako ʼe ʼaoga anai kia tatou. (Koutou vakaʼi te Manuel pour l’École, ʼi te ʼu pasina 12 ki te 13.) ʼE akoʼi ai tatou ke tou popoto ʼi te palalau mo te hahaʼi, ke mahino lelei tatatou ʼu palalau, ke tou poto ʼi tona ʼaveʼave lelei, pea ke tou ʼiloʼi papau pe koteā te ʼu palalau ʼaē ʼe tonu ke tou fai, ʼo tou liliu ai ʼo poto ʼi te tali ki te ʼu fehuʼi ʼo ʼuhiga mo tatatou tui, pea mo te fakamahino te ʼu tonu ʼaē ʼe tou fai ʼo mulimuli ki te Tohi-Tapu. ʼE tuputupu ai tatatou mālama ki te Tohi-Tapu, pea ʼe tokoni ai kia tatou ke tou poto lelei ʼi te faka mafola ki te hahaʼi. ʼE tou ʼiloʼi ai te ʼu faʼahi ʼaē ʼe tou vaivai ai pea ʼe tou tali te ʼu tokoni ʼaē ʼe fai mai, ʼo tou liliu ai ʼo agalelei mo te hahaʼi. Ko te ako ʼaia ʼe tokoni mai ke tou “poto lelei ʼi te gāue” ʼi totatou ʼuhiga kau minisi ʼa te ʼAtua.​—2 Ko. 3:​5, 6.

17 min: “ ʼE Lava Feafeaʼi Ki He Famili Ke Felagolagoʼaki​—ʼI Te Ako Tohi-Tapu?” Ko te fai palalau ʼa he Famili. ʼE nātou vakaʼi peʼe feafeaʼi hanatou maʼuliʼi te ʼu tokoni ʼo ʼuhiga mo te lau ʼo te Tohi-Tapu pea mo te ako Tohi-Tapu faka famili, ʼaē ʼe tou maʼu ʼi Te Tule Leʼo ʼo te ʼaho 15 ʼo Maio 1996, ʼi te ʼu pasina 14 ki te 15, pea mo Te Tule Leʼo ʼo te ʼaho 15 ʼo ʼOketopeli 1992, ʼi te ʼu pasina 16 ki te 17.

Katiko 158 pea mo te faikole fakaʼosi.

Vāhaʼa ʼo te ʼaho 22 ʼo Fepualio

Katiko 121

10 min: Te ʼu logo ʼo te kokelekasio.

15 min: “He Koʼe ʼe Tonu Ke Tohi ʼi He Moʼi Pepa Te ʼu ʼApi ʼAē Neʼe Mole Maʼu Ai He Tahi?” Vakaʼi te alatike ʼo Te Minisitelio ʼo Te Puleʼaga ʼo Maio 1995. Ko he fai palalau mo he ʼu kaugā fai faka mafola e toko lua peʼe toko tolu.

20 min: ʼE Tou Lava Maʼu Feafeaʼi Te Fiafia ʼi Te Fai ʼo Ni ʼu Tisipulo. Ko he akonaki ʼe fakatafito ki Te Tule Leʼo ʼo te ʼaho 15 ʼo Fepualio 1996, ʼi te ʼu pasina 19 ki te 22.

Katiko 85 pea mo te faikole fakaʼosi.