Te Tali Ki ʼAkotou ʼu Fehuʼi

◼ Kua koutou tokalelei koa mokā hoko mai he meʼa fakafokifā?

ʼI te mālama ʼaenī, ʼuhi “ko te ʼu temi pea mo te ʼu meʼa fakafokifā” ʼaē ʼe hoko, ʼe lagi tonu anai ke ʼave tatou ki te lopitali, pea lagi fakaneke anai tatou ke tou tali he foʼi huki toto. (Tnk. 9:​11) Ke feala hatatou nofo teuteu ki te faʼahi ʼaia, neʼe tuku mai e te kautahi ʼa Sehova te ʼu faʼahiga tokoni kehekehe, kae ʼe ʼi ai te ʼu meʼa ʼe ina kole mai ke tou fai. Koʼeni te ʼu tokoni ʼaē ka ʼaoga anai kia koutou.

• Koutou ʼave tuʼumaʼu mo koutou takotou kiʼi kate Instructions médicales/Pas de sang.

• Koutou vakaʼi peʼe ʼave e takotou tamaliki tanatou kiʼi Document dʼidentité médical.

• Koutou toe vakaʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sepetepeli 1992, ʼo koutou akoako te ʼu palalau ʼaē ʼe tonu ke koutou fai ki te kau tōketā pea mo te ʼu tuʼi fakamāu ʼo ʼuhiga mo te faitoʼo ʼo takotou fānau.

• Koutou toe vakaʼi te ʼu alatike ʼo ʼuhiga mo te ʼu foʼi huki ʼaē ʼe maʼu ai te ʼu koga ʼo te toto, pea mo te tahi ʼu huki ʼaē ʼe feala ke fai moʼo fetogi ʼaki te toto. (Ohage la: Te Tule Leʼo ʼo te ʼaho 1 ʼo ʼOketopeli 1994, te pasina 31; mo te ʼaho 1 ʼo Sūnio 1990, Fakafalani, pasina 30 ki te 31; pea mo te ʼaho 1 ʼo Malesio 1989, Fakafalani, pasina 30 ki te 31; te Réveillez-vous! ʼo te ʼaho 8 ʼo Tesepeli 1994, pasina 23 ki te 27; mo te ʼaho 8 ʼo ʼAukusito 1993, pasina 22 ki te 25; pea mo te ʼaho 22 ʼo Novepeli 1991, pasina 10; pea mo te ʼu pepa ʼaē ʼe ʼalutahi mo Te Minisitelio ʼo Te Puleʼaga ʼo Sepetepeli 1992 pea mo Novepeli 1990. Koutou taupau te ʼu alatike ʼaia ʼi he kato ke faigafua tona maʼu.)

• Koutou fakakaukauʼi fakalelei peʼe koutou loto anai ke fakaʼaogaʼi he ʼu masini ʼaē ʼe nātou fakaʼalu ki tuʼa te toto ʼo te sino, peʼe koutou tali anai he ʼu faʼahiga huki ʼe maʼu ai he ʼu koga ʼo te toto.

• ʼI muʼa ʼo takotou ʼolo ki te lopitali, kapau ʼe feala, pea koutou fakahā ki te kau tagata ʼāfea ke feala hanatou lagolago kia koutou pea mo felogoi mo te Komite Felogoi mo te Lopitali mo kapau ʼe ʼaoga. Kapau ʼe ko he tamasiʼi ʼaē ʼe tonu ke ʼave ki te lopitali, koutou fakahā fakatomuʼa ki te kau tagata ʼāfea.

Koutou Fakahā Fakalelei Takotou Fakafisi Ki Te Toto: ʼE hā mai, ko ʼihi tēhina mo tuagaʼane ʼe nātou hoki fakahā ki te kau tōketā tanatou fakafisi ki te toto ʼi te temi ʼaē ʼe tafa ai nātou. Ko te faʼahi ʼaia ʼe fakatupu fihifihia ki te kau tōketā, pea ʼe feala ke fai mālohi ai hakotou foʼi huki toto. Kapau ʼe ʼiloʼi fakatomuʼa e te kau tōketā, ko takotou tonu pea mo te meʼa ʼaē ʼe koutou fakaʼamu kiai ʼe ʼi ai te pepa moʼo fakamoʼoni kiai, ʼe nātou foimo fai anai he puleʼaki ke nātou fakaʼaogaʼi he tahi ʼu faitoʼo ʼe mole fakaʼaogaʼi ai te toto.

Ko he tuʼutāmaki ʼe hoko tuʼumaʼu ʼi te lakaga ʼaē ʼe mole kita ʼamanaki kiai, koia koutou fai ʼi te temi nei he ʼu fakatuʼutuʼu ke koutou puipui ia koutou pea mo takotou fānau ke mole fai kia koutou he foʼi huki toto.​—Taag. 16:20; 22:⁠3.