‘E Mole Alunoa Takotou Gaue’
1 ʼE ko he manatu fakaloto mālohi! ʼE mole alunoa takotou gāue kinakina ʼi te tauhi kia Sehova. (1 Ko. 15:58) Kaeā te gāue loaloaga pea mo kinakina ʼa te hahaʼi ʼaē ʼe nātou faiga ke lelei tonatou tuʼulaga faka sosiale, pe ko tonatou ʼaluʼaga faka paʼaga? ʼE lagi nātou fai he ʼu ako faigataʼa lolotoga ni taʼu, peʼe nātou gāue kinakina ke maʼu hanatou ʼu koloā. Mai tona ʼuhiga ʼaē ʼe hoko “te ʼu temi pea mo te ʼu meʼa fakafokifā,” ʼe mole lagi feala ke nātou fakahoko te meʼa ʼaē neʼe nātou loto kiai, peʼe lagi tonu anai ke nātou fakafeauga ki te ʼu koloā ʼaē kua nātou maʼu. Ei, ʼe ʼalunoa tanatou ʼu faiga, ohage ko “he faiga ki he matagi.” (Tnk. 1:14; 9:11) Koia ʼe maʼuhiga ʼaupito ai ke tou gāue katoa ʼi te gāue e tahi ʼaē ʼe mole ʼalunoa, heʼe tologa tona ʼu fua.
2 Te Gāue ʼAē ʼe Maʼuhiga Tāfito: Ko te gāue ʼaē ʼe maʼuhiga tāfito, ʼe ko te faka mafola ʼo te logo lelei ʼo te Puleʼaga ʼo te ʼAtua. ʼE tonu ke tou fai te gāue ʼaia tatau aipe peʼe fakalogo te hahaʼi kiai peʼe kailoa. ʼE tonu anai ke tou lava ʼui ohage ko Paulo: “E au maʼa mai te taataa o te tagata fuape. Koteuhi nee mole au taofi te finegalo o te Atua, nee au fakaha ia kia koutou katoa.”—Gaue 20:26, 27.
3 ʼI meʼa fakafiafia foki mokā fakalogo te hahaʼi pea mo nātou tali te logo ʼo te Puleʼaga. ʼE ʼi ai te fafine kei finemui neʼe mate tona mahikitaga. Pea neʼe ina fia ʼiloʼi pe kua ʼalu ʼapē tona mahikitaga ki selo pe ko ʼifeli. Neʼe faikole ki te ʼAtua ke tokoni age kia ia, ʼo ina fakaʼaogaʼi te huafa ʼo Sehova, ohage ko tona akoʼi age e tona tēhina. Mole tuai pea neʼe ina ako te Tohi-Tapu pea ʼalu ki te ʼu fono. ʼI te temi ʼaia neʼe mole kei tatau ai leva tana mahino ki te maʼuli, pea ina līaki tana fakakaugā mo te hahaʼi māmio kovi. Neʼe ina tuku tana suluka, tana toloke, pea mo tana kaihaʼa. ʼE ina ʼui fēnei: “Ko taku ʼofa kia Sehova neʼe tokoni mai kia ʼau ke ʼau līaki toku maʼuli kovi ʼaia. ʼE ko te manavaʼofa lahi ʼa Sehova ʼaē neʼe ina foaki mai kia ʼau te ʼamanaki ki te maʼuli heʼegata.” ʼI te temi nei, ʼe mole kei ina faka ʼalunoa tona maʼuli.
4 Tatau aipe peʼe mole fia logo te hahaʼi, kae koutou haga hoko atu te gāue heʼe ʼi ai tona ʼaoga moʼoni. ʼE nātou ʼiloʼi kua ʼaʼahi nātou e te kau Fakamoʼoni ʼa Sehova. Kua koutou fakahā age kia nātou takotou agatonu, pea mo takotou ʼofa. Koia, ʼaua naʼa koutou manatu ʼe ʼalunoa takotou gāue kinakina maʼa te ʼAliki!