He Koʼe ʼe Tonu Ke Tou Fakavikiviki Fuli Ki Te ʼAtua?

ALELUIA! ʼE ʼiloʼi lelei te kupu ʼaia e te hahaʼi ʼaē ʼe nātou maʼuliʼi te lotu ʼo te Keletiate. Ko ʼihi ia nātou ʼe nātou kalagaʼi mālohi te kupu ʼaia ʼi tanatou ʼu misa ʼAhotapu. Kae, ko te tokofia ia nātou ʼe nātou mahino ki te ʼuhiga moʼoni ʼo te kupu ʼaia? ʼI tona fakahagatonu, ko te kupu ʼaia ʼi te lea faka Hepeleo ko tona faka ʼuhiga ʼaenī “Fakavikiviki kia Sah!” ʼE ko he kalaga fakafiafia pea mo mālohi ʼe fai ki te Tupuʼaga, ʼaē ko tona huafa ko Sehova.a

ʼE tuʼa lahi te hā ʼo te kupu “Aleluia” ʼi te Tohi-Tapu. Koteā tona tupuʼaga? Koteʼuhi ʼe lahi te ʼu tupuʼaga ke tou fakavikiviki ai ki te ʼAtua. Ko Sah (Sehova) ko ia te Tupuʼaga pea ʼe ko ia ʼaē ʼe tokaga ki te ʼatulaulau. (Pesalemo 147:​4, 5; 148:​3-6) Ko ia ʼaē neʼe ina fakatupu ia meʼa fuli ʼaē ʼe nātou faka fealagia te maʼuli ʼi te kele. (Pesalemo 147:​8, 9; 148:​7-​10) Pea ʼe tokaga moʼoni ki te malamanei. Kapau ʼe tou fai tona finegalo, pea ʼe ina tapuakina anai pea mo lagolago anai kia tatou ʼi te maʼuli ʼaenī, pea ʼe ina foaki mai anai te ʼamanaki moʼoni ki he maʼuli ʼe lelei age ʼi te temi ka haʼu. (Pesalemo 148:11-​14) Neʼe ʼui e Sah (Sehova) te ʼu palalau ʼaenī: “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.”​—Pesalemo 37:29.

Koia, ʼe fai mai kia tatou fuli te ʼu palalau ʼaenī: “Aleluia!” “Koutou fakavikiviki kia Sah!” (Pesalemo 104:35; kiʼi nota ʼi te lalo pasina) Kae, ʼi meʼa fakaʼofaʼofa foki, heʼe mole ko te hahaʼi fuli ʼaē ʼe nātou tali kiai. Ia ʼaho nei, ʼe mamahi te hahaʼi. Tokolahi ʼe nātou pakupaku, mo fia ʼiʼinu, ʼe nātou mahahaki, peʼe nātou maʼuʼuli taʼomia. Tokolahi ʼe nātou tau mo te ʼu mamahi lahi ʼuhi ko te fakaʼaogaʼi ʼo te toloke, te ʼinu fakavale ʼo te kava, pe ko te fua ʼo tanatou ʼu aga heʼeʼaoga pe ko tanatou agatuʼu. ʼE ʼi ai koa he tupuʼaga ke fakavikiviki e te hahaʼi ʼaia ia te ʼAtua?

‘Ko Sehova Tokotahi Pe ʼAē Neʼe Feala Ke Ina Foaki Mai Te ʼAmanaki’

Ei, ʼe ʼi ai tona tupuʼaga. ʼE fakaafe e Sehova te hahaʼi fuli ke nātou ʼiloʼi ia ia, ke nātou ako te fai ʼo tona finegalo, pea ke nātou maʼu te ʼu tapuakina ʼaē ʼe tupu ai te fia fakavikiviki ʼa te hahaʼi kia te ia. Pea ko te tokolahi ʼe nātou tali kiai. Ohage la ko Adriana, ʼi Kuatemala. ʼI te taʼu fitu ʼo Adriana, neʼe mate tana faʼe. ʼO mole fualoa, pea līaki ia ia e tana tāmai. ʼI tona taʼu 10, neʼe kamata gāue ke feala hana maʼu te ʼu meʼa ʼaē ʼe ʼaoga ki tona maʼuli. Mai tona ʼaluʼaga ʼaē neʼe ʼui age e tana faʼe ke tauhi ki te ʼAtua pea mo te lotu, koia neʼe fakatahi ai ia Adriana mo te ʼu kūtuga Katolika kehekehe, kae ʼaki te temi, ʼi tona taʼu 12, neʼe lotomamahi ʼi te ʼu kūtuga ʼaia, pea neʼe ʼalu ʼo fakatahi mo te tamaliki ʼaē ʼe taka ʼi te ala. Neʼe kamata suluka, mo fakaʼaogaʼi te toloke, pea mo kaihaʼa. He koʼe ʼe fia fakavikiviki anai he taʼahine feiā ki te ʼAtua?

Neʼe kamata ako e te tēhina ʼo Adriana te Tohi-Tapu mo te kau Fakamoʼoni ʼa Sehova, kae neʼe vāʼi ia ia e Adriana. Neʼe mate leva tona mahikitaga. ʼI tona ʼavaifo, neʼe lahi te ʼu fehuʼi neʼe fai e Adriana, neʼe mole ina maʼu he ʼu tali kiai. Neʼe ʼalu koa kifea tona mahikitaga? Neʼe ʼalu koa ki selo? Ki he ʼifeli kakaha? Neʼe mole mahino lelei kia Adriana, pea neʼe ʼalu ki te ʼēkelesia ʼo te tānuma ʼo faikole ke foaki age he tokoni, pea neʼe ina fakaʼaogaʼi te huafa ʼo te ʼAtua, ia Sehova, ohage ko tona akoʼi age e tona tēhina.

ʼO mole fualoa, pea neʼe ina ako te Tohi-Tapu mo te kau Fakamoʼoni ʼa Sehova, pea neʼe ʼalu ki tanatou ʼu fono. Neʼe ina maʼu ai te manatu foʼou ʼo ʼuhiga mo te maʼuli, pea ʼaki he lotomālohi, neʼe ina fakagata tana fakatahi mo te tamaliki ʼaē ʼe taka ʼi te ala. ʼE ʼui fēnei e Adriana, kua taʼu 20 vaelua ʼi te temi nei: “Neʼe ʼau mavae mai te faʼahiga maʼuli kovi ʼaia ʼuhi ko toku ʼofa ʼaē kia Sehova. Neʼe ko Sehova tokotahi pe ʼaē neʼe feala ʼaki tona loto manavaʼofa lahi, ke ina foaki mai te ʼamanaki ʼo te maʼuli heʼegata.” Ko Adriana, logope la neʼe faigataʼa te kamata ʼo tona maʼuli, kae ʼe ina maʼu te ʼu tupuʼaga lelei ke fakavikiviki ki te ʼAtua.

Ko te ʼaluʼaga neʼe hage neʼe mole ʼi ai he ʼamanaki kiai neʼe hoko ʼi Ukraine. Neʼe nofo pilisoni te tagata ʼo fakatalitali ki te temi ʼaē ka matehi ai ia ia. Neʼe lotomamahi koa ki te meʼa ʼaē neʼe hoko kia ia? Neʼe lotovaivai koa? Kailoa. Mole heʼeki faʼa fualoa tana fai palalau ʼaē mo te kau Fakamoʼoni ʼa Sehova pea mo tana kua mahino kia Sehova, pea neʼe ina kole age kia nātou ke nātou ʼaʼahi tana faʼe. Koia, ʼe faitohi kia nātou ʼi tana logo ʼaē neʼe nātou fai te meʼa ʼaē neʼe ina kole age kia nātou. ʼE ina ʼui fēnei: “ ʼE ʼau fakamālo atu ʼi takotou ʼolo ʼaē ʼo ʼaʼahi taku faʼe. ʼI te taʼu ʼaenī kua hili, neʼe ko te logo ʼaia ʼaē neʼe ʼau fiafia lahi ai.”

ʼI tana palalau ʼo ʼuhiga mo ia pea mo te hahaʼi pilisoni ʼaē neʼe fai faka mafola age kia nātou, ʼe ina tohi fēnei: “ ʼI te temi nei, ʼe mātou tui ki te ʼAtua, pea ʼe mātou faiga ke mātou maʼuliʼi te ʼu meʼa ʼaē ʼe mātou tui kiai.” ʼE ina fakaʼosi fēnei tana tohi: “ ʼE mātou fakamālo atu ki takotou tokoni mai kia mātou ke mātou ako te faka ʼuhiga ʼo te ʼofa pea mo maʼu te tui. Kapau ʼe ʼau maʼuli, pea ʼe ʼau tokoni atu anai mo ʼau ki te gāue ʼaē ʼe koutou fai. ʼE ʼau fakamālo ki te ʼAtua, ki tana foaki mai te ʼu hahaʼi ohage ko koutou, pea mo takotou tokoni ki te hahaʼi ke nātou ʼofa ki te ʼAtua pea mo nātou tui kia te ia.” Neʼe toe fai e te tagata ʼaia tana kole ki te telepinale ʼo ʼuhiga mo tona fakatūʼa ki te mate. Kae, tatau aipe peʼe matehi, peʼe nofo pilisoni lolotoga ni ʼu taʼu, kae kua ina maʼu te tupuʼaga moʼoni ke fakavikiviki ki te ʼAtua.

‘Logope La ʼe ʼAu Kivi, Kae ʼe Feala Ke ʼAu Sio’

Tou vakaʼi ʼi te temi nei, te taʼahine lotomālohi, neʼe puli fakafokifā tana sio. Neʼe ko te meʼa ʼaia neʼe hoko kia Gloria, ʼe nofo ʼi Argentine. ʼI tona taʼu 19, neʼe kivi fakafokifā ia Gloria, pea neʼe mole toe feala ke sio talu mai ai. ʼI tona taʼu 29, neʼe fakatahi mo te tagata, pea faitama ai. ʼI te temi ʼaia, neʼe ina logoʼi ai kua ʼi ai te faka ʼuhiga ʼo tona maʼuli. Kae, ʼi te temi ʼaē neʼe mate ai tana tamasiʼi, neʼe kamata fai fehuʼi. Neʼe ina fai te ʼu fehuʼi ʼaenī: ‘He koʼe ʼe hoko te meʼa ʼaenī kia ʼau? Koteā te meʼa ʼaē neʼe ʼau fai? ʼE maʼuli moʼoni koa te ʼAtua?’

ʼI te temi ʼaia, neʼe ʼōmai te ʼu Fakamoʼoni ʼa Sehova e lua ki tona ʼapi. Neʼe ina kamata ako te Tohi-Tapu, pea neʼe ina ako ai te fakapapau ʼo ʼuhiga mo he mālama foʼou, ʼaē ʼe toe sio ai anai te kivi. (Isaia 35:5) ʼE ko he ʼamanaki fakatalakitupua kia Gloria! Neʼe fiafia ʼaupito ia Gloria, kae tāfito ʼi te temi ʼaē neʼe tali ai e tona ʼohoana ke nā fakamoʼoni ai ʼi muʼa ʼo te lao ʼe kua nā ʼohoana. Kae neʼe fakaʼī tona ʼohoana, pea neʼe māʼimoa, pea kua nofo ʼi te saliote. Ia ʼaho nei, ʼe tonu ke gāue kinakina te fafine kivi ʼaia ke ina maʼu te ʼu meʼa ʼaē ʼe ʼaoga ki tonā maʼuli. ʼO hilifaki kiai, ʼe ina fai te ʼu gāue fuli ʼo te loto fale, pea mo tokaga ki te ʼu meʼa ʼaē ʼe ʼaoga ki tona ʼohoana. Kae, ʼe fakavikiviki ia Gloria kia Sehova! ʼAki te tokoni ʼo tona ʼu tēhina mo tuagaʼane Kilisitiano, ʼe ina ako te Tohi-Tapu ʼaē neʼe fai maʼa te kau kivi, pea ʼe lahi ʼaupito te ʼu fakaloto mālohiʼi ʼaē ʼe ina maʼu ʼi te ʼu fono faka Kilisitiano ʼaē ʼe fai ʼi te Fale ʼo te Puleʼaga. ʼE ina ʼui fēnei: “ ʼE faigataʼa taku fakamahino te faʼahi ʼaia, kae logope la ʼe ʼau kivi, kae ʼe hage ia ʼe feala ke ʼau sio.”

ʼI ʼihi temi, ʼe fakatagaʼi te hahaʼi ʼi tanatou fakavikiviki ki te ʼAtua. Ko te fafine ʼi Croatie, neʼe fiafia ʼi te meʼa ʼaē neʼe ina ako ʼo ʼuhiga mo te ʼAtua, kae neʼe fakafeagai tona ʼohoana ki tana lotu foʼou pea neʼe ina kapu ia ia, ʼo ina ʼave mo ia tona ʼofafine ʼaē neʼe kua taʼu katoa. ʼI tana ʼalu ʼi te ala, mo te kua līaki ʼo ia e tona ʼohoana pea mo tona famili, te mole kei ʼi ai ʼo hona ʼapi, mo hana gāue, pea mole kei sio ki tana kiʼi taʼahine, neʼe ʼuluaki lotomamahi te fafine ʼaia. Kae ko tana ʼofa ʼaē kia Sehova neʼe tokoni kia ia, logope la neʼe faka tuʼakoi tana felogoi mo tana taʼahine, ʼo aʼu ki tona lahi. Neʼe kua maʼu e te fafine ʼaia te “mataʼi tofe maʼuhiga lahi” pea ʼe mole ina līaki anai ʼi he temi. (Mateo 13:45, 46) Neʼe ina taupau feafeaʼi tona fiafia logope la te ʼu temi faigataʼa ʼaia? ʼE ina ʼui fēnei: “Ko te fiafia ʼe ko te fua ʼo te laumālie ʼa te ʼAtua. ʼE feala ke tou maʼu te fiafia tatau aipe pe koteā te ʼu fihifihia ʼaē ʼe feala ke hoko, ohage pe ko te tuputupu ʼo te ʼu ʼakau ʼi he potu ʼe fakahomo ai te ʼu ʼakau, tatau aipe peʼe feafeaʼi te temi.”

ʼI Finilani, ko Markus, ʼi tona taʼu ono, neʼe maʼu te mahaki ʼi tona ivi, pea neʼe mole feala ke faitoʼo. ʼO mole fualoa, pea neʼe nofo ʼi tona saliote. Hili kiai ni ʼu taʼu, neʼe ʼave ia ia e tana faʼe ki te tagata Pentecôtiste, ʼaē neʼe ʼiloa ʼe ko he tagata ʼe ina fakamālōlō te kau mahaki. Kae neʼe mole ʼi ai he fakamālōlō faka milakulo kia Markus. Koia neʼe mole kei tui ia Markus ki te ʼAtua, pea neʼe hoko atu tana ako ʼi te ʼu meʼa fakapoto lalahi pea mo te tahi ʼu meʼa ʼo te mālama. Hili kiai lagi māhina e nima, pea ʼalu age ki te ʼapi ʼo Markus te fafine ʼi tona saliote pea mo te tūpulaga. Neʼe ko te ʼu Fakamoʼoni ʼa Sehova. ʼI te temi ʼaia, neʼe mole kei tui ia Markus ki te ʼAtua, kae neʼe mole fakafisi ia ki he fai palalau ʼo ʼuhiga mo te lotu, pea neʼe ina fakaafe ia nāua ke nā fehūhi age ki fale.

Ki muli age, neʼe ʼaʼahi ia ia e te taumatuʼa, pea neʼe kamata ai te ako Tohi-Tapu. Moʼo fakaʼosi, neʼe fetogi e te mālohi ʼo te moʼoni ʼa te Tohi-Tapu te manatu ʼa Markus, pea neʼe mahino ai kia ia, logope la tona mahaki, kae neʼe ina maʼu te ʼu tupuʼaga moʼoni ke ina fakavikiviki te ʼAtua. Neʼe ina ʼui fēnei: “ ʼE ʼau fiafia ʼaupito he kua ʼau maʼu te moʼoni pea mo te kautahi ʼaē ʼe fakaʼaogaʼi e Sehova. Kua ʼau maʼu he takitaki pea mo he faka ʼuhiga ʼo toku maʼuli. Kua maʼu te tahi ōvi ʼaē neʼe puli, pea ʼe mole fia mavae anai mai te faga ōvi ʼa te ʼAtua!”​—Vakaʼi ia Mateo 10:6.

Ia Tatou Fuli Ke Tou “Fakavikiviki Kia Sah”

Ko te ʼu fakamatala ʼaia ʼe nātou fakahā ko te hahaʼi ia ʼaho nei, tatau aipe pe koteā tonatou ʼaluʼaga, kae ʼe nātou maʼu he ʼu tupuʼaga ke nātou fakavikiviki ki te ʼAtua. Neʼe fakamahino e te ʼapositolo ko Paulo te faʼahi ʼaia, ʼi tana ʼui fēnei: “Ko te pipiki ki te ʼAtua ʼe ʼaoga ia kia meʼa fuli, koteʼuhi heʼe ina maʼu te fakapapau ʼo te maʼuli ʼaenī pea mo te maʼuli ʼaē ka haʼu.” (1 Timoteo 4:8) Kapau ʼe tou fai te finegalo ʼo te ʼAtua, pea ʼe ina fakahoko anai te “fakapapau ʼo te maʼuli ʼaenī.” ʼE mahino ia, ʼe mole ina fakaliliu anai, ʼi te tuʼu ʼo te ʼu faʼahiga meʼa ʼaenī, ia ia ʼaē ʼe masiva ke koloaʼia, peʼe ina fakamālōlō anai ia ia ʼaē ʼe mahaki. Kae, ʼe ina foaki tona laumālie kia nātou ʼaē ʼe nātou tauhi kia te ia, ke nātou maʼu ai te fiafia pea mo te maʼuli faka feʼauga, tatau aipe tonatou ʼu ʼaluʼaga takitokotahi. Ei, māʼiape la ʼi “te maʼuli ʼaenī,” ko ia ʼaē ʼe mahaki, ia ia ʼaē ʼe lotomamahi, pea mo ia ʼaē ʼe masiva, ʼe nātou maʼu he ʼu tupuʼaga ke nātou fakavikiviki ki te ʼAtua.

Kae e feafeaʼi ʼo ʼuhiga mo te maʼuli ʼaē “ka haʼu”? Ko te manatu ki te faʼahi ʼaia, ʼe tonu ke ina uga tatou ke tou fakavikiviki ki te ʼAtua, ʼaki he fiafia lahi! ʼE tou fiafia ʼi tatatou manatu ki te temi ʼaia, ʼaē ʼe mole tou toe sisio anai ki te masiva; te temi ʼaē “ ʼe mole he tahi ʼe ina toe ʼui anai: ‘ ʼE ʼau mahaki’ ”; pea mo te temi ʼaē ka “holoholoʼi anai [e Sehova ʼAtua] te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.” (Isaia 33:24; Fakahā 21:​3, 4; Pesalemo 72:16) Koteā takotou manatu ʼo ʼuhiga mo te ʼu fakapapau ʼaia mai te ʼAtua?

Neʼe tali e te talavou ʼi El Salvador te kiʼi pepa lotu ʼe ina fakamahino te ʼu manatu ʼaia. Neʼe ina ʼui fēnei ki te Fakamoʼoni ʼa Sehova ʼaē neʼe ina tuku age te kiʼi pepa lotu: “Ko te meʼa ʼaē ʼe ʼui e te kiʼi pepa lotu ʼaenī, ʼe matalelei fau ke feala ai he ʼui ʼe moʼoni.” Tokolahi ʼe nātou manatu feiā. Kae, ko te ʼu fakapapau ʼaia, ʼe haʼu mai ia Ia ʼaē neʼe ina fakatupu te ʼatulaulau, ia ia ʼaē neʼe ina fakatuʼutuʼu te ʼu meʼa kehekehe ʼaē ʼe maʼuli ʼi totatou kele, pea mo tokoni kia ia ʼaē ʼe masiva pea mo ia ʼaē ʼe mahaki ke nātou maʼu te fiafia. ʼE feala ke tou tui ki te ʼu meʼa ʼaē ʼe ina ʼui. Ko te tūpulaga ʼaē neʼe tou talanoa ki ai ʼi ʼoluga, neʼe ina ako te Tohi-Tapu mo te kau Fakamoʼoni ʼa Sehova, pea neʼe mahino ai kia ia ko te moʼoni ʼaia. Kapau mole heʼeki koutou ako, ʼe mātou fakaloto mālohiʼi koutou ke koutou fai te faʼahi ʼaia. Koia, ʼe mātou fakaʼamu ke koutou hū ki te mālama foʼou mokā molehi anai te tuʼu ʼo te ʼu faʼahiga meʼa ʼaenī, pea mo te temi ʼaē ka fakatahi ai te ʼu meʼa fuli ʼaē neʼe fakatupu, ʼo nātou kalagaʼi fakatahi: “Aleluia!” “Koutou fakavikiviki kia Sah!”​—Pesalemo 112:1; 135:⁠1.

[Nota ʼi te lalo pasina]

[Paki ʼo te pasina 5]

ʼE mātou fakaʼamu ke koutou maʼuʼuli ʼi te temi ʼaē ka kalagaʼi fakatahi ai e te ʼu meʼa fuli ʼaē neʼe fakatupu: “Aleluia!”