Kotou Fai Fakamafola ʼi He Telituale ʼe Lahi Ai Te ʼu Matani Gāue ʼAki He Loto Falala
1. He koʼē ʼe mole tonu ke tou lotovaivai mo kapau ʼe tou fai fakamafola ki te hahaʼi gāue?
1 ʼE kotou mātataku koa ʼi te fai fakamafola ʼi he ʼu matani gāue? Kapau koia, ʼaua naʼa kotou lotovaivai. Heʼe māʼia pē lā mo Paulo, ʼaē neʼe ko he tagata fai fakamafola lototoʼa pea neʼe mole mataku, kae ʼi ʼihi temi neʼe tonu ke ina maʼu he lototoʼa ke fai fakamafola. (1 Tes. 2:2) ʼE tou vakaʼi anai ia te ʼu tuʼania māhani pea mo te ʼu tokoni ʼe ʼaoga ke feala hatatou palalau kiā nātou ʼaia.
2. He koʼē ʼe mole tonu ke tou tuʼania naʼa tou fakalelu ki te hahaʼi gāue?
2 ʼE Fakalelu Anai Koa Ki Te Hahaʼi Gāue? ʼI te ʼu fale gāue, kua māhani pē ia te kau gāue ʼi te felōgoi mo te hahaʼi. Pea ʼe mole natou punamaʼuli mokā ʼe ʼolo age niʼihi ʼo palalau kiā nātou. ʼI te agamāhani, ʼe natou aga fakaʼapaʼapa, heʼe maʼa nātou, ʼe tou kau kiā nātou ʼaē ʼe ʼomai ʼo fai fakatau. Koia, ʼaki he teu fakaʼapaʼapa, mo he agalelei pea mo he aga fakakaumeʼa, ʼe natou tali fakaʼapaʼapa anai tātou.
3. Ko te temi fea ʼaē ʼe feala ai ke tou fai fakamafola ki te hahaʼi gāue?
3 ʼE Au Fakahoko Anai Koa Lā Te Fai Fakamafola Ki He Tahi Iā Muʼa ʼo Te Hahaʼi? Kapau ʼe feala, kotou vakavakaʼi ia te hola ʼaē ʼe mole hahaʼi ai ia te kau faifakatau ʼi te ʼu fale koloa. Ohagē lā, ʼi te temi ʼaē hoki ʼavahi ai te ʼu fale koloa. Pea kotou talitali muʼa ke tō tokotahi ia te pātolō peʼe ko te tagata gāue, ke kotou fai fakamafola fakanounou.
4. Koteā ʼaē ʼe feala ke tou ʼui age ki te kau gāue?
4 Koteā ʼAē Kā Tou ʼUi Age? Kotou palalau ki te tagata takitaki peʼe kaugamālie te hahaʼi gāue. ʼE feala ke kotou ʼui fēnei: “Kua faigataʼa te maʼu ʼo te hahaʼi gāue ʼi ʼonatou ʼapi, koia ʼaē ʼe matou ʼomai ai ʼo fai palalau mo koutou ʼi ʼokotou fale gāue. Kae ʼe mole matou nonofo fualoa anai, heʼe mahino kiā mātou ʼe kotou lolotoga gāue.” ʼE lelei ke mole tou palalau age ʼo ʼuhiga mo te ʼu meʼa ʼofa, naʼa natou ʼui ko tātou ko he ʼu tagata fai fakatau. Hoki tou palalau pē kiai mokā ʼe natou fehuʼi mai peʼe fakahoko feafeaʼi tatatou gāue. Kotou kole ki te pātolō ke ina fakagafua atu ke kotou palalau fakanounou ki te kau gāue, mo kapau ʼe feala. Pea kotou toe fakaʼaogaʼi ʼakotou ʼuluaki palalau kiā nātou. Kapau ʼe maʼumaʼua ia he tagata gāue, kotou palalau fakanounou pea mo kotou tuku age ki ai he kiʼi pepa lotu. Kae kapau ʼe mole feala hakotou palalau mo te kau gāue, ʼe lagi fakagafua atu anai ke kotou tuku he ʼu tohi ki te faʼahi ʼaē ʼe natou mānanava ai peʼe ki he tahi age faʼahi.
5. He koʼē ʼe feala ke tou fai fakamafola ʼi te ʼu matani gāue ʼaki he loto falala?
5 Neʼe fai fakamafola ia Sesu mo Paulo ki te hahaʼi ʼi ʼonatou fale gāue ʼaki he loto falala, pea ʼe toe feala ke kotou fai fēia mo koutou. (Mat. 4:18-21; 9:9; Gaue 17:17) Kotou kole kiā Sehova ke tokoni atu ke kotou maʼu ia he loto ʼe fakatokatoka pea mo he lototoʼa. (Gaue 4:29) ʼE tou maʼu tuʼumaʼu ia te hahaʼi ʼi te ʼu matani gāue. Koia lā ʼaē, ʼe lelei ke tou faigaʼi ke tou fai fakamafola ʼi te ʼu fale gāue, heʼe fua lelei anai.