ʼE Fua Te Gāue ʼo Nātou ʼAē ʼe Māʼimoa
1 Kapau ʼe koutou kau ʼi te tokolahi ʼa te kau Fakamoʼoni ʼa Sehova ʼaē ʼe māʼimoa, ʼe feala pe ke maʼu he fua ʼo takotou minisitelio. ʼI tona fakahagatonu, ko takotou ʼu ʼaluʼaga ʼe lagi ina foaki atu he ʼu faigamālie makehe ke koutou fai faka mafola ai pea mo fakaloto mālohiʼi te hahaʼi.
2 Ko He ʼu Faigamālie Ke Koutou Fai Faka Mafola: Tokolahi ia nātou ʼaē ʼe tonu ke nātou kātakiʼi tanatou māʼimoa, ʼe nātou kau lahi ki te minisitelio. Ohage la ko te tuagaʼane, ʼi te ʼosi ʼo tana tafa, neʼe ko te koga ʼo tona sino neʼe palalisia pea neʼe mole kei feala ke palalau lelei, kae neʼe feala pe ke kau ki te tufa ʼo te ʼu nusipepa mo kapau neʼe tau e tona ʼohoana tanā motokā ʼi he ala ʼe lahi ai te feʼoloʼaki ʼa te hahaʼi. ʼI te tahi lakaga, neʼe ina tufa te ʼu nusipepa e 80 ia hola pe e lua! Ko takotou ʼaluʼaga makehe ʼaia ʼe ko he faigamālie ke koutou fai palalau mo he ʼu hahaʼi ʼe faigataʼa te maʼu atu kiō nātou. Kapau koia, pea koutou fakaliliu te ʼu koga meʼa ʼaia ko hakotou telituale makehe.
3 ʼE feala ke fua lelei ʼaupito takotou fai faka mafola! Ka tokagaʼi e te hahaʼi takotou lotomālohi pea mo te fua lelei ʼa te Tohi-Tapu ki tokotou maʼuli, pea ʼe feala ke nātou fia logo ai ki te logo ʼo te Puleʼaga. Tahi ʼaē meʼa, ka koutou felāveʼi mo he ʼu hahaʼi ʼe nātou lotomamahi, ʼe feala ke koutou foaki kia nātou te fakaloto fīmālie mai te Folafola ʼa te ʼAtua, he neʼe koutou felāveʼi mo te faʼahi ʼaia.—2 Ko. 1:4.
4 Koutou Fakaloto Mālohi Te Hahaʼi: ʼE mahino ia ʼe fakaloto mālohiʼi koutou e te fakamatala ʼo te maʼuli ʼo Laurel Nisbet, ʼaē neʼe nofo ʼi tona foʼi masini ukamea ia taʼu e 37, kae neʼe lava tokoni kia hahaʼi e toko 17 ke nātou maʼu te ʼatamai mālama ʼo te moʼoni ʼo te Tohi-Tapu. ʼO toe feiā pe, ko takotou faʼifaʼitaki ʼe feala ke malave ki te ʼu tēhina mo tuagaʼane ke nātou kau mo nātou ki te selevisi kia Sehova.—g93 22/1 ʼi te pasina 18 ki te 21.
5 Tatau aipe peʼe mole feala ke lahi takotou kau ki te minisitelio ohage ko te meʼa ʼaē ʼe koutou loto kiai, ʼuhi ko takotou māʼimoa, kae ʼe feala pe ke koutou fakaloto mālohiʼi te hahaʼi. Neʼe ʼui fēnei e te tēhina: “Neʼe ʼau ʼiloʼi māʼia mo he tahi ʼe māʼimoa ʼe feala ke tokoni lahi ki te hahaʼi. Ko ʼau mo toku ʼohoana neʼe ma tokoni ki te ʼu hahaʼi kehekehe ʼi te kokelekasio. ʼUhi ko tomā ʼu ʼaluʼaga, ʼe ma maʼu tuʼumaʼu pe he temi moʼo palalau mo ʼihi.” Kae ʼuhi ko takotou māʼimoa, ʼe mahino ia ʼe mole feala tuʼumaʼu ke koutou mulimuli ki takotou faʼafai. Kae ʼaki te tokoni ʼa ʼihi kia koutou, ʼe feala ke koutou kau lahi ki te minisitelio. Koia, kapau ʼe ʼaoga ke tokoni atu he tahi, koutou fakahā te faʼahi ʼaia ki te kau tagata ʼāfea peʼe ko ʼihi ʼi te kokelekasio ʼe feala ke tokoni atu.
6 ʼE sio ia Sehova kia meʼa fuli pe ʼaē ʼe koutou fai moʼo tauhi kia te ia, pea ʼe fiafia ʼi takotou tauhi ʼaē kia te ia ʼaki tokotou nefesi katoa. (Pes. 139:1-4) Kapau ʼe koutou falala kia te ia, pea ʼe ina foaki atu anai te mālohi ke ʼi ai he fua ʼo takotou minisitelio.—2 Ko. 12:7-10.