Tou Fakahā Te Logo Lelei!
1 Moʼo fakahoko tatatou gāue fai faka mafola pea mo fai ni ʼu tisipulo, ʼe tonu ke tou fakahā te logo lelei ki te hahaʼi. (Mat. 24:14; 28:19, 20) ʼE feala ke faigataʼa māʼia mokā tonu ke tou fakahā ki totatou ʼu kaumeʼa. Koteā ʼaē ka tokoni mai ke fua lelei tatatou fakahā te logo lelei ki te hahaʼi ʼe mole tou feʼiloʼiʼaki?
2 Tou Aga Fakakaumeʼa Mo Te Hahaʼi: Koutou faiga ke koutou mahino ki te hahaʼi ʼaē ʼe koutou felāveʼi mo nātou ʼi te minisitelio. ʼUhi ko te ʼaluʼaga ʼo te malamanei, ʼe mahino kia tatou ʼe lagi mahalohalo te hahaʼi ʼo ʼuhiga mo tatou, peʼe nātou matataku ki te hahaʼi ʼaē ʼe mole nātou ʼiloʼi. ʼE feala ke tāʼofi e te faʼahi ʼaia tatatou fakahā te logo lelei. Koteā ʼaē ʼe feala ke koutou fai ke mole tuʼania te hahaʼi kia koutou? ʼI muʼa ʼo hatatou palalau, ʼe tou fakahā tatatou logo ʼaki tatatou faʼahiga teu fakaʼapaʼapa. Kapau ʼe tou teu lelei pea mo teu fakaʼapaʼapa, pea ʼe puli ai te mataku ʼa te hahaʼi.—1 Tim. 2:9, 10.
3 Ko te tahi faʼahi moʼo fakahā tatatou logo ʼe ko tatatou aga fakakaumeʼa mo te hahaʼi. ʼE mole tuʼania ai te hahaʼi pea mo faigafua ai hanatou fia fakalogo. ʼE tonu ke tou teuteu lelei ki te faʼahi ʼaia. Kapau ʼe tou ʼiloʼi lelei te meʼa ʼaē ka tou palalau kiai, pea ʼe mole tou lotohoha fau. Pea ko te tokalelei ʼaia ʼo totatou ʼatamai ʼe ina uga anai te hahaʼi ke nātou fia logo ki tatatou logo. Neʼe ʼui fēnei e te fafine ʼo ʼuhiga mo te Fakamoʼoni neʼe ina ʼaʼahi ia ia: “Ko te meʼa ʼaē ʼe ʼau manatuʼi ʼo ʼuhiga mo tona fofoga fiafia ʼe ko te tokalelei. Neʼe faikehe kia ʼau.” Neʼe fia logo ai te fafine ki te logo lelei.
4 Te ʼu Kalitate ʼAē ʼe Tupu Ai Te Fia Logo ʼa Te Hahaʼi: ʼE tonu ke tou tokaga moʼoni ki te hahaʼi. (Filp. 2:4) ʼE tou fakahā te faʼahi ʼaia mo kapau ʼe mole ko tatou pe ʼaē ʼe palalau, pea mo kapau ʼe tou fakalogo. ʼE tonu foki ke tou fakalogo ki te ʼu meʼa ʼe nātou ʼui, heʼe kau te faʼahi ʼaia ki tatatou fakahā te logo lelei. Ka tou fakaafe te hahaʼi ke nātou fakahā mai tanatou ʼu manatu pea mo tou fakalogo lelei ki tanatou tali, pea ʼe nātou logoʼi ʼe tou tokagaʼi nātou. Koia ka palalau atu te hahaʼi, ʼaua naʼa koutou faiga fakavilivili ke koutou fai age kia nātou te ʼu palalau ʼaē neʼe kua koutou teuteuʼi. Koutou vikiʼi nātou mo kapau ʼe koutou lava fai moʼoni te faʼahi ʼaia, pea koutou faiga ke koutou faka ʼalutahi takotou ʼu tali mo tanatou ʼu palalau. Kapau ʼe nātou palalau atu ki he faʼahi maʼuhiga, pea koutou fai he ʼu palalau ʼe ʼalutahi mo te ʼu faʼahi ʼaē ʼe nātou tuʼaniaʼi.
5 Ko te agavaivai ʼe ina taupau te felogoi. (Taag. 11:2; Gaue 20:19) Neʼe fia ʼolo te hahaʼi kia Sesu he neʼe “agamalu mo agavaivai.” (Mat. 11:29) Kae ʼe mole fia logo te hahaʼi ki he tahi ʼe fialahi. Koia logola ʼe tou tui papau ʼe tou maʼu te moʼoni, kae ʼaua naʼa tou fialahi ʼi tatatou ʼu palalau.
6 E feafeaʼi mo kapau ʼe mole ʼalutahi te ʼu palalau ʼaē ʼe fai mai e te hahaʼi pea mo te moʼoni ʼaē ʼe tuʼu ʼi te Tohi-Tapu? ʼE tonu koa ke tou fakatonutonuʼi? ʼE feala, kae ʼe mole tou fai ʼi tatatou ʼuluaki fai palalau mo nātou. ʼE lelei age mo kapau ʼe tou talanoa ki he manatu ʼe tou felogoi tahi ai, ʼi muʼa ʼo hatatou vaevae mo nātou te ʼu akonaki ʼo te Tohi-Tapu, ʼaē ʼe feala ke faigataʼa tanatou tali. ʼE maʼua ke tou faʼa kātaki pea mo fakaʼeteʼete. Neʼe tuku e Paulo te faʼifaʼitaki lelei ʼi te faʼahi ʼaia ʼi tana faka mafola ki te kau tuʼi fakamāu ʼi te Aleopasi.—Gaue 17:18, 22-31.
7 Ko te ʼofa ʼe ko te faʼahi tāfito ʼaē ka tokoni anai kia tatou ke tou tala fakalelei te logo. Ohage ko Sesu, ʼe tou fakaʼofaʼofa ki te hahaʼi ʼaē ʼe nātou “ ʼāhua pea mo mavetevete, ohage he faga ōvi ʼe mole honatou tagata tauhi.” (Mat. 9:36, MN ) ʼE uga tatou e te faʼahi ʼaia ke tou fakahā kia nātou te logo lelei pea mo tokoni kia nātou ke nātou haʼele ʼi te ala ʼo te maʼuli. Ko tatatou logo ʼe ko he logo ʼo te ʼofa, koia tou haga fakahā ʼaki te ʼofa. Kapau ʼe tou fai feiā, pea ʼe tou faʼifaʼitakiʼi ia Sehova ʼAtua pea mo Sesu Kilisito—te ʼu hahaʼi maʼuhiga ʼaupito ʼi te ʼatulaulau moʼo fakahā mai te ʼu logo.