Tou Falala Ki Te Mālohi ʼa Sehova
1 ʼE lahi te ʼu tupuʼaga ʼe tonu ke tou falala ai kia Sehova. ʼE mole ko he gāue faigafua te faka mafola ʼo te logo lelei “ki te kelekele katoa. (Mat. 24:14) Tuʼumaʼu pe ʼe tou tauʼi totatou kakano agahala. (Loma 7:21-23) Tahi ʼaē meʼa, “ko tatatou tau . . . [ʼe fai] ki te kau pule [mālohi makehe] ʼo te fakapōʼuli ʼaenī.” (Ef. 6:11, 12, MN ) ʼE mahino mai, ʼe ʼaoga he tokoni kia tatou. ʼE tou lava maʼu feafeaʼi te mālohi mai ia Sehova?
2 ʼI Te Faikole: ʼE foaki lahi e Sehova tona laumālie maʼoniʼoni pea mo mālohi, ki tana ʼu kaugana ʼaē ʼe nātou kole age. (Lu. 11:13) ʼE koutou matataku koa ʼi te faka mafola ʼi te ʼu ʼapi, ʼi te ala, peʼe ʼi te telefoni? ʼE koutou ufiufi koa ʼi te fagonogono faigamālie? ʼE koutou lotovaivai koa ʼuhi ko te mole fia logo ʼa te hahaʼi ʼo tokotou telituale? E feafeaʼi mo kapau ʼe fai atu he ʼu fakaneke ke koutou līaki takotou tui peʼe ko takotou agatonu? Koutou falala kia Sehova. Koutou faikole ke ina foaki atu tona mālohi.—Filp. 4:13.
3 ʼI Te Ako Takitokotahi: ʼE tou maʼu he mālohi mokā tou kai he meʼa kai fakasino, ʼo toe feiā pe, ʼe tou mālolohi ʼi te faʼahi fakalaumālie mokā tou kai tuʼumaʼu ki te Folafola ʼa te ʼAtua, pea mo te ʼu tohi ʼaē ʼe foaki mai e “te kaugana agatonu mo fakapotopoto.” (Mat. 4:4; 24:45) Neʼe fehuʼi age kia Stanley Jones peʼe koteā ʼaē neʼe tokoni kia ia ke ina kātakiʼi te ʼu taʼu ʼaē neʼe pilisoni tokotahi ai ʼi Siaina ka mole hana Tohi-Tapu, pea neʼe ina tali fēnei: “ ʼE tou lava taupau mālohi tatatou tui. Kae ʼuluaki, ʼe tonu ke tou ako. ʼE mole feala ke tou mālolohi mo kapau ʼe mole tou ako.”
4 ʼI Te ʼu Fono: ʼI te fono faka Kilisitiano ʼo te ʼuluaki sēkulō, ko Suta mo Sila neʼe nā “fakalotomalohiʼi mo fakamalohiʼi . . . te u tehina [“ ʼaki te tuʼuga akonaki,” MN ].” (Gaue 15:32) ʼO toe feiā pe ia ʼaho nei, ko te ʼu akonaki ʼaē ʼe tou logo ʼi te ʼu fono ʼe ina fakaloloto tatatou loto fakafetaʼi kia Sehova, pea mo fakamālohiʼi tatatou tui, pea mo uga tatou ki te minisitelio. ʼAki te ʼu fono ʼe tou felāveʼi tuʼumaʼu ai mo tatatou ʼu “kaugā gāue maʼa te puleʼaga ʼo te ʼAtua,” ʼaē “ko he tokoni ʼe fakaloto mālohi.”—Kol. 4:11, MN.
5 ʼE ʼaoga hatatou tokoni ʼi ‘te ʼu temi faigataʼa ʼo te ʼu ʼaho fakamuli’ ʼaenī. (2 Tim. 3:1) ʼO ʼuhiga mo nātou ʼaē ʼe nātou maʼu te mālohi mai ia Sehova, ʼe ʼui fēnei mai: “ ʼE nātou mahiki ake anai ʼaki he ʼu kapakau, ohage ko te ʼu akuila. ʼE nātou lele anai pea ʼe mole nātou vaivavai anai; ʼe nātou haʼele anai pea ʼe mole nātou gaʼegagaʼe anai.”—Isa. 40:31.