‘Ko Te Logo Lelei ʼAenī ʼe Fakamafola Anai!’
1. ʼE tou ʼiloʼi feafeaʼi ʼe mole he meʼa ʼe feala ke ina tāʼofi ia te gāue fai fakamafola?
1 ʼE mole he meʼa ʼe feala ke ina tāʼofi Sehova ke ina fakahoko ia tona finegalo. (Isa. 14:24) Logolā ko te Tuʼi Fakamāu ko Seteone pea mo tana ʼu tagata e toko 300 neʼe hagē neʼe mole feala ke natou mālo ʼi te foʼi kautau sōlia Matianite ʼaē neʼe natou toko 135 000, kae neʼe ʼui fēnei age e Sehova: “ ʼE mahino papau ia, ʼe ke haofaki anai ia Iselaele mai te ʼu nima ʼo Matiane. ʼE mole au fekauʼi koa lā ia koe?” (Ktf. 6:14) Ko te gāue fea ʼaē ʼe lagolago kiai Sehova iā ʼaho nei? Neʼe ʼui fēnei e Sesu: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa.” (Mat. 24:14) ʼE mole he tahi ʼe feala anai ke ina tāʼofi te fakahoko ʼo te gāue ʼaia!
2. He koʼē ʼe tou lava ʼamanaki ʼe tokoni mai Sehova kiā tātou takitokotahi ʼi te minisitelio?
2 ʼE Tokoni Sehova Kiā Tātou Takitokotahi: Logolā tatatou tui ʼaē ko Sehova ʼe ina fai anai he ʼu meʼa ke fua lelei maʼa tana kau Fakamoʼoni fuli, kae ʼe tou lava ʼamanaki koa ʼe tokoni mai anai Sehova kiā tātou takitokotahi? ʼI te temi ʼaē neʼe nofo ai ʼi te faigataʼaʼia, neʼe logoʼi e te ʼapositolo ko Paulo te tokoni age ʼa Sehova ʼaki tona ʼAlo ko Sesu. (2 Tim. 4:17) ʼE feala ke tou tui papau ko Sehova ʼe ina toe tapuakinaʼi fēia anai tatatou ʼu faiga takitokotahi moʼo fakahoko ia tona finegalo.—1 Soa. 5:14.
3. Ko te ʼu ʼaluʼaga fea ʼaē ʼe tokoni mai ai Sehova kiā tātou?
3 ʼE mole kei ʼi ai koa hokotou mālohi moʼo kau ki te minisitelio ʼuhi ko takotou ʼu tuʼania ʼo te maʼuli? “E ina foaki te mālohi kiā ia ʼaē kua gaʼegaʼe.” (Isa. 40:29-31) ʼE fakatagaʼi koa koutou peʼe fakafeagai atu te hahaʼi? “Tuku tau kavega kiā Sehova totonu, pea ko ia totonu ʼe lagolago anai kiā te koe.” (Pes. 55:22) ʼE kotou lotolotolua koa ʼi ʼihi temi? “ ʼAlu, pea ko au ʼe au nofo anai mo tou gutu.” (Eke. 4:11, 12) ʼE kotou mahamahaki koa, ʼo mole lahi ai takotou gāue ʼi te minisitelio? ʼE maʼuhiga kiā Sehova te gāue ʼaē ʼe kotou fai pea ʼe feala ke ina fakaʼaogaʼi takotou ʼu faiga ʼaki tokotou nefesi kātoa, tatau aipē peʼe veliveli.—1 Ko. 3:6, 9.
4. ʼE malave feafeaʼi anai kiā tātou mokā tou falala anai kiā Sehova?
4 Ko te nima ʼo Sehova “kua ina faoʼi . . . , pea ko ai ʼaē ʼe ina lava peluki?” (Isa. 14:27) ʼAki tatatou falala ʼaē ʼe tapuakina e Sehova tatatou minisitelio, tou haga fakamafola “ ʼaki he lototoʼa ʼi te mālohi ʼo Sehova.”—Gāue 14:3.