Tou ʼOʼofa Ki Te Hahaʼi—ʼO Tou Fakavikiviki Kiā Nātou
1 Ko he ʼu fakavikiviki fakamalotoloto ki te hahaʼi, ʼe ina fakaloto mālohiʼi nātou, mo uga nātou ke nātou fai he ʼu gāue, pea mo ina fakaloto fiafia nātou. Tokolahi te kau fai faka mafola, ʼe nātou tokagaʼi ʼi te minisitelio, ka nātou fai he fakavikiviki fakamalotoloto ki te hahaʼi, pea ʼi te agamāhani ʼe tupu ai hanatou fia logo. Ka tou fai faka mafola, ʼe feafeaʼi hatatou fakavikiviki kiā nātou?
2 Tou Tokagaʼi Lelei Te ʼu Meʼa ʼAē ʼe Fai e Te Hahaʼi: Ko Sesu Kilisito ʼi tana ʼosi hake ki selo, neʼe ina fakavikiviki ia te ʼu gāue lelei ʼo te ʼu kokelekasio e fitu ʼo Asia Veliveli. (Apk. 2:2, 3, 13, 19; 3:8) ʼO feiā mo tatou, ko totatou ʼofa moʼoni ki te hahaʼi ʼaē ʼe tou felāveʼi mo nātou ʼi te minisitelio, ʼe ina uga anai tatou ke tou kumi he ʼu faigamālie moʼo fakavikiviki kiā nātou. Ohage la, ka tou ʼolo ki he ʼapi ʼe maʼa lelei tona malaʼe, peʼe tou sio ki he tāmai peʼe ko he faʼe ʼe ina gaohi fakaleleiʼi tana fānau, peʼe tou tō atu ki he ʼapi ʼe tali leleiʼi ai tatou, ʼe ko he ʼu faigamālie ʼaia kiā tatou fuli ke tou fai he ʼu fakavikiviki. ʼE koutou tokagaʼi koa he ʼu ʼaluʼaga ʼe koutou lava fai ai he ʼu fakavikiviki ki he tahi?
3 Koutou Fakalogo Lelei: Ka koutou fai faka mafola ki te hahaʼi, koutou fai age he ʼu fehuʼi ʼe tāu mo feʼauga, ke feala hanatou fai palalau mo koutou. Koutou aga fakaʼapaʼapa ʼo fakalogo lelei ki tanatou ʼu palalau. (Loma 12:10) ʼO toe feiā aipe, ʼe nātou fai anai he ʼu palalau ʼe feala hakotou fai ai he ʼu fakavikiviki fakamalotoloto, pea mo hoko atu he fai palalau ʼi he ʼaluʼaga ʼe koutou felogoi ai.
4 Koutou Fakasiosio Poto: Koteā ʼaē ʼe tonu ke tou fai mo kapau ko ia ʼo te ʼapi ʼe ina fakahā mai hana manatu ʼe mole ʼalutahi mo te Tohi-Tapu? ʼAua naʼa tou tali koviʼi tana manatu ʼaia, kae tou fakamālo ki ai pea mo tou hoko atu fēnei “ ʼe mahino mai ʼe ke tokagaʼi ia te manatu ʼaenī.” (Kol. 4:6) Tatau aipe peʼe ko ia ʼo te ʼapi ʼe fakafifihi, kae ʼi te agamāhani ʼe feala pe hatatou fakavikiviki kiā ia ki tana fia logo ki te puani ʼaē neʼe kita palalau age ki ai. Ko te taʼi agalelei ʼaia ʼe ina fakamalū anai he tahi ʼe hage ʼe fakafeagai ʼaupito ki te logo lelei.—Taag. 25:15.
5 Ke feala hana fakaloto mālohiʼi he tahi, ʼe tonu ki tatatou fai fakavikiviki ke fai ʼaki he loto fakamalotoloto. Ko he ʼu palalau fakaloto mālohi feiā, ʼe ina faka kolōliaʼi ia Sehova pea mo ina uga anai niʼihi ke nātou fia logo ki te logo ʼo te Puleʼaga.