ʼE Tou Kātakiʼi ‘He Tala ʼi Te Kakano’

“E feauga mo koe toku [“ ʼofa makehe,” MN ].”—2 Kolonito 12:9.

1, 2. (a) He koʼe ʼe mole tonu ke tou tuku te ʼu ʼahiʼahi pea mo te ʼu fihifihia ke nātou taʼomia ia tatou? (b) He koʼe ʼe tou lava falala logope la te ʼu ʼahiʼahi?

“KO NĀTOU fuli ʼaē ʼe fia maʼuli ʼaki te aga faka lotu ʼi te lototahi mo Kilisito Sesu ʼe toe fakatagaʼi anai mo nātou.” (2 Timoteo 3:12, MN ) Koteā tona tupuʼaga? Koteʼuhi ʼe ʼui e Satana ko te tagata ʼe tauhi ki te ʼAtua mokā ʼe maʼuli fīmālie, pea ʼe ina faiga ʼaupito ke ina fakahā ʼe moʼoni tana manatu ʼaia. Neʼe fai e Sesu te fakatokaga ʼaenī ki tana kau ʼapositolo agatonu: “Koeni Satana e lauga mamahi o uhiga mo koutou ke ina lulu koutou o hage ko te tami o te fulumeto.” (Luka 22:31) Neʼe ʼiloʼi lelei e Sesu neʼe fakagafua e te ʼAtua kia Satana ke ina ʼahiʼahiʼi tatou ʼaki he ʼu faʼahiga fihifihia kehekehe. Kae ʼaua leva naʼa tou ʼui ko te ʼu fihifihia fuli ʼaē ʼe hoko kia tatou ʼe haʼu mai ia Satana pea mo tana kau temonio. (Tagata Tānaki 9:11) Kae ko Satana ʼaki te ʼu fihifihia ʼaē ʼe hoko kia tatou ʼe ina faigaʼi ai leva ke ina maumauʼi tatatou agatonu.

² ʼE fakahā mai e te Tohi-Tapu ʼe mole tonu ke tou tuku totatou ʼu faigataʼaʼia ke nātou taʼomia ia tatou. Kae tatau aipe pe koteā te meʼa ʼaē ʼe hoko, ʼaua naʼa tou punamaʼuli peʼe tou feʼekeʼaki. (1 Petelo 4:12) ʼI te agamāhani, “ko te ʼu meʼa ʼaia ʼo ʼuhiga mo te ʼu mamahi ʼe hoko ki te famili katoa ʼo [totatou] ʼu tēhina ʼi te malamanei.” (1 Petelo 5:9, MN ) Ia ʼaho nei, ʼe fakamamahiʼi lahi e Satana ia te ʼu kaugana fuli ʼa te ʼAtua. ʼE fiafia ia te Tevolo ʼi tana sio ifo ʼe tou mamahi ʼuhi ko te ʼu tuʼuga fihifihia ʼaia ʼaē ʼe hage ko he ʼu tala. Moʼo fakahoko ia te faʼahi ʼaia, ʼe ina fakaʼaogaʼi tana ʼu faʼahiga meʼa ʼo te tuʼu ʼaenī moʼo fakaʼāsili peʼe fakalahi he ‘faʼahiga mamahi ʼi totatou kakano.’ (2 Kolonito 12:7) Kae ʼe mole tonu ke maumauʼi tatatou agatonu e te ʼu fakafeagai ʼa Satana. Ko Sehova ʼe ina foaki mai anai “te faigamalie ke [tou] hao” moʼo kātakiʼi ia te fakahala, pea ʼe toe feiā anai mo kapau ʼe tou tau mo he ʼu mamahi ʼi totatou kakano.—1 Kolonito 10:13.

ʼE Tou Lava Tekeʼi Feafeaʼi He Tala

3. Neʼe koteā te tali ʼa Sehova ʼi te kole age e Paulo ke ina toʼo te tala ʼi tona kakano?

³ Neʼe kole e te ʼapositolo ko Paulo ke toʼo e te ʼAtua ia te tala ʼi tona kakano. “O uhiga mo te mea aeni, nee au faikole tua tolu ki te Aliki ke ina fakamamao maia te au.” Neʼe koteā te tali ʼa Sehova ki te fakakolekole ʼaia ʼa Paulo? “E feauga mo koe toku [“ ʼofa makehe, MN ], io, e katoa te gaue o toku mafimafi i te vaivai.” (2 Kolonito 12:8, 9) Tou vakaʼi muʼa ia te tali ʼaia peʼe lava tokoni feafeaʼi kia tatou ke tou tauʼi te ʼu faʼahiga mamahi ʼaē ʼe tau mo tatou.

4. Ko te ʼu ʼaluʼaga fea ʼaē neʼe maʼu ai e Paulo te ʼofa makehe ʼo Sehova?

⁴ Koutou fakatokagaʼi neʼe fakaloto mālohiʼi e te ʼAtua ia Paulo ke fakafetaʼi ki te ʼofa makehe ʼaē neʼe kua ina foaki age kia ia ʼaki ia Kilisito. Ei, neʼe kua lahi te ʼu tapuakina ʼaē neʼe maʼu e Paulo. Heʼe ko Sehova neʼe ina faka fealagia ʼaki he loto ʼofa ke liliu ko tana tisipulo, logola ia tana fakafeagai mālohi ki te ʼu tisipulo ʼa Sesu. (Gaue 7:58; 8:3; 9:1-4) Koia neʼe lahi te ʼu gāue pea mo te ʼu pilivilesio neʼe foaki age e te ʼAtua kia ia. Pea ʼe tou maʼu te ako lelei mai ai. Tatau aipe mo te ʼu temi faigataʼa ʼaupito, ʼe tou maʼu aipe te ʼu tuʼuga tapuakina pea ʼe tonu ke tou loto fakafetaʼi kiai. ʼE mole tonu ki totatou ʼu fihifihia ke nātou fakagaloʼi kia tatou te finegaloʼofa lahi ʼo Sehova.—Pesalemo 31:19.

5, 6. (a) Neʼe akoʼi feafeaʼi e Sehova kia Paulo ʼe ko te mālohi fakaʼatua ʼe “katoa . . . i te vaivai”? (b) Neʼe fakahā feafeaʼi e Paulo ko Satana ʼe gutuloi?

⁵ Ko te ʼofa makehe ʼo Sehova ʼe feʼauga ʼi te tahi ʼaluʼaga. Ko te mālohi ʼo te ʼAtua ʼe feʼauga moʼo tokoni kia tatou ʼi totatou ʼu ʼahiʼahi. (Efeso 3:20) Neʼe akoʼi e Sehova kia Paulo ko te mālohi fakaʼatua ʼaia ʼe “katoa . . . i te vaivai.” ʼO feafeaʼi? ʼAki he lotoʼofa, neʼe ina foaki kia Paulo te mālohi katoa ʼaē neʼe ʼaoga kia ia moʼo tekeʼi ʼo tona ʼu fihifihia. Pea ʼaki te faʼa kātaki ʼa Paulo pea mo tana falala lahi kia Sehova, neʼe hā ai ki te kau Kilisitiano fuli ko te mālohi ʼo te ʼAtua ʼe mālo ʼi te vaivaiʼaga pea ʼi te tagata agahala. Kae tou vakaʼi peʼe malave feafeaʼi ki te Tevolo ia te faʼahi ʼaia, heʼe ina ʼui ko te hahaʼi ʼe nātou tauhi pe ki te ʼAtua mo kapau ʼe mole ʼi ai honatou ʼu fihifihia pea mo maʼuli fīmālie. Ko te agatonu ʼa Paulo neʼe hage ko he akonakiʼi ʼo te laumālie gutu loi ʼaia!

⁶ ʼI muʼa atu, neʼe gāue ia Paulo kia Satana ʼo ʼuhiga mo tana fakafeagai ki te ʼAtua, he neʼe ko te tagata neʼe ina fakapogi te kau Kilisitiano, neʼe ko te Faliseo tauhi fakamalotoloto pea neʼe maʼu meʼa ʼuhi he neʼe tupu mai te famili maʼu koloā. Kae ʼi te temi leva ʼaia kua kaugana ia Paulo kia Sehova pea mo Kilisito, ohage ko he tahi ʼe “veliveli ʼi te kau ʼapositolo.” (1 Kolonito 15:9, MN ) ʼI tona ʼuhiga ʼaia, neʼe agavaivai ʼo fakalogo ki te takitaki ʼa te kolesi pule ʼo te ʼuluaki sēkulō. Pea neʼe faʼa kātaki ʼo nofo agatonu logope la te tala ʼaē neʼe nofo ʼi tona kakano. Neʼe lagi ʼita ia Satana, heʼe ko te ʼu ʼahiʼahi ʼaē neʼe hoko kia Paulo neʼe mole ina fakavaivaiʼi tana faʼa gāue maʼa te ʼAtua. Neʼe manatuʼi tuʼumaʼu e Paulo tana ʼamanaki ʼaē ʼe kau anai ki te Puleʼaga ʼo Kilisito ʼi selo. (2 Timoteo 2:12; 4:18) Neʼe mole he mamahi neʼe ina lava pulihi ia tana faʼa gāue ki te ʼAtua. ʼOfa pe ke toe mālohi feiā mo tatatou faʼa gāue! ʼI te lagolago mai ʼa Sehova ki totatou ʼu ʼahiʼahi, ʼe ina tuku mai kia tatou te pilivilesio ʼaē ke tou fakahā ko Satana ʼe gutuloi.—Tāʼaga Lea 27:11.

Ko Te ʼu Fakatuʼutuʼu Maʼuhiga ʼa Sehova

7, 8. (a) Koteā te ʼu meʼa ʼaē ʼe fakaʼaogaʼi e Sehova moʼo foaki te mālohi ki tana ʼu kaugana ia ʼaho nei? (b) He koʼe ʼe maʼuhiga ke tou lau te Tohi-Tapu ʼi te ʼaho fuli pea mo ako moʼo kātakiʼi he mamahi ʼi totatou kakano?

⁷ Ia ʼaho nei, ʼe foaki e Sehova te mālohi ki te kau Kilisitiano agatonu ʼaki tona laumālie maʼoniʼoni, mo tana Folafola pea mo totatou famili fakatautehina. ʼE tou lava tuku ohage ko te ʼapositolo ko Paulo ia tatatou ʼu kavega kia Sehova ʼi te faikole. (Pesalemo 55:22) Logola ʼe mole pulihi e te ʼAtua ia totatou ʼu fihifihia, kae ʼe ina lava foaki mai te poto moʼo tauʼi ʼo totatou ʼu fihifihi ʼaia, tatau aipe mokā ʼe faigataʼa ʼaupito. ʼE toe lava tokoni mālohi mai ia Sehova ke tou faʼa kātaki—ʼo ina foaki mai “te mālohi ʼaē ʼe laka age ʼi te mālohi māhani.”—2 Kolonito 4:7, MN.

⁸ ʼE tou maʼu feafeaʼi te taʼi tokoni ʼaia? ʼE tonu ke tou ako tuʼumaʼu te Folafola ʼa te ʼAtua, heʼe feala ai ke tou maʼu tana ʼu tokoni fakaloto fīmālie. (Pesalemo 94:19) ʼI te Tohi-Tapu, ʼe tou maʼu ai te ʼu faikole faka malave loto ʼa te ʼu kaugana ʼa te ʼAtua mokā nātou kole ki te ʼAtua ke tokoni age kia nātou. Ko te ʼu tali ʼa Sehova ʼe feala ke tou metitasioʼi, heʼe tou maʼu ai te ʼu palalau fakaloto fīmālie. Ko te ako ʼo te Folafola ʼa te ʼAtua ʼe ina fakamālohiʼi anai ia tatou, ke liliu “te mālohi ʼaē ʼe laka age ʼi te mālohi māhani, ʼe ko te mālohi ʼo te ʼAtua kae mole ko totatou mālohi.” Ohage pe ko te ʼaoga ʼaē ke tou kai ʼi te faʼahi fakasino ʼi te ʼaho fuli ke tou mālolohi ai, pea ʼe tonu ke tou toe kakai tuʼumaʼu ki te Folafola ʼa te ʼAtua. ʼE tou fai koa te meʼa ʼaia? Kapau ʼe tou fai feiā, pea ʼe tou sio anai ko “te mālohi ʼaē ʼe laka age ʼi te mālohi māhani” ʼe tokoni mai ke tou faʼa kātakiʼi he faʼahiga fihifihia pe ʼe tau mo tatou ʼi te temi nei.

9. ʼE lava tokoniʼi feafeaʼi e te kau tagata ʼāfea ia nātou ʼaē ʼe tau mo te ʼu fihifihia?

⁹ Ko te kau tagata ʼāfea ʼaē ʼe nātou manavasiʼi ki te ʼAtua, ʼe feala ke nātou “liliu ko he nonoʼaga mokā matagi,” pea “ko he holaʼaga mokā afā” ko tona faka ʼuhiga, ko he puipui mokā hoko mai he ʼu mamahi pea mo he ʼu fihifihia. Ko te kau tagata ʼāfea ʼaē ʼe nātou agavaivai pea mo fai fakamalotoloto tanatou gāue ohage ko tona fakahā ʼi te ʼu vaega ʼaia, ʼe nātou kole kia Sehova ke nātou maʼu “te lea ʼo nātou neʼe akoʼi” ke nātou ʼiloʼi peʼe koteā te ʼu palalau lelei ʼaē ke nātou fai ki he tahi ʼe lotomamahi. Ko te ʼu palalau ʼa te kau tagata ʼāfea ʼe feala ke hage ko he mosiʼi ʼua ʼe to ifo pea ʼe ina fakamokomoko tatatou fakakaukau ʼi te ʼu temi faigataʼa ʼo te maʼuli. ʼI tanatou fai te ʼu palalau “fakaloto fīmālie ki te ʼu nefesi ʼaē ʼe lotomamahi,” ʼe tokoni moʼoni te kau tagata ʼāfea ki tonatou ʼu tēhina pea mo tuagaʼane ʼi te moʼoni ʼaē kua lagi gaʼegaʼe peʼe lotovaivai ʼuhi ko tonatou ʼu mamahi ʼi tonatou kakano.—Isaia 32:2; 50:4; 1 Tesalonika 5:14, MN.

10, 11. ʼE lava fakaloto mālohiʼi feafeaʼi e te kau kaugana ʼa te ʼAtua niʼihi ʼe tau mo he ʼu ʼahiʼahi faigataʼa?

¹⁰ ʼE kau fuli te ʼu kaugana ʼa Sehova ki tana foʼi famili faka Kilisitiano logo tahi. Ei “ko tatou taki tokotahi ko he u logoʼagasino e fe’logoʼaki,” pea “ ʼe maʼua ke tou feʼofaʼofani.” (Loma 12:5; 1 Soane 4:11, MN ) ʼE tou fakahoko feafeaʼi te maʼua ʼaia? Ia 1 Petelo 3:8, ʼe tonu ke tou “agalelei, mo ofa ki te u tehina, mo manavaofa, pea mo agavaivai” kia nātou fuli ʼaē ʼe maʼuli tahi mo tatou ʼi te tui. ʼO ʼuhiga mo nātou ʼaē ʼe tau mo he faigataʼaʼia tāfito ʼi te kakano, peʼe ko he tūpulaga peʼe ko he matuʼa, ʼe lava kia tatou fuli ke tou fakahā he tokaga makehe kia nātou ʼaia. ʼO feafeaʼi?

¹¹ ʼE tonu ke tou faiga ke tou mahino ki te ʼu meʼa ʼaē ʼe nātou mamahi ai. Kapau ʼe tou aga fefeka fau, peʼe mole tou tokakaga age kia nātou, pea ʼe feala pe ke tou fakaʼāsili tonatou ʼu mamahi. Kapau ʼe tou ʼiloʼi tonatou ʼu mamahi, pea ʼe tokoni anai kia tatou ke tou tokakaga ki te ʼu palalau ʼaē ka tou fai age, peʼe feafeaʼi hakita fai age te ʼu palalau ʼaia, pea mo te aga ʼaē ke tou fai. Ko te ʼaoga ʼo tatatou ʼu palalau pea mo fakaloto mālohi, ʼe tokoni anai ki te fakasiʼisiʼi ʼo ʼihi mamahi ʼe tau mo nātou. Kapau ʼe tou fai feiā, pea ʼe tou liliu ai ko he tokoni fakaloto mālohi kia nātou.—Kolose 4:11.

Neʼe Tauʼi Feafeaʼi e ʼIhi Kau Agatonu?

12-14. (a) Koteā ʼaē neʼe fai e te tuagaʼane moʼo kātakiʼi tona kosea? (b) Neʼe koteā te ʼu tokoni pea mo te ʼu fakaloto mālohiʼi neʼe ina maʼu mai tona ʼu tēhina mo tuagaʼane fakalaumālie?

¹² ʼI tatatou kua fakaōvi ki te fakaʼosi ʼo te ʼu ʼaho fakamuli, kua ʼāsili tuputupu ʼi te ʼaho fuli ia “te ʼu nunuʼa ʼo te tuʼania.” (Mateo 24:8, MN ) Koia, ʼe lagi hoko he ʼu ʼahiʼahi ki te hahaʼi fuli ʼi te malamanei katoa, kae tāfito te ʼu kaugana agatonu ʼa Sehova ʼaē ʼe nātou fia fai tona finegalo. Ohage la, koutou fakatokagaʼi te tuagaʼane neʼe gāue temi katoa ʼi te minisitelio. Neʼe ʼi ai tona kosea pea neʼe tonu ke tafa moʼo toʼo tona ʼu glandes salivaires pea mo tona ʼu ganglions lymphatiques. ʼI tana ʼiloʼi mo tona ʼohoana ia tona mahaki, neʼe nā foimo faikole loaloaga kia Sehova ke tokoni age kia nāua. Ki muli age, neʼe ina ʼui neʼe nā logoʼi aipe te fīmālie makehe ʼi tonā ʼu loto. Pea neʼe lahi ʼaupito te ʼu temi neʼe ina ʼutakiʼi ai tona ʼu mamahi, tāfito la tona ʼu mamahi ʼuhi ko te ʼu faitoʼo ʼaē neʼe fai age kia ia.

¹³ ʼO ʼuhiga mo tona mahaki, neʼe faiga e te tuagaʼane ke mahino lelei ki tona kosea. Neʼe ina fakalavelave ki tana ʼu tōketā. ʼI Te Tule Leʼo pea mo te Réveillez-vous !, pea mo te ʼu tohi faka Tohi-Tapu faka Kilisitiano, neʼe ina maʼu ai te ʼu fakamatala ʼo ʼuhiga mo ʼihi, pe neʼe feafeaʼi ia tanatou tauʼi ʼo te mahaki ʼaia. Neʼe ina toe lau mo te ʼu vaega ʼe ʼasi ai te tokoni ʼa Sehova ki tana hahaʼi ʼi te ʼu temi faigataʼa, pea mo te tahi ʼu tokoni ʼaoga.

¹⁴ ʼI te tahi alatike ʼo ʼuhiga mo te lotovaivai ʼe tuʼu ai te ʼu palalau poto ʼaenī: “Ko ʼaē ʼe fia nofo tokotahi ʼe ina kumi anai tona holi ʼo ia tokotahi.” (Tāʼaga Lea 18:1) Pea neʼe toe tuʼu ai mo te tokoni ʼaenī: “Koutou tekeʼi ia takotou fia nofo tokotahi.”a ʼE ʼui fēnei e te tuagaʼane: “Tokolahi neʼe nātou ʼui mai neʼe nātou hūfakiʼi ʼau, ko ʼihi neʼe nātou telefoni mai. Neʼe telefoni tuʼumaʼu mai te ʼu tagata ʼāfea e toko lua peʼe kua ʼau logo feafeaʼi. Neʼe ʼaumai taku ʼu fisiʼi teu pea mo te ʼu kiʼi kate neʼe tohi ai he ʼu fakaʼalofa. Ko ʼihi neʼe nātou fai taku meʼa kai. Pea neʼe hahaʼi ia nātou ʼaē neʼe nātou totogi toku ʼu faitoʼo.”

15-17. (a) Neʼe tauʼi feafeaʼi e te tuagaʼane te ʼu fihifihia ʼaē neʼe tau mo ia ʼuhi ko tona fakaʼī? (b) Koteā te tokoni neʼe foaki age e te kokelekasio?

¹⁵ Ko te tuagaʼane kua fualoa tana tauhi kia Sehova ʼi te Nouveau-Mexique, ʼi Amelika, neʼe kau ʼi te fakaʼī ʼa te ʼu motokā e lua. Neʼe lavea tona kia pea mo tona ʼu fugaʼuma, ʼo ʼāsili kovi ai tona ʼola, ʼaē kua tau mo ia talu mai ia taʼu e 25 tupu. ʼE ina ʼui fēnei: “Neʼe faigataʼa ʼaupito ia taku fakatuʼu tonu toku ulu, pea neʼe mole feala ke ʼau fua he meʼa mamafa ʼe fakalaka ia kilo e lua. Kae neʼe tokoni ʼaupito kia ʼau taku faikole fakamalotoloto kia Sehova, ʼo feiā mo te ʼu alatike ʼo Te Tule Leʼo ʼaē neʼe tou ako. Neʼe ʼi ai te alatike neʼe ina fakamahino ia Mikea 6:8, pea neʼe ʼui ai ko takita haʼele agavaivai mo te ʼAtua ko tona faka ʼuhiga, ke kita mahino ki totatou ʼu tuʼakoi fakasino. Neʼe tokoni kia ʼau te faʼahi ʼaia, ke ʼaua naʼa ʼau lotovaivai logola toku ʼaluʼaga, tatau aipe mokā mole lahi taku gāue ʼi te minisitelio. Ko te meʼa ʼaē ʼe maʼuhiga tāfito, ko tatatou tauhi kia te ia ʼaki he ʼu manatu lelei.”

¹⁶ ʼE ina toe ʼui fēnei: “ ʼE vikiʼi tuʼumaʼu ʼau e te ʼu tagata ʼāfea ʼo ʼuhiga mo taku ʼu faiga ʼaē ke ʼau kau ki te ʼu fono pea mo taku ʼalu ʼo fai faka mafola. ʼE fāʼufua kia ʼau te kau tūpulaga. Pea neʼe loto faʼa kātaki ʼaupito te kau pionie ʼo nātou tautau fetogi tanatou ʼu fakatuʼutuʼu mokā ʼe ʼau logo kovi ʼi tomatou ʼaho fai faka mafola. Mokā ʼe tuʼu kovi te ʼaho, ʼe nātou ʼave ʼau ki tanatou ʼu ʼaʼahi peʼe nātou fakaafe ʼau ki tanatou ʼu ako Tohi-Tapu. ʼE mole ʼau lava fua taku kato fai faka mafola, pea ko te tahi ʼu kaugā fai faka mafola ʼaē ʼe nātou fafaʼo taku ʼu tohi ki tanatou ʼu kato fai faka mafola.”

¹⁷ ʼE koutou fakatokagaʼi pe neʼe tokoni feafeaʼi te kau tagata ʼāfea ʼo te kokelekasio pea mo te ʼu tēhina mo tuagaʼane ki te ʼu tuagaʼane e toko lua ʼaia neʼe tau mo tonā ʼu mahaki? Neʼe nātou foaki te tokoni ʼe ʼaoga pea mo agalelei ʼo ʼuhiga mo te ʼu meʼa ʼe ʼaoga anai kia nāua ʼi te faʼahi fakalaumālie, mo te faʼahi fakasino pea mo te ʼu meʼa ʼaē ʼi ʼonā loto. ʼE mole ko he meʼa fakaloto mālohi koa la ʼaia ke koutou tokoni ai ki ʼihi ʼo tokotou ʼu tēhina mo tuagaʼane ʼaē ʼe tau mo te ʼu fihifihia? Mo koutou kau tūpulaga ʼe koutou lava tokoni kia nātou ʼi tokotou ʼu kokelekasio ʼe tau mo te ʼu mamahi ʼi tonatou kakano.—Tāʼaga Lea 20:29.

18. ʼI te ʼu fakamatala ʼo Te Tule Leʼo pea mo te ʼu Réveillez-vous ! koteā te ʼu fakaloto mālohi ʼe tou lava maʼu ai?

¹⁸ ʼE tou maʼu ʼi Te Tule Leʼo pea mo te Réveillez-vous ! te ʼu fakamatala ʼo ʼuhiga mo te ʼu Fakamoʼoni neʼe nātou kātakiʼi pea kei nātou kātakiʼi aipe te ʼu fihifihia ʼi tonatou maʼuli. ʼI takotou lau tuʼumaʼu te ʼu alatike ʼaia, ʼe koutou sio ai anai ko tokotou ʼu tēhina mo tuagaʼane fakalaumālie ʼi te malamanei katoa ʼe nātou tau mo te ʼu faigataʼaʼia faka ekonomika, pea ʼe mamate ʼihi ʼe nātou ʼoʼofa mamahi ai ʼi te ʼu tuʼutāmaki faka natula, pea mo te ʼu tau. Ko ʼihi ʼe lagi nātou māʼimoa, peʼe nātou tau mo he mahaki faigataʼa. Tokolahi ʼe mole nātou lava fai te ʼu kihiʼi meʼa ʼaē ʼe lava fai ʼe nātou ʼaē ʼe mole mahahaki. ʼE nātou lotomamahi ʼuhi ko tonatou ʼu mahaki, tāfito mokā mole feala ke nātou kau faʼifaʼitaliha ki te ʼu gāue faka Kilisitiano. ʼE nātou loto fakafetaʼi ki te tokoni pea mo te lagolago ʼaē ʼe foaki age e tonatou ʼu tēhina mo tuagaʼane, mo te kau tūpulaga pea mo te kau matuʼa!

ʼE Tou Maʼu Te Fiafia ʼi Te Faʼa Kātaki

19. He koʼe neʼe lava fiafia ia Paulo logola te ʼu ʼahiʼahi pea mo te ʼu vaivaiʼaga ʼo tona kakano?

¹⁹ Neʼe fiafia ia Paulo ʼi tana sio ʼaē ki tona fakaloto mālohiʼi e te ʼAtua. Neʼe ina ʼui fēnei: “ ʼE lelei age haku fiameʼameʼa ʼo ʼuhiga mo toku ʼu vaivaiʼaga, ke malumalu ia te ʼau te māfimāfi ʼo Kilisito. Koia ʼe ʼau fiafia ʼi te ʼu vaivaiʼaga, ʼi te ʼu leakovi, ʼi te ʼu mamahi, ʼi te ʼu fakataga pea mo te ʼu faigataʼaʼia, ʼuhi ko Kilisito. Heʼe ʼi te temi ʼaē ʼe ʼau vaivai ai, ʼe ko te temi ʼaia ʼaē ʼe ʼau mālohi ai.” (2 Kolonito 12:9, 10, MN ) ʼUhi he neʼe hoko kia ia totonu te faʼahi ʼaia, koia neʼe lava fai ai e Paulo te ʼu palalau ʼaenī: “Kailoa, e mole au lea atu koteuhi e aoga mai he mea; he nee kuʼau ako’pe ki te mauli fakafeauga i he aluaga’pe e au mauli ai. E au iloi te mauli fakamasiva, pea e au iloi mo te mauli maumea. I te meafuape, mo te aluaga fuli nee au ako te nofo makona mo te nofo halofia, te mauli mahu mo te mauli masiva. E au fealagia te meafuape ia Ia ae e ina fakamalohi au.”—Filipe 4:11-13.

20, 21. (a) He koʼe ʼe tou lava fakafiafia mokā tou metitasioʼi “te ʼu meʼa ʼaē ʼe mole hā mai”? (b) Koteā “te ʼu meʼa ʼaē ʼe mole hā mai” ʼaē ʼe tou fakaʼamu ke tou sio kiai ʼi te Palatiso fakakelekele?

²⁰ Koia ʼaki tatatou ʼutakiʼi te ʼu tala ʼaē ʼe nātou fakatātā te ʼu faʼahiga mamahi pe ʼi totatou kakano, ʼe tou lava maʼu ai te fiafia lahi moʼo fakahā ki te hahaʼi fuli ko te mālohi ʼo Sehova ʼe liliu ʼo katoa ʼi totatou ʼu vaivaiʼaga. Neʼe tohi fēnei e Paulo: “ ʼE mole ma fakafisi ai . . . ʼE mahino papau ia ko tomā ʼuhigaʼi tagata ʼaē ʼi loto ʼe fakafoʼou ʼi te ʼaho mo te ʼaho. Koteʼuhi, logope ko te mamahi ʼe faka temi pea mo maʼamaʼa, kae ʼe ina fakatupu maʼa tatou he kolōlia ʼe fakaofoofo age tona mamafa pea ʼe heʼegata; Kae ʼe ma fakahaga tamā sio . . . ki te ʼu meʼa ʼaē ʼe mole hā mai heʼe . . . ko te ʼu meʼa ʼaē ʼe mole hā mai ʼe heʼegata.”—2 Kolonito 4:16-18, MN.

²¹ Tokolahi ʼi te hahaʼi ʼa Sehova ia ʼaho nei ʼe nātou ʼamanaki ke nātou maʼuʼuli ʼi tona Palatiso fakakelekele, pea mo nātou maʼu ai te ʼu tapuakina ʼaē neʼe ina fakapapauʼi mai. ʼE tou lava ʼui ko te ʼu taʼi tapuakina ʼaia “ ʼe mole hā” kia tatou ia ʼaho nei. Kae kua vave pe te temi ʼaē ka tou sio ai anai ki te ʼu tapuakina ʼaia ʼaki totatou ʼu mata moʼoni, ʼio, pea ʼe tou fakafiafia anai ʼo talu ai. Ko te taʼi tapuakina ʼaia ʼe ko he ʼāteaina mai he faʼahiga mamahi ʼe hage ko he tala ʼi totatou kakano! Ko te ʼAlo ʼo te ʼAtua ʼe ina “maumauʼi anai te ʼu gāue ʼa te Tevolo” pea mo ina “maumauʼi . . . ia ia ʼaē ʼe ina mau te mālohi moʼo fakatupu te mate.”—1 Soane 3:8, MN; Hepeleo 2:14, MN.

22. Koteā te falala pea mo te tui papau ʼaē ʼe tonu ke tou maʼu?

²² Koia la ʼaē, tatau aipe pe koteā te mamahi ʼaē ʼe lolotoga tau nei mo tatou ia ʼaho nei, tou haga kātakiʼi. Ohage ko Paulo, ʼe tou maʼu anai te mālohi ki te faʼahi ʼaia ʼuhi ko Sehova ʼaē ʼe ina foaki lahi mai te mālohi kia tatou. ʼI te temi ʼaē ka tou maʼuʼuli ai anai ʼi te Palatiso fakakelekele, ʼe tou tapuakinaʼi anai ia Sehova totatou ʼAtua ʼi te ʼaho fuli ʼo ʼuhiga mo tana ʼu gāue fakaofoofo ʼaē ʼe ina fai maʼa tatou.—Pesalemo 103:2.

[Kiʼi nota]

ʼE Koutou Tali Feafeaʼi Anai?

• He koʼe ʼe faiga te Tevolo ke ina maumauʼi te agatonu ʼa te kau Kilisitiano moʼoni, pea ʼe ina fakahoko feafeaʼi te faʼahi ʼaia?

• ʼE liliu feafeaʼi te mālohi ʼo Sehova ʼo “katoa . . . i te vaivai”?

• ʼE lava feafeaʼi ki te kau tagata ʼāfea pea mo ʼihi, ke nātou fakaloto mālohiʼi ia nātou ʼaē ʼe lotomamahi ʼuhi ko tonatou ʼu fihifihia?

[Paki ʼo te pasina 18]

Neʼe kole tuʼa tolu e Paulo ki te ʼAtua ke ina toʼo te tala ʼi tona kakano