ʼE Koutou Faʼa Kātaki Koa?
1 “E mole lahiʼage toku fiafia ki niʼihiʼage mea i te mea aeni, i taku logo e mauli aku fanau i te mooni.” (3 Soane 4) Neʼe fiafia ʼaupito ia Soane ʼuhi ko te faʼa kātaki ʼa tana fānau fakalaumālie. ʼE ko he meʼa fakafiafia ki tatatou Tāmai ʼe ʼi selo, tana sio ki te lauʼi miliona hahaʼi ʼaē ka liliu ko tana fānau, “e [nātou] mauli . . . i te mooni”!—Taag. 23:15, 16; 27:11.
2 Logola ko te hahaʼi ʼa te ʼAtua ʼi tonatou ʼuhiga kautahi ʼe nātou kātaki ʼi tanatou faʼafai te gāue faka Kilisitiano, kae ko ʼihi Kilisitiano ʼaki te temi kua nātou vaivavai. Logola ko te kau Kilisitiano ʼaia neʼe nātou mālolohi ʼi tanatou ʼuluaki ako te moʼoni, kae ʼi te temi nei kua tahitahiga tanatou kau ki te gāue ʼaē ko te fai ʼo he ʼu tisipulo.
3 ʼE tou mahino ai pe koʼe kua vaivai ʼihi ʼi tanatou minisitelio, ʼuhi kua vaivai tonatou sino pea kua nātou matutuʼa. Kae ʼe tonu ke tou vikiʼi nātou ʼo ʼuhiga mo tanatou faʼa kātaki. ʼE nātou fai te ʼu meʼa ʼaē ʼe nātou lavaʼi. Kae kia tatou takitokotahi ʼaē kua foaki totatou maʼuli ki te ʼAtua, ʼe tonu ke tou fai te fehuʼi ʼaenī: ‘Kua ʼau tokaga fau koa ki te ʼu meʼa ʼaē ʼe aʼu manako kiai, ʼo mole kei faʼa maʼuhiga ʼi toku loto te ʼu gāue ʼo te Puleʼaga? Kua ʼau liliu koa ʼo “māmāfana,” peʼe kei ʼau gāue “mālohi”?’ (Apk. 3:15, 16; Luka 13:24) ʼOfa pe ke tou fakakaukauʼi fuli ʼi te faikole pe koteā ʼaē ʼe tou lolotoga fai nei, pea ke tou fai he ʼu fetogi mo kapau ʼe ʼaoga, ʼo tou manatuʼi ʼe fakapapau mai e Sehova ʼe ina foaki mai anai “te kololia, te fakaapaapaʼia, mo te tokalelei: maʼa ia e ina fakahoko te lelei.”—Loma 2:10.
4 E Feafeaʼi Hatatou Faʼa Kātaki: Koteā ʼaē neʼe tokoni kia Sesu ke faʼa kātaki? Neʼe fakamahino fēnei e Paulo: “ ʼUhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hep. 12:1-3, MN ) Ko te fiafia ʼaē neʼe fakapapau age kia Sesu neʼe laka maumau age ia ʼi te ʼu ʼahiʼahiʼi faka temi ʼaē neʼe tonu ke hoko kia te ia. Kapau ʼe tou manatuʼi tuʼumaʼu te fiafia ʼaē neʼe fakapapau mai kia tatou, pea ʼe lava tokoni anai kia tatou ke tou toe faʼa kātaki. (Apk. 21:4, 7; 22:12) Kapau ʼe tou kole kia Sehova ke ina foaki mai te mālohi ʼaki tatatou ako takitokotahi, ʼaki tatatou kau tuʼumaʼu ki te ʼu fono, pea mo tatatou faikole tuʼumaʼu, pea ʼe feala anai ke tou haga faʼa kātaki ʼi te gāue ʼaē neʼe ina tuku mai ke tou fai.
5 ʼE fiafia ia Sehova ʼi te faʼa kātaki ʼo tana ʼu kaugana agatonu. Tou fakatuputupu tana fiafia ʼo tou haga “mauli . . . i te mooni.”