’E TOU LAVA FAKAGATA FEAFEA’I TE FEHI’A?

2 | ʼAua Naʼa Kotou Lagavaka

Te Ako Mai Te Tohi-Tapu:

“ ʼAua naa kotou liufaki ki he tahi te kovi ʼaki te kovi. . . . Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe. . . . ʼAua naʼa kotou lagavaka . . . he neʼe tohi fenei: ‘ “ ʼAʼaku te lagavaka, ʼe au liufaki anai,” ko te ui ʼaia ʼa Sehova.ʼ ”—LOMA 12:17-19.

Ko Tona Fakaʼuhiga:

ʼE moʼoni ʼe matatonu hatatou ita mo kapau neʼe kakaʼi tatou, kae ʼe mole loto e te ʼAtua ke tou lagavaka. Kae ʼe ina kole mai ke tou atalitali ke hoki ina fakatokatoka ia te ʼu mamahi fuli.—Pesalemo 37:7, 10.

Kotea ʼAe ʼe Feala Ke Kotou Fai?

Ka lagavaka he tahi, ʼe ʼaʼasili ai te fehiʼa. Kae kapau neʼe fakamamahiʼi koutou e he tahi, ʼaua naʼa kotou lagavaka. Kotou faiga ke kotou tali ʼaki he agalelei mo he loto tataʼofi. ʼI ʼihi aluʼaga, ʼe ʼataʼata age totatou mamahi moka tou tuku feia te aluʼaga ʼaia. (Taʼaga Lea 19:11) ʼE moʼoni, kapau ʼe feala, kotou faiga tafito ke kotou fakatokatoka te fihifihia. Ohage la, kapau neʼe kaihaʼa hakotou meʼa, ʼe feala ke kotou fakaha ki te kau polisi peʼe ki te kau taki.

Ko te lagavaka ʼe mole maʼu ai he meʼa ʼe lelei

Kae ʼe feafeaʼi mo kapau ʼe mole feala ke fakatokatoka he fihifihia? Pe neʼe kua kotou fai ia meʼa fuli ke kotou fakatokatoka ia te fihifihia ʼaia? ʼAua naʼa kotou lagavaka, he ʼe feala ke ʼaʼasili ai tona kovi. Kae ke kotou faiga ke puli ia te fehiʼa. ʼE tonu anai ke kotou falala ki te faʼahiga fakatokatoka e te ʼAtua ia te ʼu fihifihia. “Falala kia te ia pea ʼe tokoni atu anai kia koe.”—Pesalemo 37:3-5.

Te Aluʼaga Neʼe Hoko—ADRIÁN

Tauʼi Te ʼu Manatu

Lagavaka

ʼI tana kei tamasiʼi, neʼe liliu ia Adrián ko he tama fuhu ʼi tona kolo ʼe fonu ʼi te fehiʼa pea mo lagavaka. ʼE ina fakamatala fenei: “Neʼe au kau tuʼumaʼu ʼi te ʼu fuhu ʼo toe fakaʼaogaʼi ai mo te ʼu fana, pea ʼi te agamahani ʼe au lavea ai, ʼo meihiʼi pe ke au mate ai.”

Neʼe kamata ako leva e Adrián ia te Tohi-Tapu ʼi tona taʼu 16. ʼE ina hoko atu fenei: “ ʼI te tuputupu ʼo taku ako te Tohi-Tapu, neʼe au tokagaʼi ai te maʼuhiga ʼae ke au fai he ʼu fetogi ʼi taku aga.” Neʼe tonu ke ina liʼaki te fehiʼa pea mo te agamalohi. Neʼe ina leleiʼia ia te manatu neʼe ina ako ia Loma 12:17-19 ʼae ke ʼaua naʼa lagavaka. ʼE ina ui fenei: “Ki muli age, neʼe au tali ʼe tokaga anai ia Sehova ki te aga heʼe faitotonu ʼo mulimuli ki tana faʼahiga fai ʼi tona temi totonu. ʼAki te temi, neʼe au liʼaki leva toku maʼuli agamalohi.”

ʼI te tahi afiafi, neʼe ʼohofi ia Adrián e te kiʼi kutuga agamalohi neʼe natou feagai ki muʼa atu. Neʼe kalaga fenei mai te pule ʼo te kiʼi kutuga ʼaia: “Tali mai!” ʼE ui fenei e Adrián: “Neʼe kovi ʼosi toku fia tali ki ai.” Kae neʼe mole lagavaka, neʼe faikole fakavilivili kia Sehova pea neʼe mavae mai ai.

ʼE hoko atu fenei ia Adrián: “ ʼI te ʼaho ake, neʼe au felaveʼi mo te pule ʼo te kiʼi kutuga ʼaia, neʼe ko maua pe, koia neʼe au toe kolekole ai kia Sehova ke tokoni mai ke au lotololomi. Koia neʼe au punamaʼuli ai ʼi te fakaovi mai te tama ʼaia pea ina ui fenei mai: ‘Fakalelei pe ki te aluʼaga ʼae neʼe hoko ʼanapo. ʼI tona fakahagatonu, ʼe au fia liliu ohage ko koutou. ʼE au fia ako te Tohi-Tapu.’ ʼI toku toe fiafia leva ʼi taku maʼu te lotololomi. ʼUhi ko te faʼahi ʼaia, neʼe ma kamata leva tana ako Tohi-Tapu.”