Koutou Fiafia ʼi Takotou Tauhi Taputapu
1 Neʼe nātou liliu “fiafiaʼage.” ʼE fakamatala mai e te Tohi-Tapu te fiafia ʼa te toko 70 kau tisipulo ʼi tanatou toe liliu mai kia Sesu, ʼi tanatou ʼosi fai faka mafola. Ei, neʼe nātou fiafia ʼi tanatou fai te finegalo ʼo te ʼAtua. (Lu. 10:17) Koteā ʼaē ʼe lava tokoni atu kia koutou ke koutou maʼu te taʼi fiafia ʼaia ʼi te tauhi taputapu?
2 Koutou Falala: ʼE tuku atu e Sehova ʼAtua te pilivilesio ʼaē ke koutou fakahā ki te hahaʼi tana fakatuʼutuʼu lahi. ʼAki takotou faka mafola, ʼe koutou lava tokoni anai ki he tahi ke ina līaki te ʼu aga fakalialia ʼo te mālama ʼaenī, pea ke ʼāteaina mai te ʼu haʼisia ʼo te lotu hala. ʼE koutou lava foaki ki te hahaʼi te ʼamanaki ke nātou maʼuʼuli ʼi he mālama ʼe mole maʼu ai te ʼu maveuveu ʼaē ʼe maʼu ʼi te temi nei. Koutou fakakaukauʼi age muʼa te fiafia ʼa Sehova mokā lava lelei takotou to te pulapula ʼo te moʼoni ʼi he loto ʼe ina tali te faʼahi ʼaia. Koutou falala ʼo faikole ke fakatupu e te laumālie ʼo te ʼAtua ia koutou te fua ʼo te fiafia, pea mo koutou hoko atu takotou minisitelio ʼaki tokotou loto katoa.
3 Te Ako ʼAē ʼe ʼAoga: Ko te ako ʼaē neʼe fai e Sesu ki te toko 70 kau tisipulo ʼe hage ko te Fono Gāue ʼaē ʼe fai ʼi totatou temi. Neʼe ina akoʼi nātou ke feala hanatou fakahoko lelei tanatou minisitelio. (Lu. 10:1-16) Ia ʼaho nei, ʼe akoʼi koutou e te Fono Gāue ke koutou popoto ʼi te palalau ki te hahaʼi, peʼe feafeaʼi te kamata ʼo he ʼu fai palalau mo te hahaʼi, pea e feafeaʼi te kamata ʼo he ʼu ako Tohi-Tapu pea mo tona faʼahiga fai. Kapau ʼe koutou faiga, pea mo hikihiki takotou ʼu fealagia ʼi te fai faka mafola, pea ʼe koutou fakatokagaʼi anai ko takotou falala pea mo takotou fiafia, ʼe nā fakamaʼamaʼa anai pea mo pulihi takotou manatu ʼaē ʼe faigataʼa te gāue ʼaia pea ʼe mole koutou lavaʼi.
4 Koutou Haga Sio Ki Te Ka Haʼu: Neʼe fiafia Sesu ʼi tana tauhi taputapu, logola te ʼu mamahi ʼaē neʼe tau mo ia. Koteā tona tupuʼaga? Koteʼuhi neʼe haga sio maʼu ki te ʼu tapuakina pea mo te ʼu pilivilesio ʼaē neʼe fakatalitali kia ia. (Hep. 12:2) ʼE koutou lava fai feiā mo koutou, ʼo koutou fakahaga tokotou ʼatamai mo tokotou loto ki te huafa ʼa Sehova, pea mo te ʼu tapuakina ʼaē ka tou maʼu ʼi te mālama foʼou ʼaē ka fakatuʼu e te ʼAtua. ʼE koutou fiafia anai pea mo koutou maʼu he ʼuhiga ʼo tokotou minisitelio.
5 Ko te kau ki te tauhi taputapu ʼa Sehova, ʼe ko te pilivilesio lahi tokotahi ʼaē ʼe koutou lava maʼu ia ʼaho nei. Koia ʼe koutou lava ʼui fēnei ai: “Neʼe ʼau fiafia, Ê toku ʼAtua, ʼi te fai ʼo tou finegalo.”—Pes 40:8.