ʼE Malohi Feafeaʼi Takotou Tui Ki Te ʼu Fakapapau ʼa Sehova?

Neʼe fakamoʼoni e Sosue pea mo Salomone ʼe mole he folafola ʼe tahi ʼi te ʼu fakapapau ʼa Sehova neʼe mole hoko. (Sos 23:14; 1Ha 8:56) ʼAki te ʼu fakamoʼoni ʼaia ʼe lua, ʼe feala ke fakatafito ki ai tatatou tui.​—2Ko 13:1; Tit 1:2.

Neʼe fakahoko feafeaʼi e Sehova ʼana fakapapau ʼi te temi ʼo Sosue? Kotou vakaʼi mo tokotou kiʼi famili te ʼata viteo ‘Neʼe Mole Hana Folafola ʼe Tahi Neʼe Mole Hoko.’ Pea vakaʼi te ʼu fehuʼi ʼae ʼe hoa mai: (1) ʼE kotou lava faʼifaʼitakiʼi feafeaʼi te tui ʼa Laape? (Hep 11:31; Skp 2:​24-26) (2) ʼE ha feafeaʼi ʼi te faʼifaʼitaki ʼa Akane ko te talagataʼa ʼe ʼi ai ʼona fua kovi? (3) Logo la ko te kau Kapaone neʼe ko he ʼu tagata tau, kaʼe he koʼe neʼe natou kakaʼi ia Sosue pea mo kumi te tokalelei mo Iselaele? (4) Neʼe hoko moʼoni feafeaʼi te ʼu palalau ʼa Sehova ʼi te temi ʼae neʼe fakamatakuʼi ai e te ʼu hau ʼe nima ʼo te kau Amole ia Iselaele? (Sos 10:​5-14) (5) Kotea ʼae neʼe fai e Sehova maʼa koutou ʼi takotou fakamuʼamuʼa tona Puleʼaga pea mo tana faitotonu ʼi tokotou maʼuli?​—Mat 6:33.

Ka tou fakakaukauʼi te ʼu meʼa fuli ʼae neʼe fai e Sehova ʼi te temi muʼa, mo te temi nei pea mo te ka haʼu, ʼe malohi anai tatatou tui ki ʼana fakapapau.​—Lom 8:​31, 32.