Te Gāue ʼAē ʼe Lahi Age Ai Tokita Fiafia
1. Koteā te gāue ʼe fai iā ʼaho nei moʼo tokoni ki te hahaʼi ke natou ʼiloʼi ia Sehova?
1 ʼI te ʼuluaki sēkulō, neʼe fiafia ʼaupitō te hahaʼi ʼaē neʼe natou mamata ki te fakamālōlō ʼo te tagata neʼe mahaki. (Luka 5:24-26) Iā ʼaho nei, ʼe tou fiafia ʼi te fai ʼo te gāue ʼaē ʼe tokoni ai ki te hahaʼi ke natou ʼiloʼi ia Sehova. (Fakh. 22:1, 2, 17) ʼI meʼa fakafiafia te lau ʼo te ʼu fakamatala ʼe fakahā ai te ʼu fetogi ʼaē neʼe fai e te hahaʼi ʼi tonatou maʼuli ʼaki te Folafola ʼa Sehova pea mo te laumālie māʼoniʼoni! Kae ʼe lahi age takita fiafia mokā kita kau ki te gāue ʼaia ʼaki takita fai ia he ako Tohi-Tapu ʼe tuputupu.
2. Koteā te fiafia ʼaē ʼe tou lava logoʼi mokā tou akoʼi te moʼoni ki he tahi?
2 Ko ai te huafa ʼo te ʼAtua? He koʼē ʼe ina fakagafua te mamahi? Koteā ʼaē kā fai anai e te Puleʼaga ʼo te ʼAtua maʼa te mālamanei? ʼE mole tou fiafia pē ʼi te tali ki te ʼu taʼi fehuʼi fēia, kae ʼe tou toe fiafia foki ʼi tatatou sio ki te fiafia ʼo ia ʼaē ʼe ako ʼi tana ʼiloʼi te moʼoni. (Taag. 15:23; Luka 24:32) ʼI te tuputupu ʼo ia ʼaē ʼe ako, ʼe lagi ina kamata fakaʼaogaʼi ia te huafa ʼo Sehova, mo ina fai he ʼu fetogi tana faʼahiga teuteu pea mo te faʼu ʼo tona ʼulu, mo ina liʼaki tana ʼu aga ʼaē ʼe kovi, pea mo kamata fai fakamafola ki te hahaʼi. Kapau ʼe tuputupu ʼo aʼu ki tana foaki ia tona maʼuli pea mo papitema, ʼe liliu ai anai ko totatou tehina pea mo totatou kaugā gāue. Ko tana tuputupu lelei ʼaia ʼe fakatupu fiafia ia.—1 Tes. 2:19, 20.
3. Koteā ʼaē ʼe feala ke tou fai ke tou kamata ai he ako Tohi-Tapu?
3 ʼE Feala Koa Ke Kotou Kau Ki Te Gāue ʼAia? Kapau ʼe kotou fia kau ki te gāue ʼaia ʼaē ʼe lahi age ai anai tokotou fiafia, kotou kole kiā Sehova ke kotou maʼu te pilivilēsio ʼaē ke kotou fai he ako Tohi-Tapu, pea kotou gāue leva ʼo ʼalutahi mo takotou ʼu faikole. (1 Soa. 5:14) Kotou fai fakamafola ʼi te ʼu potu fuli pē ʼaē ʼe kotou maʼu ai te hahaʼi pea ʼi te ʼu hola ʼaē ʼe kotou maʼu ai ia nātou. ʼI te temi fuli pē ʼaē ʼe feala ai, kotou ʼui age ki te hahaʼi ke fai hanatou ako Tohi-Tapu. (Tnk. 11:6) Kā kotou maʼu he tahi ʼe fia logo pea mo kotou tō te pulapula ʼo te moʼoni, kotou toe liliu ʼo fakavai.—1 Ko. 3:6-9.
4. He koʼē ʼe maʼuhiga ke tou ʼui age ki te hahaʼi ke fai hanatou ako Tohi-Tapu?
4 ʼE kei lahi te hahaʼi ʼaē ʼe natou fia kakai pea mo ʼiʼinu ki te faitotonu. Ko ai ʼaē kā tokoni age anai ke natou maʼu te ʼu meʼa ʼaē ʼe ʼaoga kiā nātou ʼi te faʼahi fakalaumālie, ʼo fai hanatou ako Tohi-Tapu? (Mat. 5:3, 6) Tou lotolelei ʼo fia tokoni ke fakahoko kātoa ia te gāue fai fakamafola pea mo te fai ʼo ni ʼu tisipulo, ʼi muʼa ʼo te fakaʼosi ʼo te taʼukai.—Isa. 6:8.