Te Tali Ki ʼAkotou ʼu Fehuʼi

◼ ʼE feala koa ki he Fakamoʼoni ʼa Sehova ke faitoʼo peʼe tafa ʼi he lōpitali peʼe ko he fale maʼa te hahaʼi vaivavai ʼe fakahaʼele e he kautahi fakalotu?

ʼE ʼi ai te ʼu kautahi fakalotu ʼe natou fakahaʼele ia te ʼu lōpitali pea mo te ʼu fale maʼa te hahaʼi vaivavai ʼe faitoʼo ai peʼe mo taupau ai niʼihi kua fualoa hanatou mahaki. ʼI te agamāhani, ko te ʼu fale ʼaia neʼe mole fakatuʼu ia moʼo lagolago ki te ʼu gāue ʼa Papiloni Lahi. (Fakh. 18:2, 4) ʼE lagi ʼi te kamata neʼe fakatuʼu te ʼu faʼahi ʼaia e he kautahi fakalotu moʼo maʼu hana falā. ʼI te temi nei, ko te higoa pē ia ʼo ʼihi lōpitali ʼaē ʼe fakalotu, kae ki ʼihi lōpitali leva ia ʼe kei gāue aipē ia te ʼu pātele pea mo te ʼu tāupoʼou.

Kapau ʼe ʼi ai he Fakamoʼoni ʼa Sehova ʼe tonu ke faitoʼo ʼi he lōpitali peʼe ʼi he fale maʼa te hahaʼi vaivavai, ʼe fakalogo pē anai kiā ia peʼe faitoʼo anai ʼi he lōpitali ʼe lagi gāue tahi mo te lotu hala. Lagi ko te leʼo ʼo loto ʼo ʼihi ʼe fakagafua age anai ke ʼalu ʼo faitoʼo ʼi ai, kae ko he tahi ʼe lagi vevele anai tona leʼo ʼo loto kiai. (1 Tim. 1:5) ʼE ʼi ai te ʼu faʼahi ʼe feala ke tokoni ki te tonu ʼaē kā fai e he tahi, pea ʼe lelei anai ke tou vakaʼi ia te ʼu faʼahi ʼaia.

Ohagē lā, ʼe lagi ko te gataʼaga pē ʼaia ʼo te lōpitali peʼe ko te fale maʼa te hahaʼi vaivavai ʼaē ʼe tuʼu oviovi atu, ʼaia ʼe higoa fakalotu . Pea kapau ʼe ʼi ai he tahi age fale ʼe tuʼu ovi mai, pea ʼe lagi gāue tahi ia mo te lotu kae ʼe logona ʼi te lelei ʼo tana ʼu gāue ki te kau mahaki. ʼE lagi ko te lōpitali pē ʼaia e tahi ʼe higoa fakalotu, ʼaē ʼe ina maʼu ia te ʼu faitoʼo ʼaē ʼe ʼaoga ki te mahaki ʼaē ʼe tau mo koutou, peʼe ko te lōpitali pē ʼaia e tahi ʼe feala ai ki takotou tōketā peʼe ko te tōketā faitafa ke ina fai fakalelei ai tana gāue. ʼI ʼihi temi, ʼe feala pē ki te ʼu lōpitali ʼaē ʼe gāue tahi mo he kautahi fakalotu ke fakaʼapaʼapa ki takotou manatu ʼi tokotou ʼuhiga Kilisitiano ʼo ʼuhiga mo te toto. Kae ʼe ʼi ai ʼihi fale mahaki ʼe natou fakafisi ki te faʼahi ʼaia. Koia ʼe ko he ʼu faʼahi ʼe tonu ke kotou fakakaukauʼi ʼi muʼa ʼo hakotou fakatuʼutuʼu peʼe ko te lōpitali fea ʼaē kā kotou ʼolo anai kiai, ke faitoʼo ai koutou.

Kapau ʼe kotou fakatuʼutuʼu ke faitoʼo koutou ʼi he lōpitali ʼe gāue tahi mo he kautahi fakalotu, pea ʼe lagi ko te falā ʼaē kā kotou foaki, ʼe kotou fakaʼuhiga pē anai ʼe kotou totogi te gāue ʼaē neʼe natou fai maʼa koutou. Kiā koutou, ʼe hagē pē ia te kautahi fakalotu ʼaia ko he matani gāue, pea ʼe kotou totogi pē anai ia te gāue ʼaē neʼe fai e te matani gāue ʼaia kae ʼe mole hagē leva neʼe kotou foaki fakahagatonu he falā moʼo lagolago ki te lotu hala. ʼE kotou fakaʼuhiga pē anai neʼe kotou totogi he meʼa pe neʼe kotou totogi he gāue neʼe fai maʼa koutou.

ʼE mahino ia, ʼi te ʼu taʼi ʼaluʼaga ʼaia, ʼe tokaga anai he Kilisitiano naʼa ina fai he meʼa ʼe lagolago ki te lotu hala. Tahi ʼaē, ʼe mole kotou pāui anai ia nātou ʼaē ʼe gāue ʼi te lōpitali peʼe ko nātou ʼaē ʼe ʼomai ʼo ʼaʼahi ki te higoa fakatuʼulaga māhani ohagē ko te “Pātele” peʼe ko te “Tāupoʼou.” (Mat. 23:9) ʼE kotou tōkakaga pē anai ke fakatuʼakoi takotou ʼu felōgoi ʼaē mo nātou ki te fai ʼo te faitoʼo, pea mo manatuʼi neʼe kotou ʼomai kiai ke faitoʼo ai koutou, kae ʼe mole ʼi ai hona tahi age tupuʼaga.

Kā fakahū koutou ki he lōpitali fēia, kotou fakahā age ko koutou ko te Fakamoʼoni ʼa Sehova pea ʼe kotou loto anai ke ʼaʼahi koutou ʼe te kau tagata ʼāfea ʼo tokotou kolo. ʼE kotou maʼu ai anai ia te tokoni fakalaumālie ʼaē ʼe ʼaoga kiā koutou ʼi te temi ʼaē ʼe kotou nonofo ai ʼi te lōpitali.—1 Tes. 5:14.

ʼE tonu ki te fāmili ʼi te moʼoni, ki te kau tagata ʼāfea ʼo tokotou kolo pea mo ʼihi ʼo te kōkelekāsio ke natou tōkakaga ki te ʼu meʼa ʼaē ʼe ʼaoga ki te ʼu tehina mo tuagaʼane kua mātutuʼa ʼaē ʼe nonofo ʼi te ʼu fale maʼa te hahaʼi vaivavai, tāfito lā mokā ko te ʼu fale ʼaia ʼaē ʼe natou nonofo ai, ʼe fakahaʼele e he kautahi fakalotu. Ko te tokaga tuʼumaʼu kiā nātou ʼe ko he fakalotomālohi lahi anai ki te kau mātutuʼa ʼaia pea ʼe tokoni anai kiā nātou ke ʼaua naʼa natou kau ki he ʼu gāue fakalotu, ki he ʼu toʼotoʼoga, peʼe ki ʼihi atu ʼu gāue ʼe fai ʼi te ʼu fale ʼaia.

ʼAki te ʼu fakamahino ʼaia, kua feala leva ki te Kilisitiano takitokotahi ke ina vakavakaʼi ia te ʼu ʼaluʼaga fuli ʼaē ʼe pipiki kiai pea mo ina toʼo he tonu peʼe ko te lōpitali fea peʼe ko te fale maʼa te hahaʼi vaivavai fea ʼaē ke ʼalu anai kiai.—Kal. 6:5.