ʼE Feala Koa Ke Kaugamālie Age Ia Tatou ʼe Kamata He Ako Tohi-Tapu?
1 ʼE ʼi ai koa hakotou ako Tohi-Tapu? Kapau ʼe mole ʼi ai hakotou ako, pea ʼe koutou fia fai koa kiai? Neʼe fakahā lelei e Sesu, ʼo hilifaki ki tatatou ʼuluaki fai faka mafola ki te hahaʼi, ʼe tonu ke tou tokoni kia nātou ke nātou tuputupu ʼi te faʼahi fakalaumālie. (Soa. 4:39-42) Tokolahi te ʼu kaugā fai faka mafola ʼe mole heʼeki nātou maʼu te pilivilesio ʼaē ke nātou fai he ako Tohi-Tapu. Ko ʼihi neʼe nātou fai ki muʼa atu, kae ʼi te temi nei ʼe mole kei ʼi ai hanatou ako Tohi-Tapu.
2 Ko te kaupepa lahi “Fakamaʼua” ʼe ko he tokoni lelei ʼaia moʼo kamata ʼo he ʼu ako Tohi-Tapu. ʼE tou lava fakatuʼu ʼuluaki he tafitoʼaga lelei mo kapau ʼe tou fai te ako ki te kaupepa katoa ʼaia. Pea ʼe feala leva ke tou fakahā age te tahi ʼu manatu ʼe feala ke ina ako ʼi te tohi Te ʼAtamai Mālama, ohage ko tona tokoni mai kia tatou ke tou fai.
3 Te Kamata ʼo He Ako Tohi-Tapu: Kapau ʼe tou sio ʼe fia logo te tagata peʼe ko te fafine, pea ʼe mole ʼaoga ke tou mavae ʼi te kua ʼosi tuku age te kaupepa. ʼE feala ke tou kamata atu aipe he ako Tohi-Tapu. ʼE feala ke tou fili he kapite ʼe lelei ʼi te kaupepa. Pea ʼe feala ke tou lau age he fehuʼi ʼe tuʼu ʼi ʼoluga pea mo te ʼu palakalafe ʼaē ʼe ʼalutahi mo te fehuʼi, pea mo vakaʼi pea mo fai palalau ki te ʼu vaega tāfito.
4 ʼO hilifaki ki te ʼu fealagia ʼe tou maʼu ʼi te fai faka mafola, ʼe tou faiga koa ke tou kamata he ʼu ako Tohi-Tapu mo totatou vāhaʼa fale, totatou ʼu kaumeʼa, peʼe ko totatou famili? Tatau aipe pe neʼe kua tou fai te faʼahi ʼaia ki muʼa atu, kae kua tou toe fai koa te faʼahi ʼaia? Kapau ʼe tou fai fehuʼi pea mo tou tokaga ki totatou ʼu kaugā gāue, mo te ʼu kaugā ako, pea mo te kau faiako ʼi te faleako, ʼe feala ke iku māmālie ki he ʼu fai palalau faka Tohi-Tapu pea mo he ʼu ako. Ko he tali ʼe mahino lelei kiai, mo totonu pea mo fakaloto mālohi ʼe feala ke ina fakahā te maʼuhiga ʼo te Tohi-Tapu. ʼE feala ke fai te ako ʼi te temi kai, ʼi te hili ʼo te gāue, ʼi te hili ʼo te ako, peʼe ʼi he temi pe ʼe lelei kiai, koteʼuhi ko te ʼaʼahi ʼaia ʼe mole tonu ke fakalaka ia minuta e 15 peʼe 20.
5 ʼE maʼuhiga ke koutou teuteu. Ka koutou fai he ʼaʼahi, pea ʼe tonu ke koutou ʼiloʼi lelei te ʼu manatu ʼaē ka koutou palalau kiai. Koutou tokaga tāfito peʼe lava iku feafeaʼi takotou ʼu fai palalau ki takotou fakatuʼutuʼu ʼaē ke kamata he ako Tohi-Tapu. ʼE tokoni mai kia tatou ia Gaue 20:35 ke tou leleiʼia te vaevae mo te hahaʼi te meʼa ʼaē ʼe tou maʼu, heʼe tou maʼu ai he fiafia lahi. Tou fakatuʼutuʼu ke tou kau ki te selevisi ʼaia.