Ko Manatu ʼAoga ʼo Te Tohi Ke Ke Fiafia ʼo Heʼe Gata

ʼE ke leleiʼia koa te ʼu ʼata viteo mo te ʼu fehuʼi ki te manatu ʼo ia ʼae ʼe ako ʼi te tohi Ke Ke Fiafia ʼo Heʼe Gata? Kotea tau manatu ʼo ʼuhiga mo te ʼu koga ʼaeni: “ ʼE Ui e ʼIhi,” “Taku Fakatuʼutuʼu” pea mo “Te Tahi ʼu Manatu”? Kotea te tahi ʼu manatu ʼe tokoni anai ki te gaue ʼae ko te fai ʼo ni tisipulo?—Mat 28:19, 20.

Pāki Mo ʼAta Viteo: Kapau ʼe ke fai he ako ʼaki te tohi, ʼe feafeaʼi anai he maʼu ʼo te ʼu pāki mo te ʼu ʼata viteo? Avahi te tohi ʼi tau kiʼi masini, pea ke filifili he koga ʼi te ʼu koga tafito ʼe 4. ʼI te lalo lisi ʼo te ʼu kapite, ʼe tuʼu ai “Pāki Mo ʼAta Viteo” ʼo te koga ʼaia. (Vakaʼi te pāki 1.)

“Mode Image”: Kapau ʼe fakaʼaogaʼi he masini ki te ako Tohi-Tapu, ʼe feala ke ke fakaʼaogaʼi te “Mode Image” ʼi he temi pe ʼo te ako. Lolotoga te ako, lomiʼi te ʼu puani ʼe tolu ʼae ʼe tuʼu ʼi ʼoluga pea filifili te “Mode Image.” ʼE tokoni atu ke ke maʼu tuʼumaʼu te pikipikiga ʼo te manatu ʼae ʼe ako pea mo te kupu taki ʼo te kapite. Ke toe liliu ki te “Mode Texte”, toe lomiʼi te ʼu puani ʼe tolu pea filifili te “Mode Texte.”

“ ʼE Kua Au Tokalelei Koa?”: ʼI te koga 4, ʼe fakamahino ʼi te ʼu ʼa takai te ʼu fakamaʼua tafito ʼae ki te faifakamafola pea mo te papitema. (Vakaʼi te pāki 2.)

Fakamahino: ʼE maʼu ai he ʼu fakamahino ʼo ʼuhiga mo he ʼu manatu maʼuhiga. ʼI te tohi ʼi te JW Library, ʼe maʼu ʼi te fakaʼosiʼaga ʼo te ʼu nota te fakailoga ʼe tou liliu ai ki te faʼahi ʼae neʼe tuʼu ai te ako. (Vakaʼi te pāki 2.)