Moka Mole Kei Ke Lava Katakiʼi Te Maʼuli

ʼE ui fenei e Adriana mai Pelesile: “Neʼe au lototuʼania mo lotovaivai tuʼumaʼu pe. Koia ʼae neʼe kua au fia mate ai.”

NEʼE KUA ke fia puleʼi koa tou maʼuli ʼuhi ko te lahi fau ʼo tau lotomamahi? Neʼe lagi ke manatu tahi mo Adriana. Neʼe lotovaivai ʼi te temi fuli pe.

Neʼe tokaga ia Kaoru mai Saponia ki ʼana matuʼā kua vaivavai mo mahamahaki. ʼE ina ui fenei: “ ʼI te temi ʼaia, neʼe toe lahi mo ʼaku gaue neʼe tonu ke au fakahoko. Neʼe mole kei au iloʼi pe ʼe au haga kifea. Neʼe puli taku fia kai pea neʼe mole kei au moe lelei. Neʼe au kamata manatu ai, ʼe lagi lelei pe ke au mate.”

ʼE fakamatala fenei e Ojebode mai te fenua ʼo Nigéria: “Neʼe au tau tagi he neʼe au lotomamahi tuʼumaʼu. Pea neʼe au kumi ke au fakamate.” ʼE ko he logo fakafiafia he neʼe mole he tahi ia Ojebode mo Kaoru pea mo Adriana neʼe fakamate. Kae ʼe lau ko te toko teau afe tupu hahaʼi ʼe fakamate ʼi te taʼu fuli.

HE TOKONIʼAGA ʼE LELEI

ʼE kaugā malie age te hahaʼi tagata ʼe fakamate koteʼuhi ʼe natou ufiufi ʼi te kumi tokoni ki he tahi. Neʼe ui e Sesu ʼe ʼaoga he toketa ki te kau mahahaki. (Luka 5:31) Kapau ʼe ke lotomamahi mo lotovaivai pea ʼe ke fia puleʼi tou maʼuli, ʼaua naʼa ke ufiufi ʼi te kole tokoni. Neʼe maʼu e te tokolahi honatou fimalie ʼi te ʼu faitoʼo, ohage la ko Ojebode, Kaoru mo Adriana. Neʼe tokoni age te ʼu toketa pea ʼe kua natou lelei leva ʼi te temi nei.

Ka lotomamahi he tahi, ʼe feala ke ʼavage e te toketa hona ʼu faitoʼo. Pea ʼe toe feala pe ke faipalalau mo faitokoni age te toketa ki ai. Ko te fakaʼamu ʼo he tahi ʼe lotomamahi ke lotomahino, ke tokaga age mo ʼofa ʼona kaumeʼa mo kaiga ki ai. Kae ko tona kaumeʼa ʼae ʼe feala ke falala tuʼumaʼu ki ai ʼe ko Sehova ʼAtua. ʼE ina foaki he tokoni ʼe maʼuhiga ʼaupito ʼaki tana Folafola, te Tohi-Tapu.

ʼE ʼI AI KOA HE PULEʼAKI ʼE TOLOGA?

ʼE ʼaoga he temi fualoa ki te faitoʼo ʼo he tahi ʼe lotomamahi. Pea ʼe ʼi ai ʼana agamahani ʼe tonu ke fetogi. Kae kapau ʼe ke lotomamahi ʼe feala ke ke maʼu he ʼamanaki ʼo he ka haʼu fiafia. Ko te ʼamanaki ʼaia ʼe maʼu e Ojebode: “ ʼE au fakatalitali ki te hoko ʼo te lea fakapolofeta ʼae ʼe tohi ia Esaia 33:24. ʼE mole toe ui anai e he tahi: ‘E au mahaki.’ ” Ohage ko Ojebode, falala ki te fakapapau ʼa te ʼAtua ʼo he “kele foʼou” kua puli ai te “mamahi.” (Fakaha 21:1, 4) ʼE mole toe ʼi ai anai he tahi ʼe lotomamahi mo lotovaivai. ʼE mole kei ke “manatu” anai ki ʼou mamahi he kua puli ia ʼo talu ai.—Esaia 65:17.

He ʼu Vaega Fakatohi-tapu ʼe ʼAoga

ʼE lotomahino ia te ʼAtua.

“Ko au ko [“Sehova,” MN] tou Atua, ae e ina fakamalohii tou nima matau, ae e ui atu kia koe: Aua naa ke mataku ki he mea, e au hau o tokoni kia koe.” —Esaia 41:13.

Ko Sehova tokotahi pe ʼe feala ke mahino katoa ki he tahi pea ʼe fia tokoni ki ai.

Metitasio ki te Folafola ʼa te ʼAtua.

‘Neʼe kole ai e Elia ke mate ʼo ui: “Kua feauga! [Sehova], too atu nei toku mauli.” ’—1 Hau 19:4.

Neʼe ʼaoga kia Ojebode ia te metitasio ki te Folafola ʼa te ʼAtua. Neʼe hoki mahino ai neʼe toe hage pe te polofeta ko Elia ko ia.

Taʼofi ni ako mai te ʼu faʼifaʼitaki ʼo te Tohi-Tapu.

“Neʼe au [Sesu] hufakiʼi koe [Petelo], ke ʼaua naʼa vaivai tau tui.”—Luka 22:32.

Neʼe lotomamahi ʼaupito ia te apositolo ko Petelo ʼi tana fakafisi tuʼa tolu ʼae kia Sesu pea neʼe tagi mamahi ai. ʼE ui e Kaoru: “Neʼe au mahino ʼaki te faʼifaʼitaki ʼa Petelo neʼe mole puli he meʼa kia Sehova mo Sesu. Neʼe nā sisio tokolua ki te loto ʼo Petelo. ʼE ko he manatu ia neʼe ina fakalotomalohiʼi au.”

ʼE mole kei ke “manatu” anai ki ʼou mamahi he kua puli ia ʼo talu ai. —Esaia 65:17