Kotou Teuteu Lelei Ki Te ʼAho Fakamanatu
ʼE ko he ʼaluʼaga fakafiafia pea mo he pilivilēsio ki te ʼu tisipulo ʼa Kilisito tanatou teuteu lelei ki te afiafi ʼaē ʼe fakamanatu ai ia te mate ʼo Sesu Kilisito! (Luka 22:19) Koteā te ʼu fakatuʼutuʼu lelei ʼe tonu anai ke tou fai moʼo teuteuʼi ia te ʼAho Fakamanatu?
◼ Te Hola Pea Mo Te Koga Meʼa ʼAē ʼe Fai Ai: ʼE tonu anai ke mahino lelei ki te tagata fuli ia te hola pea mo te koga meʼa ʼaē kā fai anai kiai ia te ʼAho Fakamanatu. Kapau ʼe lahi he ʼu kōkelekāsio ʼe fakatahitahi ki he Fale ʼo Te Puleʼaga e tahi, ʼe lelei anai ke natou ʼomai tautonu pea mo natou vete fakavilivili ʼi te hili ʼo te fono, koteʼuhi kua fakatuʼakoi ia te hola ʼo te ʼu fono. ʼE tonu anai ke tou faiga ke ʼaua naʼa tou fakapupu ʼi te hūʼaga, ʼi te loto fale fono, ʼi te ʼu ala ʼaē ʼe feʼoloʼaki ai te hahaʼi, pea mo te taulaga motokā.
◼ Te ʼu Pepa Fai Fakaafe: Kua maʼu fuli koa e te kau fai fakamafola ia hanatou ʼu pepa fakaafe, pea kua natou fakamāmāhani koa mo te ʼu manatu ʼaē ʼe tuʼu ai? Neʼe kua kotou teuteuʼi koa peʼe feafeaʼi anai ia hakotou tufa ia te pepa fai fakaafe ʼaia? Ko ai ʼaē kā kotou fakaafe anai? ʼE tonu anai ke tou faiga ke tou tufa te ʼu pepa fai fakaafe fuli.
◼ Te ʼu Motokā: Ko ʼihi ʼaē ʼe fia logo ʼo kau ai mo te ʼu tehina mo tuagaʼane ʼe lagi ʼaoga anai kiā nātou he motokā peʼe ko ʼihi ʼe ʼaoga ki ai he tahi age faʼahiga tokoni. Koteā te ʼu fakatuʼutuʼu ʼaē ʼe feala ke kotou fai moʼo tokaga ki te ʼu meʼa ʼaē ʼe ʼaoga kiā nātou?
◼ Te Pane Pea Mo Te Vino: Kotou tōkakaga ke ʼaua naʼa feʼāveʼaki ia te pane pea mo te vino kae mole heʼeki tō te laʼā. ʼE tonu anai ke fai he fakatuʼutuʼu ke ʼave ia te pane pea mo te vino ki te kau fakanofo ʼaē neʼe mole lava mai ki te fono. ʼE tonu anai ke maʼu pea mo teuteuʼi fakatomuʼa ia te pane pea mo te vino.—Vakaʼi ia Te Tule Leʼo ʼo te ʼaho 15 ʼo Fepualio 2003, ʼi te pāsina 14 mo te 15, palakalafe 14 mo te 17.
◼ Te Fale ʼo Te Puleʼaga: ʼE tonu anai ke fakamaʼa fakatomuʼa ia te fale fono. ʼE tonu anai ke ʼaumai ia te ʼu pā, mo te ʼu ʼipu vino, mo te laupapa pea mo tona kie fāliki ki te fale fono pea mo teuteuʼi fakatomuʼa. Kapau ʼe toe fakaʼaogaʼi ia he tahi fale, ʼe kotou tōkakaga ki te fakatagi, ke feala ki te nofoʼaki kātoa ke natou logoʼi ia te tehina faiakonaki. ʼE tonu anai ke filifili fakatomuʼa ia te ʼu tehina ʼaē kā natou feʼāveʼaki ia te pane pea mo te vino pea mo fakahāhā fakatomuʼa age kiā nātou ia tanatou ʼu gāue, mo te ʼu fakatuʼutuʼu ʼaē ʼe tonu ke natou mulimuli kiai, pea mo te ʼaoga ʼaē ʼo te teuteu lelei pea mo fakaʼapaʼapa.
ʼO ʼuhiga mo te toʼotoʼoga maʼuhiga ʼaia, te ʼAho Fakamanatu ʼo te mate ʼo Sesu Kilisito, tou fakaʼamu ke tou teuteu lelei takitokotahi ʼo toe fēia aipē mo te kōkelekāsio. ʼE mahino papau ia, ʼe mahu anai ia te ʼu tapuakina ʼa Sehova ʼaē kā ina foaki anai kiā nātou fuli ʼaē ʼe natou fakahā ia tonatou loto fakafetaʼi ki te ʼu meʼa fuli ʼaē neʼe foaki e Sehova ki te mālamanei ʼaki ia te sākilifisio ʼo tona ʼAlo ʼofaina, ia Sesu Kilisito.