ʼU Mātuʼa—Koutou Tuku He Faʼifaʼitaki Lelei Ki Takotou Fānau
1 ʼE ʼui mai e te Folafola ʼa te ʼAtua, “ko te tāmai [pea mo te faʼe] ʼo ia ʼaē ʼe faitotonu ʼe fiafia moʼoni anai.” (Taag. 23:24, 25) ʼI tapuakina leva maʼa te ʼu mātuʼa ʼaē neʼe nā tuku he faʼifaʼitaki lelei ki tanā fānau! Ko te tēhina ʼe kau ʼi te komite ʼo he filiale neʼe ina ʼui fēnei ʼo ʼuhiga mo tana ʼu mātuʼa: “Neʼe nā fakaʼaogaʼi tonā maʼuli katoa maʼa te moʼoni, pea neʼe ʼau fia fai mo ʼau te faʼahi ʼaia.” Koteā te aga ʼa te ʼu mātuʼa ʼaē ʼe tonu ke sio kiai te ʼu fānau?
2 Te Aga Fakapoipoi Pea Mo Te Fakaʼapaʼapa: ʼE ko he maʼua ʼa te ʼu mātuʼa ke nātou akoʼi he ʼu kalitate lelei ki tanatou fānau. Ko te aga fakapoipoi ʼe feala ke akoʼi ki te fānau ʼaki he ʼu palalau, kae ʼe nātou toe ako anai te faʼahi ʼaia ʼi tanatou sio pea mo tanatou faʼifaʼitaki ki tanatou ʼu mātuʼa. Koia, koteā takotou faʼahiga aga? ʼE logo koa takotou fānau ʼe koutou ʼui “silou,” peʼe “fakalelei siʼou loto,” pea mo koutou ʼui “mālo”? ʼE koutou fefakaʼapaʼapaʼaki koa ʼi te famili? ʼE koutou fakalogo koa mokā palalau ʼihi? ʼE koutou fakalogo koa mokā palalau atu takotou ʼu fānau? ʼE koutou fakahā koa te ʼu kalitate ʼaia ʼi te Fale ʼo te Puleʼaga pea mo takotou loto fale?
3 Koutou Mālolohi ʼi Te Faʼahi Fakalaumālie Pea Mo fai Faka Mafola Fakamalotoloto: Ko te tēhina neʼe gāue temi katoa lolotoga taʼu e 50 tupu, ʼe ina ʼui fēnei: “Ko taku faʼe pea mo taku tāmai neʼe ko he ʼu faʼifaʼitaki lelei kia ʼau ʼi tanā faka maʼuhigaʼi te ʼu fono pea mo tanā kau fakamalotoloto ki te minisitelio.” ʼE koutou fakahā feafeaʼi ki takotou ʼu fānau, ʼe koutou tokaga ki te maʼuli fakalaumālie ʼo tokotou loto fale? ʼE koutou vakaʼi fakatahi koa te koga tohi ʼo te ʼaho? ʼE fai tuʼumaʼu koa hakotou ako faka famili? ʼE sio koa takotou fānau kia koutou ʼe koutou lau te Tohi-Tapu pea mo te ʼu tohi ʼa te Sosiete? Koteā te ʼu meʼa ʼaē ʼe nātou logo kiai mokā koutou hūfaki takotou famili? ʼE koutou palalau koa ki he ʼu meʼa fakalaumālie mo takotou fānau, ʼo koutou talanoa ki te ʼu faʼahi lelei ʼo te moʼoni pea mo te kokelekasio? ʼE koutou fakaʼamu lahi koa ke koutou kau faka famili ki te ʼu fono pea mo te minisitelio?
4 ʼU mātuʼa, koutou vakaʼi peʼe feafeaʼi te faʼifaʼitaki ʼaē ʼe koutou tuku ki takotou fānau. Koutou fai ke lelei te faʼifaʼitaki ʼaia, ke feala ke nātou mulimuli kiai ʼi tonatou maʼuli katoa. Neʼe ʼui fēnei e te ʼohoana ʼo te tēhina taupau feʼaluʼaki, kua taʼu 70 tupu: “ ʼE kei ʼaoga kia ʼau te faʼifaʼitaki lelei ʼo taku ʼu mātuʼa Kilisitiano agaʼofa. Pea ʼe ʼau faikole ke ʼau fakahā taku fakafetaʼi ki te faʼifaʼitaki ʼaia, ʼo ʼau mulimuli kiai ʼi toku maʼuli katoa.”