Te ʼu Fakavikiviki ʼe Fakaloto Fiafia
1 Neʼe tagi te kiʼi taʼahine ʼi tana palepale ʼo ina ʼui fēnei: “Neʼe mole ʼau agalelei koa ʼi te ʼaho nei?” Neʼe punamaʼuli tana faʼe ki te fehuʼi ʼaia. Logola neʼe ina tokagaʼi te faiga mālohi ʼo tana kiʼi taʼahine ke mole pago ʼi te ʼaho ʼaia, kae neʼe mole ina fai pe la he palalau fakavikiviki e tahi kia ia. Ko te tagi ʼa te kiʼi taʼahine ʼaia, ʼe ina fakamanatuʼi mai, ʼe ʼaoga he fakavikiviki kia tatou fuli, tūpulaga pea mo matutuʼa. ʼE tou fakaloto fiafia koa ia nātou ʼo te kokelekasio ʼaki he ʼu fakavikiviki ki te ʼu gāue lelei ʼaē ʼe nātou fai?—Taag. 25:11.
2 ʼE lahi te ʼu tupuʼaga lelei ke tou fakavikiviki ai ki totatou ʼu tēhina mo tuagaʼane ʼi te tui. Ko te kau tagata ʼāfea, te kau faifekau faka minisitelio, pea mo te kau pionie, ʼe nātou gāue kinakina moʼo fakahoko tanatou ʼu gāue. (1 Tim. 4:10; 5:17) Ko te ʼu mātuʼa ʼaē ʼe manavasiʼi ki te ʼAtua, ʼe nātou faiga mālohi ke nātou akoʼi ki tanatou fānau te ʼu ala ʼo Sehova. (Ef. 6:4) Ko te kau Kilisitiano tūpulaga ʼe nātou faiga mālohi ke nātou tekeʼi “te manatu ʼo te mālama ʼaenī.” (1 Ko. 2:12, MN; Ef. 2:1-3) Ko ʼihi, logola kua nātou matutuʼa, peʼe nātou mahahaki, peʼe nātou tau mo he tahi ʼu fihifihia, kae ʼe nātou tauhi agatonu pe kia Sehova. (2 Ko. 12:7) ʼE tonu ke tou fakavikiviki kia nātou fuli ʼaia. ʼE tou ʼiloʼi koa tanatou ʼu faiga pea mo tou fakavikiviki kia nātou?
3 He ʼu Fakavikiviki Kia Nātou Takitokotahi: Ko tatou fuli ʼe tou leleiʼia mokā tou logo ki he ʼu fakavikiviki ʼe fai mai muʼa. Kae ʼe toe fakaloto fiafia age mokā fai mai kia kita totonu. Ohage la, ʼi te kapite 16 ʼo te tohi ʼa Paulo ki te kau Loma, neʼe fakahā lelei e Paulo tana ʼu fakavikiviki ʼo ʼuhiga mo Foepene, mo Pilisika pea mo Akila, mo Tolufano mo Tufosa, pea mo Pelesita. (Loma 16:1-4, 12) ʼE mahino ia neʼe fiafia te ʼu hahaʼi agatonu ʼaia ʼi tanatou logo ki te ʼu palalau ʼaia! ʼAki te ʼu fakavikiviki ʼaia ʼe ʼiloʼi ai e totatou ʼu tēhina mo tuagaʼane ʼe nātou ʼaoga pea ʼe feala ai hatatou toe ōvi age kia nātou. ʼE ʼi ai koa he tahi neʼe koutou fai ki ai he ʼu fakavikiviki ʼi te ʼu ʼaho ʼaenī?—Ef. 4:29.
4 He ʼu Fakavikiviki Fakamalotoloto: Ke fakaloto fiafia moʼoni te ʼu fakavikiviki, ʼe tonu ke fakamalotoloto. ʼE ʼiloʼi e te hahaʼi mokā kita fai he fakavikiviki fakamalotoloto peʼe ka kita ‘fai he ʼu laupisi.’ (Taag. 28:23) Kapau ʼe tou faigaʼi ke tou tokagaʼi te ʼu kalitate ʼa ʼihi, ʼe faigafua anai ki totatou loto ke ina fai he ʼu fakavikiviki. ʼAua naʼa tou fakatātāʼofi ʼi te fai ʼo he ʼu fakavikiviki fakamalotoloto, heʼe tou ʼiloʼi ko “he palalau ʼi tona temi totonu, ʼe ko he meʼa lelei!”—Taag. 15:23.