Tou Tala Ia Te Moʼoni ʼo ʼUhiga Mo Sesu ʼAki He Faʼafai

ʼE tuputupu tatatou faʼafai ʼi te minisitelio moka tou iloʼi ia te faʼahiga fakaha ki te hahaʼi ia te moʼoni ʼo ʼuhiga mo Sesu. Ko Sesu ʼe ko te tafitoʼaga ʼaia ʼo tatatou tui. (Efe. 2:20) Ka na ʼaua la ia ia, ʼe mole he ʼamanaki ki totatou maʼuli. (Gaue 4:12) Koia ʼe maʼuhiga ke tou mahino lelei ki te tuʼulaga ʼo Sesu ʼi te fakatuʼutuʼu ʼa te ʼAtua. Tokolahi neʼe fakahalaʼi natou ʼaki te ʼu akonaki neʼe mole fakatafito ki te Tohi-Tapu. Koia ʼe feala ai ke mole natou maʼu ia te ʼu fakapapau ʼae neʼe fai pe kia natou ʼae ʼe tui kia Sesu. Ko tatatou faʼafai ʼo ʼuhiga mo te moʼoni ʼe ina uga anai tatou ke tou tokoni fakamalotoloto ki te hahaʼi ke natou iloʼi lelei ia te ʼuhiga ʼo Sesu, mo ʼana felogoʼi mo te ʼAtua pea mo tona tuʼulaga ʼi te ʼu fakatuʼutuʼu ʼa te ʼAtua. Koia, lolotoga te ʼu mahina ʼae ʼe fai ai te ʼAho Fakamanatu, ʼe kotou tala anai koa te moʼoni ʼo ʼuhiga mo Sesu ʼaki he faʼafai?