ʼE Tou Kehe ʼUhi Ko Tatatou Fai Faka Mafola
1 Ko te tokolahi ʼe nātou fehuʼi fēnei: “Koteā ʼaē ʼe kehekehe ai te kau Fakamoʼoni ʼa Sehova pea mo te tahi ʼu lotu?” ʼE koutou tali feafeaʼi anai? Neʼe koutou lagi fakamahino age tatatou ʼu akonaki ʼaē ʼe fakatafito ki te Tohi-Tapu. Kae ʼe koutou ʼiloʼi koa la ʼe feala ke koutou fakahā age, ʼe tou kehe mo te tahi ʼu lotu ʼuhi ko tatatou fai faka mafola ki te hahaʼi?—Mat. 24:14; 28:19, 20.
2 Ia ʼaho nei, ʼe tokosiʼi te hahaʼi lotu ʼaē ʼe nātou fia faka mafola tanatou lotu. ʼE lagi nātou manatu ʼe feʼauga pe tanatou fakalogo ki te ʼu lao ʼa Sesale, tanatou tuku he faʼifaʼitaki lelei ʼi tonatou maʼuli, peʼe nātou agalelei ki te hahaʼi. Kae kia nātou ʼe mole ko honatou maʼua ke nātou akoʼi ki te hahaʼi te ʼu meʼa ʼaē ʼe ʼui e te Tohi-Tapu ʼo ʼuhiga mo te fakamaʼuli. Koteā ʼaē ʼe tou kehe ai mo nātou?
3 ʼE mole tatau tatatou gāue mālohi ʼi te fai faka mafola pea mo te ʼu gāue ʼo te tahi ʼu lotu. Talu mai taʼu e 100 tupu, neʼe faka mafola tuʼumaʼu pe e te kau Fakamoʼoni te logo lelei ʼo aʼu ki te ʼu potu taupotu ʼo te kele, ohage ko tona fai e te ʼu ʼuluaki Kilisitiano. ʼI tatatou gāue ʼaia, ʼe tou fakatuʼutuʼu ke tou tokoni ki te tokolahi ke nātou mulimuli ki te finegalo ʼo te ʼAtua.—1 Tim. 2:4; 2 Pet. 3:9.
4 Koteā Te Sio ʼa Te Hahaʼi? ʼE ʼiloʼi koa e te hahaʼi ʼe koutou faka mafola tuʼumaʼu te Folafola ʼa te ʼAtua? (Gaue 17:2, 3; 18:25) ʼI takotou fai faka mafola ʼaia, ʼe sio koa te hahaʼi ʼe kehekehe tanatou lotu pea mo takotou lotu? ʼE ʼiloʼi koa e te hahaʼi ʼe koutou fia vaevae takotou ʼamanaki mo nātou? ʼE koutou kau tuʼumaʼu koa ki te minisitelio? Koutou manatuʼi, ʼe mole tou kehe ʼuhi pe ko totatou higoa, kae ʼe toe ʼuhi foki ko te faka ʼuhiga ʼo te higoa ʼaia—ʼe tou fakamoʼoni kia Sehova.—Isa. 43:10.
5 Ko totatou ʼofa ki te ʼAtua pea mo totatou kāiga ʼe ina uga tatou ke tou kau ki te gāue fai faka mafola. (Mat. 22:37-39) Koia, ohage ko Sesu pea mo te kau ʼapositolo, ʼe tou fia fakaʼaogaʼi te ʼu faigamālie fuli pe moʼo vaevae te logo ʼo te Puleʼaga ki te hahaʼi. Tou fakaʼamu ke hoko atu tatatou kau mālohi ki te faka mafola ʼo te logo lelei ki te hahaʼi ʼaē ʼe fia logo kiai. Ko te faʼahi ʼaia ʼe tokoni anai ki te hahaʼi fakamalotoloto ke nātou “mamata ki . . . te kehekehe ʼo te tagata ʼaē ʼe kaugana ki te ʼAtua pea mo te tagata ʼaē ʼe mole kaugana kia te ia.”—Mlk. 3:18.