ʼE ʼi Ai Koa Hakotou “Tala ʼi Te Kakano”?
1 ʼE tou loto moʼoni ke tou fakahoko totatou maʼua ʼaē ko te faka mafola ʼo te logo lelei ʼaki tatatou ʼu fealagia fuli. Kae ʼe tokolahi totatou ʼu tēhina mo tuagaʼane, ʼe faigataʼa kia nātou tanatou fakahoko katoa te faʼahi ʼaia heʼe nātou mahamahaki peʼe nātou māʼimoa, ʼo mole feala ai hanatou fai ia meʼa fuli ʼaē ʼe nātou fakaʼamu ke nātou fai. E lagi faigataʼa ʼaupito kia nātou tanatou tauʼi tanatou lotovaivai, pea tāfito mokā nātou sisio ki ʼihi ʼe lahi tanatou fai faka mafola.—1 Ko. 9:16.
2 Ko He Faʼifaʼitaki Ke Tou Mulimuli Kiai: Ko te ʼapositolo ko Paulo, neʼe tonu ke ina kātakiʼi “te tala ʼi [tona] kakano.” Neʼe tuʼa tolu tana kole mamahi kia Sehova ke ina pulihi te fihifihia ʼaia, ʼaē neʼe hage kia ia ko he “ ʼaselo ʼa Satana” ʼaē neʼe ina fakamamahiʼi tuʼumaʼu ia ia. Kae logope la te faʼahi ʼaia, neʼe kātaki aipe ia Paulo pea neʼe gāue mālohi ʼi tona minisitelio. Neʼe mole lāuga peʼe meo tuʼumaʼu, kae neʼe ina fai te meʼa ʼaē neʼe ina lavaʼi. Ko te tupuʼaga ʼo tona lava kātakiʼi tona mamahi ʼe maʼu ʼi te fakaloto mālohi ʼaenī ʼaē neʼe fai e te ʼAtua kia ia: “Ko toku ʼofa makehe ʼe feʼauga kia koe; heʼe ko toku mālohi ʼe lolotoga fakaliliu ʼo haohaoa ʼi te vaivai.” Ko te vaivaiʼaga ʼo Paulo neʼe liliu ko hana mālohi, he neʼe ina tali lelei tona ʼaluʼaga pea neʼe falala kia Sehova pea mo tona laumālie maʼoniʼoni ke feala hana faʼa kātaki.—2 Ko. 12:7-10.
3 Te Meʼa ʼAē ʼe Feala Ke Koutou Fai Ke Koutou Faʼa Kātaki: ʼE faka tuʼakoi koa takotou tauhi ki te ʼAtua ʼuhi ko tokotou ʼaluʼaga fakasino? Kapau koia ʼaia, pea koutou faʼifaʼitakiʼi te faʼahiga manatu ʼa Paulo. Tatau aipe peʼe mole he faitoʼo moʼoni ʼo tokotou mahaki ʼi te mālama ʼaenī, kae ʼe feala hakotou falala katoa kia Sehova ʼaē ʼe ina ʼiloʼi te ʼu meʼa ʼaē ʼe ʼaoga kia koutou, pea ʼe ina foaki atu anai kia koutou “te mālohi ʼaē ʼe laka age ʼi te mālohi māhani.” (2 Ko. 4:7) Koutou fakaʼaogaʼi te ʼu tokoni fuli ʼaē ʼe fai atu kia koutou ʼi te kokelekasio, kae ʼaua naʼa koutou fakamamaʼo ʼi te ʼu tēhina pea mo te ʼu tuagaʼane. (Taag. 18:1) Kapau ʼe faigataʼa kia koutou te fai faka mafola ʼi te ʼu ʼapi, koutou kumi he ʼu faʼahiga ʼaluʼaga ʼe feala ai ke koutou fai te fagonogono faigamālie peʼe koutou fai ʼi te telefoni.
4 Tatau aipe peʼe ʼi ai he tala ʼi takotou kakano ʼe ina tāʼofi koutou ʼi tokotou minisitelio, kae ʼe mole tonu ke koutou manatu ʼe mole koutou kau moʼoni ki te gāue ʼaia. Ohage ko Paulo, ʼe toe feala foki mo koutou ke koutou “fai he fakamoʼoni katoa ki te logo lelei ʼo te ʼofa makehe ʼo te ʼAtua,” ʼo koutou fai pe ki te ʼu meʼa ʼe koutou lavaʼi. (Gāue 20:24) ʼAua naʼa galo kia koutou, kapau ʼe koutou faiga mālohi ke koutou kau ki te minisitelio, pea ʼe leleiʼia e Sehova te faʼahi ʼaia.—Hep. 6:10.