Ko Te Vaivai ʼo Te Tagata ʼe Ina Fakahā Te Mālohi ʼo Sehova

“Neʼe ʼui e te hahaʼi fuli ko ʼau ko he minisi katoa fiafia pea mo maʼuli lelei. Neʼe ʼau tokoni tuʼumaʼu ki te hahaʼi ʼaē ʼe ʼi ai tonatou ʼu fihifihia. Kae logope la te faʼahi ʼaia, neʼe ʼau logoʼi ʼi toku loto ʼe hage kua ʼau mate. Neʼe tupu ai taku lotohoha pea mo taku tuʼania. Neʼe hage ai kia ʼau ʼe līʼakina ʼau e te hahaʼi. Neʼe ʼau fia nofo pe ʼau ʼi toku ʼapi ʼo moe. Lolotoga ni ʼu māhina, neʼe ʼau faikole kia Sehova ke feala haku mate.”​—Vanessa

OHAGE ko tona fakahā ʼi ʼoluga, ʼe mole tonu ke tou punamaʼuli mo kapau ʼi ʼihi temi, ʼe feiā te manatu ʼa te ʼu kaugana ʼa Sehova, ʼuhi ko te ʼu fua ʼo “te ʼu temi maʼuhiga ʼaupito mo faigataʼa” ʼaenī. (2 Timoteo 3:1) Ko ʼihi ʼe feala ke nātou lotovaivai. (Filipe 2:​25-​27) Kapau ʼe loaloaga te lotovaivai pea ʼe feala ke mole kei ʼi ai hotatou mālohi, heʼe ʼui fēnei e te Tohi-Tapu: “Neʼe kua ke lotovaivai koa ʼi te ʼaho ʼo te mamahi? Ko tou mālohi ʼe siʼisiʼi anai.” (Tāʼaga Lea 24:10) ʼIo, mokā tou lotovaivai, ʼe ʼaoga ke tou maʼu te mālohi​—lagi ke tou maʼu te meʼa ʼaē ʼe fakahigoaʼi e te ʼapositolo ko Paulo, ko te “mālohi ʼaē ʼe laka age ʼi te mālohi māhani.”​—2 Kolonito 4:7.

Ko Sehova ʼAtua ʼe ko te matapuna ʼo te mālohi ʼaē ʼe mole hona gataʼaga. ʼE hā lelei te faʼahi ʼaia mokā tou sivi te ʼu meʼa ʼaē neʼe ina fakatupu. (Loma 1:​20) Ohage la ko te laʼā. Ko te kele ʼe ina maʼu tuʼumaʼu te mālohi mai te laʼā ʼe ko kilowatts e 180 afe miliale. Kae, ko te mālohi ʼaia ʼe veliveli ʼaupito mokā fakatā ki te mālohi katoa ʼo te laʼā. Pea ʼe veliveli te laʼā mokā ʼe fakatatau mo te ʼu fetuʼu ʼaē ʼe ʼui ʼe ko te ʼu fetuʼu ʼaē ʼe lalahi ʼaupito. ʼI te ʼu fetuʼu ʼaia ʼe kau ai te fetuʼu ʼaē ʼe higoa ko Rigel, ʼe ko he fetuʼu ʼe kau ki te ʼu fetuʼu ʼo Orion, ʼaē ʼe tuʼa 50 age tona laulahi ʼi totatou laʼā, pea ʼe tuʼa 150 000 age te lahi ʼo te mālohi ʼaē ʼe ina maʼu!

ʼE mahino ko te Tupuʼaga ʼo te ʼu mālohi ʼaia ʼo te lagi ʼe ina toe maʼu te “lahi ʼo te mālohi.” (Isaia 40:26; Pesalemo 8:​3, 4) ʼE moʼoni, neʼe ʼui e te polofeta ko Isaia ko Sehova ʼe “mole gaʼegaʼe peʼe vaivai.” Pea ko te ʼAtua ʼe ina fia vaevae tona mālohi mo ia ʼaē kua lotovaivai ʼuhi ko te vaivai ʼo te tagata. (Isaia 40:28, 29) ʼE hā te mālohi ʼaē ʼe foaki e Sehova ʼi te faʼifaʼitaki ʼa te ʼapositolo Kilisitiano ko Paulo.

ʼE Ina Kātakiʼi Te ʼu ʼAhiʼahi

Neʼe fakahā e te ʼapositolo ko Paulo ki te kau Kolonito te fihifihia ʼaē neʼe tonu ke ina kātakiʼi. Neʼe ina fakahigoaʼi ko te “tala ʼi te kakano.” (2 Kolonito 12:7) Ko te “tala” ʼaia neʼe lagi ko he fihifihia ʼi tona maʼuli fakasino, lagi kua nenefu tana sio. (Kalate 4:​15; 6:​11) Peʼe lagi neʼe talanoa ia Paulo ʼo ʼuhiga mo te ʼu ʼapositolo loi pea mo nātou ʼaē neʼe nātou fakafihiʼi tona ʼuhiga ʼapositolo pea mo tana gāue. (2 Kolonito 11:​5, 6, 12-​15; Kalate 1:​6-9; 5:​12) Tatau aipe pe koteā te ʼu ʼaluʼaga ʼaē neʼe tau mo ia, kae neʼe mamahi ʼaupito ia Paulo ʼuhi ko te “tala ʼi te kakano” pea neʼe faikole tuʼumaʼu ke toʼo te tala ʼaia.​—2 Kolonito 12:8.

Kae, neʼe mole tali e Sehova te meʼa ʼaē neʼe kole age e Paulo. Kae neʼe ina ʼui fēnei kia Paulo: “Ko toku ʼofa makehe ʼe feʼauga kia koe.” (2 Kolonito 12:9) Neʼe koteā te faka ʼuhiga ʼo te ʼu palalau ʼaia ʼa Sehova? Kapau ʼe tou fakatokagaʼi te maʼuli ʼāfea ʼa Paulo ʼi tana fakatagaʼi te kau Kilisitiano, neʼe ko te ʼofa makehe kia ia, te fealagia ʼaē ke felogoi mo te ʼAtua​—pea mo te fealagia ʼaē ke liliu ko he ʼapositolo!a (Vakaʼi ia Sakalia 2:8; Fakahā 16:​5, 6.) Neʼe lagi ʼui age e Sehova kia Paulo kua “feʼauga” ʼaki pe te pilivilesio ʼaē ko te liliu ko he tisipulo. ʼE mole toʼo faka milakulo anai te ʼu fihifihia ʼaē neʼe tau mo ia ʼi tona maʼuli. ʼI tona ʼuhiga moʼoni, ko ʼihi mamahi ʼe tau mo ia ʼuhi ko te ʼu pilivilesio ʼaē neʼe ina maʼu. (2 Kolonito 11:24-​27; 2 Timoteo 3:​12) ʼI te ʼu meʼa fuli ʼaē neʼe hoko kia ia, neʼe tonu ke kātakiʼi e Paulo te “tala ʼi te kakano.”

Kae, neʼe mole līaki e Sehova ia Paulo. Neʼe ina ʼui age ki ai: “Heʼe ko toku mālohi ʼe lolotoga fakaliliu ʼo haohaoa ʼi te vaivai.” (2 Kolonito 12:9) ʼIo, neʼe foaki e Sehova kia Paulo te mālohi ʼaē neʼe ʼaoga moʼo tauʼi ʼo tona fihifihia. Koia, ko te tala ʼaē neʼe maʼu e Paulo ʼi tona kakano, neʼe liliu ko he meʼa moʼona akoʼi. Neʼe ina akoʼi age kia ia ʼe tonu ke falala ki te mālohi ʼo Sehova kae mole ki tona mālohi. Neʼe mahino ia Paulo ki te ako ʼaia, heʼe ʼi te ʼu taʼu ki muli age neʼe ina tohi fēnei ki te kau Filipe: “Neʼe ʼau ako, ʼi te ʼu ʼaluʼaga fuli pe ʼaē ʼe tau mo ʼau, ke ʼau fakafeauga ki te ʼu meʼa ʼaē kua ʼau maʼu. ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.”​—Filipe 4:​11, 13.

E feafeaʼi koa ia koutou? ʼE koutou kātakiʼi koa he faʼahiga “tala ʼi te kakano,” lagi ko he mahaki peʼe ko he ʼaluʼaga ʼi tokotou maʼuli ʼe tupu ai takotou tuʼania ʼaupito? Kapau koia ʼaia, ʼaua naʼa koutou tuʼania. Logope la ʼe mole pulihi faka milakulo anai e Sehova te fihifihia ʼaē ʼe tau mo koutou, ʼe feala ke ina foaki atu kia koutou te poto pea mo te mālohi ʼaē ʼe ʼaoga kia koutou ke koutou tauʼi, ʼi takotou haga fakamuʼamuʼa tuʼumaʼu te ʼu meʼa ʼo te Puleʼaga ʼi tokotou maʼuli.​—Mateo 6:​33.

Kapau ko te mahaki peʼe ko takotou kua matuʼa ʼe ina tāʼofi koutou ʼo mole feala ai ke lahi takotou gāue ʼi te minisitelio faka Kilisitiano, ʼaua naʼa koutou lotovaivai. Ke ʼaua naʼa koutou manatu ko te fihifihia ʼaia ʼe ina faka tuʼakoi takotou gāue kia Sehova, kae koutou faka ʼuhiga te faʼahi ʼaia ohage ko he faigamālie moʼo fakatuputupu takotou falala ʼaē kia te ia. Tahi ʼaē meʼa, koutou manatuʼi, ko te maʼuhiga ʼo te gāue ʼa he Kilisitiano, ʼe mole fakafuafua ki te lahi peʼe ki te veliveli ʼo tana gāue, kae ʼe fakafuafua ʼaki tana tui pea mo te loloto ʼo tona ʼofa. (Vakaʼi ia Maleko 12:41-​44.) Ko te ʼofa kia Sehova mo tokotou nefesi katoa ko tona faka ʼuhiga, ke koutou tauhi kia te ia ʼo mulimuli ki takotou ʼu fealagia, kae mole koutou mulimuli ki te ʼu fealagia ʼo he tahi kehe.​—Mateo 22:37; Kalate 6:​4, 5.

Kapau ko takotou “tala ʼi te kakano” ʼe pipiki ki he meʼa ʼe fakatupu lotomamahi ʼi tokotou maʼuli, ohage ko te mate ʼa he tahi neʼe koutou ʼofa mamahi ai, koutou mulimuli ki te tokoni ʼaenī ʼa te Tohi-Tapu: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.” (Pesalemo 55:22) Neʼe fai te faʼahi ʼaia e te fafine Kilisitiano ʼe higoa ko Sylvia. ʼI te vaha ʼo ni ʼu taʼu, neʼe mate tona ʼohoana ʼi te hili ʼo te ʼu taʼu e 50 ʼo tanā nofo ʼohoana pea mo te toko hiva ʼo tona famili​—ʼo kau ai mo tonā ʼu mokopuna e lua. ʼE ʼui e Sylvia “kanaʼauala ia Sehova ʼe mole feala anai haku kātakiʼi toku ʼu mamahi. Kae ʼe ʼau maʼu he fakaloto fīmālie lahi ʼi te faikole. ʼE ʼau palalau tuʼumaʼu mo Sehova. ʼE ʼau ʼiloʼi ʼe ina foaki mai te mālohi ke ʼau kātakiʼi toku ʼu mamahi.”

ʼE ko he meʼa fakafiafia tatatou ʼiloʼi ʼaē ko “te ʼAtua ʼo te fakaloto fīmālie,” ʼe feala ke ina foaki te mālohi kia nātou ʼaē ʼe mamahi ke nātou kātakiʼi te ʼu mamahi ʼaia! (2 Kolonito 1:3; 1 Tesalonika 4:​13) ʼAki te manatu ʼaia, kua feala leva ke tou mahino ki te manatu ʼa Paulo ʼo ʼuhiga mo te faʼahi ʼaia. Neʼe ina tohi fēnei: “ ʼE ʼau fiafia ʼi te ʼu vaivaiʼaga, ʼi te ʼu leakovi, ʼi te ʼu mamahi, ʼi te ʼu fakataga pea mo te ʼu faigataʼaʼia, ʼuhi ko Kilisito. Heʼe ʼi te temi ʼaē ʼe ʼau vaivai ai, ʼe ko te temi ʼaia ʼaē ʼe ʼau mālohi ai.”​—2 Kolonito 12:10.

Tou Tauʼi Totatou ʼUhiga Heʼe Haohaoa

Ko tatou fuli ʼe tou agahala ʼuhi ko tatatou ʼu ʼuluaki mātuʼa. (Loma 5:​12) Ko te tupuʼaga la ʼaia ʼo tatatou tauʼi te ʼu holi ʼo te kakano agahala. ʼE ko he meʼa fakaloto mamahi tatatou fakatokagaʼi ʼaē, ʼe mālohi ʼaupito te ʼu agaaga ʼo totatou “ ʼulugaaga ʼāfea” ʼaē ʼe lahi tana uga tatou ʼi tatatou fakakaukau! (Efesi 4:​22-​24) ʼI te ʼu lakaga ʼaia ʼe tou logoʼi ai te meʼa ʼaē neʼe logoʼi e te ʼapositolo ko Paulo, ʼaē neʼe ina tohi fēnei: “ ʼE ʼau leleiʼia moʼoni te lao ʼa te ʼAtua ʼo mulimuli ki toku ʼuhigaʼi tagata ʼaē ʼi loto, kae ʼau sio ʼau ʼi toku ʼu koga ki te tahi lao ʼe ina tauʼi te lao ʼo toku laumālie, pea ʼe ina fakapōpulaʼi ʼau ki te lao ʼo te agahala ʼaē ʼe nofo ʼi toku ʼu koga.”​—Loma 7:​22, 23.

ʼO toe feiā aipe ʼi te faʼahi ʼaia, ʼe feala ke tou maʼu te mālohi ʼa Sehova. Kapau ʼe koutou tauʼi hokotou vaivaiʼaga, koutou haga tuʼumaʼu kia te ia ʼi te faikole, ʼo koutou faiga fakamalotoloto ke ina fakamolemole atu kia koutou, tatau aipe peʼe tuʼa lahi anai takotou faikole kia te ia ʼo ʼuhiga mo te fihifihia ʼaia. ʼUhi ko tona ʼofa makehe, ʼe foaki atu anai e Sehova he leʼo ʼo loto ʼe maʼa, koteʼuhi ʼe “ina fakafuafua te loto” pea ʼe feala ke sio ki te loloto ʼo takotou fakamalotoloto. (Tāʼaga Lea 21:2) ʼAki tona laumālie maʼoniʼoni, ʼe feala ke foaki atu e Sehova kia koutou tona mālohi ke feala hakotou hoko atu takotou fakafeagai ki te ʼu vaivaiʼaga ʼo te kakano.​—Luka 11:13.

ʼE toe ʼaoga foki kia tatou te mālohi ʼaē ʼe haʼu mai ia Sehova moʼo kātakiʼi te ʼuhiga heʼe haohaoa ʼo ʼihi. Ohage la, ko he Kilisitiano ʼe feala ke palalau “vale [mai kia tatou] ohage ko he tā ʼaki he heletā.” (Tāʼaga Lea 12:18) ʼE feala ʼaki te faʼahi ʼaia ke lavea ai totatou loto, tāfito la mo kapau ʼe ko he tahi ʼe tou manatu neʼe tonu ke ina ʼiloʼi ʼe mole tonu ke ina fai te faʼahi ʼaia. ʼE feala ke tou lotohoha ʼaupito ai. Ko ʼihi neʼe nātou fakaʼaogaʼi te ʼu hala ʼaia ko hanatou takuʼaki ke nātou mavae ia Sehova​—kae ʼe nātou faihala ʼaupito ʼi te faʼahi ʼaia!

Kae, kapau ʼe tou fakapotopoto pea ʼe feala anai ke tou mahino lelei ki te ʼuhiga agahala ʼa ʼihi. ʼE mole tonu ke tou manatu ʼe mole agahala te hahaʼi heʼe haohaoa. ʼE fakamanatuʼi mai kia tatou e te tagata poto ko Salomone: “ ʼE mole he tagata ʼe mole agahala.” (1 Hau 8:​46) Ko Arthur, ko he Kilisitiano fakanofo neʼe tauhi agatonu kia Sehova lolotoga taʼu e 70, neʼe ina ʼui fēnei: “Ko te ʼu vaivaiʼaga ʼo totatou ʼu kaugā fagona ʼe ko he fealagia ʼaia ke tou fakahā ai tatatou agatonu, pea mo ʼahiʼahi ai totatou ʼuhiga Kilisitiano. Kapau ʼe tou tuku te ʼu palalau ʼaē ʼe fai e te hahaʼi pea mo te ʼu meʼa ʼaē ʼe nātou fai ke nātou tāʼofi tatatou tauhi kia Sehova, pea ko tona faka ʼuhiga ʼe tou tauhi ki te hahaʼi. Tahi ʼaē meʼa, ʼe toe ʼoʼofa foki mo totatou ʼu tēhina kia Sehova. Kapau ʼe tou sioʼi te ʼu meʼa ʼaē ʼe lelei ia nātou, pea ʼe tou fakatokagaʼi anai ʼe mole nātou agakovi.”

Te Mālohi Moʼo Fai Faka Mafola

ʼI muʼa ʼo tana hake ki selo, neʼe ʼui age e Sesu ki tana ʼu tisipulo: “ ʼE koutou maʼu anai te mālohi mokā hifo atu anai te laumālie maʼoniʼoni kia koutou pea ʼe koutou liliu anai ko haku kau fakamoʼoni ʼi Selusalemi pea mo Sutea katoa pea mo Samalia ʼo kaku ki te potu taupotu ʼo te kele.”​—Gāue 1:8.

Ohage ko te meʼa ʼaē neʼe ʼui e Sesu, ko te gāue ʼaia ʼi te temi nei kua fai e te ʼu Fakamoʼoni ʼa Sehova ʼi te ʼu fenua e 233 ʼi te kele katoa. Ko nātou fuli, ʼe nātou fakaʼaogaʼi te ʼu hola ʼe lauʼi miliale ʼi te taʼu fuli moʼo tokoni ki te hahaʼi ke nātou ʼiloʼi ia Sehova. ʼE mole faigafua tuʼumaʼu te fakahoko ʼo te gāue ʼaia. ʼI ʼihi ʼu fenua ʼe tapuʼi te faka mafola ʼo te Puleʼaga peʼe faka tuʼakoi. Tahi ʼaē meʼa, koutou fakatokagaʼi pe ko ai ʼaē ʼe ina fai te gāue​—ko te ʼu hahaʼi vaivai, mo heʼe haohaoa, ʼe nātou tahi nofo mo tonatou ʼu fihifihia pea mo tanatou ʼu tuʼania. Kae ʼe hoko atu pe te gāue, pea ko tona fua ʼi te ʼu taʼu e tolu kua hili, neʼe ko te toko lauʼi miliona tupu hahaʼi neʼe nātou foaki tonatou maʼuli kia Sehova, pea kua nātou papitema ʼi te vai. (Mateo 28:18-​20) ʼE moʼoni, ko te gāue ʼaia ʼe fakahoko ʼaki pe te mālohi ʼo te ʼAtua. Kae neʼe ʼui fēnei e Sehova ki te polofeta ko Sakalia: “ ʼE mole ʼaki he ʼu kautau solia, pea ʼaki he mālohi, kae ʼaki pe toku laumālie.”​—Sakalia 4:6.

Kapau ko koutou ko he kaugā fai faka mafola ʼo te logo lelei, ʼe koutou kau ki te fakahoko lahi ʼaia ʼo te gāue​—tatau aipe peʼe hage ʼe siʼisiʼi takotou kau kiai. Tatau aipe pe koteā te ‘tala’ ʼaē ʼe tonu ke koutou kātakiʼi, ʼe tonu ke koutou ʼiloʼi papau ʼe mole galo anai kia Sehova “takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.” (Hepeleo 6:​10) Koia koutou falala tuʼumaʼu ki te Matapuna ʼo te mālohi fuli ʼaē ʼe feala ke lagolago kia koutou. Tou manatuʼi, ʼe feala ke tou kātakiʼi totatou ʼu fihifihia ʼaki pe te mālohi ʼo Sehova; ko tona mālohi ʼe liliu ʼo katoa ʼi totatou ʼu vaivaiʼaga.

[Nota ʼi te lalo pasina]

[Paki ʼo te pasina 26]

ʼE fakahoko te gāue fai faka mafola ʼaki pe te mālohi ʼo Sehova