Te ʼu Tupuʼaga ʼe Hogofulu-Ma-Lua Ki Te Faifakamafola

He ko ʼe koa ʼe tonu ke tou faifakamafola pea mo akoʼi ia te logo lelei ki te hahaʼi? ʼE tou fai tafitō koa moʼo tokoni ki te hahaʼi fakamalotoloto ke natou haʼele ʼi te ala ʼo te maʼuli? (Mat. 7:14) Ko te ʼuluaki tupuʼaga ʼaia ʼae ʼe tuʼu ʼi te lisi ʼaeni ʼi lalo, kaʼe ʼe mole ko te tupuʼaga tafitō. Maʼa koutou la, ʼi te ʼu tupuʼaga ʼaeni ʼe 12, ko te tupuʼaga fea ʼae ʼe maʼuhiga age ke tou lagolago ai ki te minisitelio?

1. ʼE ina haofaki te hahaʼi.—Soa. 17:3.

2. ʼE ina fakatokaga ki te tagata agakovi. —Esk. 3:18, 19.

3. ʼE ina fakahoko ia te lea fakapolofeta.—Mat. 24:14.

4. ʼE ina fakaha ia te faitotonu ʼa te ʼAtua. ʼE mole feala ke tukugakoviʼi ia Sehova ʼi tana fakaʼauha ia te tagata agakovi koteʼuhi neʼe ina tuku age ia te fealagia ʼae ke fakahemala.—Gaue 17:30, 31; 1 Tim. 2:3, 4.

5. ʼE ina fakafealagia ke tou fakahoko totatou maʼua ʼae ke tou foaki he tokoni fakalaumalie ki te hahaʼi, ʼae neʼe totogi ʼaki te taʼataʼa ʼo Sesu. —Loma 1:14, 15.

6. ʼE ina fakafealagia ke tou maʼa mai te toto ʼo te hahaʼi.—Gaue 20:26, 27.

7. ʼE ko he fakamaʼua ki totatou haofaki.—Esk. 3:19; Loma 10:9, 10.

8. ʼE ina fakaha totatou ʼofa ki te tagata fuli pe.—Mat. 22:39.

9. ʼE ina fakaha tatatou fakalogo ʼae kia Sehova mo tona ʼAlo.—Mat. 28:19, 20.

10. ʼE kau ki tatatou tauhi ki te ʼAtua.—Hep. 13:15.

11. ʼE ina fakaha totatou ʼofa ʼae ki te ʼAtua. —1 Soa. 5:3.

12. ʼE lagolago ki te fakatapuha ʼo te huafa ʼo Sehova.—Esa. 43:10-12; Mat. 6:9.

ʼE moʼoni ia, ʼe mole ko te ʼu tupuʼaga pe ʼaeni ʼae ʼe tou lagolago ai ki te minisitelio. Ohage la, ko te faifakamafola ʼe ina fakamalohiʼi tatatou tui pea ʼe ina toe foaki mai ia te pilivilesio ʼae ke tou kaugā gaue mo te ʼAtua. (1 Ko. 3:9) Kaʼe, ko te tupuʼaga tafitō ʼae ke tou lagolago ai ki te minisitelio, ʼe ko te tupuʼaga 12. Pe ʼe tali e te hahaʼi ia te logo lelei peʼe kailoa, ʼe lagolago te minisitelio ki te fakatapuha ʼo te huafa ʼo Sehova, pea ʼe ina fakafealagia kia Sehova ke tali kia ia ʼae ʼe fakafifihi age. (Taag. 27:11) ʼE mahino papau ia, ʼe lahi te ʼu tupuʼaga maʼuhiga ke tou haga akoʼi ia te hahaʼi pea mo tou haga tala ia te logo lelei.—Gaue 5:42.