ALATIKE AKO 4
He Koʼe ʼe Tou Kau Ki Te ʼAho Fakamanatu?
“Kotou haga fai te faʼahi ʼaeni moʼoku fakamanatu.”—LUKA 22:19.
KATIKO 20 Neʼe Ke Momoli Tou ʼAlo ʼUlu Tokotahi
TE ʼU MANATU FAKANOUNOUa
1-2. (1) Ko te temi fea ʼe tou fakamanatu ai te mate ʼo he tahi neʼe tou ʼofa mamahi ai? (2) Kotea ʼae neʼe fai e Sesu ʼi te po ʼi muʼa ʼo tana mate?
ʼE TOU manatuʼi tuʼumaʼu ia natou ʼae kua mamate neʼe tou ʼoʼofa mamahi ai, tatau aipe pe ko te ʼaho fea neʼe natou mamate ai. ʼI te taʼu fuli, ʼe tou manatuʼi te ʼu kiʼi temi neʼe tou fakatahi ai mo natou moka fakaovi mai te ʼaho neʼe natou mate ai.
2 ʼI te taʼu fuli, ʼe lau ʼe tou toko miliona ʼi te malamanei ʼe fakatahitahi ki te fakamanatu ʼo te mate ʼo Sesu Kilisito, ʼae ʼe tou ʼofa mamahi ai. (1 Pet. 1:8) ʼE tou fakatahitahi ke tou manatuʼi ia ia ʼae neʼe ina foaki tona maʼuli ko he totogi pea mo ina haofaki tatou mai te agahala mo te mate. (Mat. 20:28) Koia, neʼe loto e Sesu ke manatuʼi e ʼana tisipulo tona mate. ʼI te po ʼi muʼa ʼo tana mate, neʼe ina fai he taumafa ʼo ina fai ai te fakatotonu ʼaeni: “Kotou haga fai te faʼahi ʼaeni moʼoku fakamanatu.”—Luka 22:19.
3. Kotea ka tou vakaʼi ʼi te alatike ʼaeni?
3 Ko te tokosiʼi ia natou ʼe kau ki te Fakamanatu ʼo Te mate ʼo Kilisito ʼe natou maʼu te ʼamanaki ʼae ki te maʼuli ʼi selo. Kae ʼi te po ʼo te ʼAho Fakamanatu, ʼe toe ʼi ai te toko lauʼi miliona ʼe natou maʼu te ʼamanaki ʼae ki te maʼuli ʼo heʼe gata ʼi te kele. ʼI te alatike ʼaeni, ʼe tou vakaʼi anai pe koʼe ʼi te taʼu fuli ʼe natou fia kau fuli ki te ʼAho Fakamanatu. ʼE tou toe vakaʼi ai anai te ʼu fua lelei ʼe tou maʼu moka tou kau ki ai. Kae ʼe tou vakaʼi muʼa pe koʼe ʼe kau te kau fakanofo ki te ʼAho Fakamanatu.
HE KOʼE ʼE KAU KI AI TE KAU FAKANOFO?
4. He koʼe ʼe kai e te kau fakanofo te pane mo inu te vino ʼi te ʼAho Fakamanatu?
4 ʼI te taʼu fuli, ko te kau fakanofo ʼae ʼe kau ki te ʼAho Fakamanatu ʼe natou kai te pane mo inu te vino. Kotea tona tupuʼaga? Tou vakaʼi muʼa te aluʼaga ʼae neʼe hoko ʼi te po fakaʼosi ʼa Sesu ʼi te kele. Hili te taumafa ʼo te Pasikate, neʼe fai leva e Sesu te aluʼaga ʼae ʼe ui ia ʼaho nei ko te Taumafa ʼa Te ʼAliki. Neʼe ina tufa te pane mo te vino ki ʼana apositolo ʼe toko 11 mo ina ui age ke natou kai mo inu. Neʼe fakaha age e Sesu te ʼu fuakava ʼaeni ʼe lua: te fuakava foʼou mo te fuakava ki he Puleʼaga.b (Luka 22:19, 20, 28-30) ʼE fakafealagia e te ʼu fuakava ʼaia ke liliu te ʼu apositolo ʼaia pea mo he kiʼi kutuga ko he ʼu hau pea mo pelepitelo ʼi selo. (Fkha. 5:10; 14:1) ʼE kau te toe ʼo te kau fakanofoc ʼae kei maʼuʼuli ʼi te kele ki te ʼu fuakava ʼaia ʼe lua. Pea ʼe gata pe kia natou ʼaia ʼe feala tanatou kai te pane mo inu te vino ʼi te ʼAho Fakamanatu.
5. Kotea ʼe iloʼi e te kau fakanofo ʼo ʼuhiga mo tanatou ʼamanaki ʼae ki te maʼuli ʼi selo?
5 ʼE toe fakaʼamu te kau fakanofo ke natou kau ki te ʼAho Fakamanatu he ʼe ko te fealagia ʼaia ke natou fakakaukauʼi tanatou ʼamanaki. Neʼe foaki age e Sehova he ʼamanaki taulekaleka. ʼE natou maʼu ai anai he maʼuli tuputupua mo heʼe popo ʼi selo. ʼE natou tauhi fakatahi anai mo Sesu Kilisito pea mo ʼihi ʼo te toko 144 000. Kae ko te faʼahi ʼae ʼe maʼuhiga, ʼe natou tutuʼu ia muʼa ʼo Sehova ʼAtua. (1 Ko. 15:51-53; 1 Soa. 3:2) ʼE iloʼi e te kau fakanofo ʼe natou maʼu anai he ʼu gaue maʼuhiga ʼi selo. Kae kapau ʼe natou fia maʼuʼuli ʼi selo, ʼe tonu ke natou nonofo agatonu ʼo aʼu ki tanatou mamate. (2 Tim. 4:7, 8) ʼE fiafia anai te kau fakanofo ʼi tanatou fakakaukauʼi tanatou ʼamanaki ʼae ki te maʼuli ʼi selo. (Tito 2:13) Kae ʼe feafeaʼi ki “ ʼihi atu ovi”? (Soa. 10:16) He koʼe ʼe natou kau ki te ʼAho Fakamanatu?
HE KOʼE ʼE KAU KI AI ʼIHI ATU OVI?
6. He koʼe ʼe kau ʼihi atu ovi ki te ʼAho Fakamanatu ʼi te taʼu fuli?
6 Ka kau ʼihi atu ovi ki te ʼAho Fakamanatu, ʼe mole natou kai te pane mo inu te vino. Kae ʼe natou fiafia ʼi te kau ki ai. ʼI te 1938, neʼe ko te hoki fakaafe ʼae ʼo natou ʼae ʼe natou maʼu te ʼamanaki ki te maʼuli ʼi te kele ki te ʼAho Fakamanatu. ʼE ui fenei ʼi Te Tule Leʼo ʼaho 1 ʼo Apelili 1938: “ ʼE ko he meʼa lelei ia te kau [ʼa ʼihi atu ovi] ki te fono ʼaia pea mo mamata ki te meʼa ʼe hoko ai. . . ʼE toe fakafiafia kia natou.” Ka tou fakaafe te hahaʼi ki he faiʼohoana, ʼe natou fiafia ʼi te kau ki ai. Pea ʼe toe feia pe ki ʼihi atu ovi ʼe natou fiafia ʼi tonatou fakaafe ke ʼomai ʼo mamata ki te toʼotoʼoga ʼo te ʼAho Fakamanatu.
7. He koʼe ʼe fia fakalogo e ʼihi atu ovi te akonaki ʼo te ʼAho Fakamanatu?
7 ʼE fiafia ʼihi atu ovi ʼi te toe fakakaukauʼi ia tanatou ʼamanaki. ʼE natou fakaʼamu ke natou fakalogo te akonaki ʼo te ʼAho Fakamanatu he ʼe fakaha ai te aluʼaga ka fai e Kilisito mo ʼana toko 144 000 ki te hahaʼi agatonu ʼi tanatou Pule Ia Taʼu ʼe Afe. ʼE takitaki anai e te Hau ko Sesu Kilisito te ʼu hau ʼaia ʼi selo ke natou fakaliliu te kele ko he palatiso pea mo tokoni ki te hahaʼi fakalogo ke natou liliu ʼo haohaoa. ʼE fiafia anai te toko lauʼi miliona hahaʼi ʼae ka kau ki te ʼAho Fakamanatu ʼi te fakakaukauʼi te fakahoko ʼo te ʼu lea fakapolofeta ʼae ʼi te ka haʼu. Ohage la, ko te ʼu lea fakapolofeta ia Esaia 35:5, 6; 65:21-23 pea mo Fakaha 21:3, 4. ʼE feala ke natou fakakaukauʼi te temi ʼae ka natou fakatahi ai mo ʼonatou famili ʼae ʼe natou ʼofa mamahi ʼi te malama foʼou ʼaia. ʼE malohi ai anai tanatou tui ki tanatou ʼamanaki ʼaia ʼi te ka haʼu. Pea ʼe natou toe faiga malohi anai ke natou tauhi kia Sehova ʼo talu ai.—Mat. 24:13; Kal. 6:9.
8. Kotea te tahi tupuʼaga ʼo te kau ʼa ʼihi atu ovi ki te ʼAho Fakamanatu?
8 Kotea te tahi tupuʼaga ʼo te kau ʼa ʼihi ki te ʼAho Fakamanatu? Koteʼuhi ʼe natou fia fakaha tonatou ʼofa mo tanatou lagolago ki te kau fakanofo. Neʼe fakakikite ʼi te Tohi-Tapu ʼe gaue fakatahi te kau fakanofo mo natou ʼae ʼe natou maʼu te ʼamanaki ʼae ki te maʼuli ʼi te kele. ʼO feafeaʼi? Tou vakaʼi he ʼu faʼifaʼitaki.
9. Kotea neʼe fakakikite ʼi te lea fakapolofeta ʼae ia Sakalia 8:23?
9 Lau ia Sakalia 8:23. ʼE fakaha ʼi te lea fakapolofeta ʼaia te meʼa ʼae ʼe logoʼi e ʼihi atu ovi ʼo ʼuhiga mo ʼonatou tehina mo tuagaʼane fakanofo. Ka ui ʼi te vaega “he tagata Sutea” pea mo “koutou,” ʼe fakaʼuhiga ia ki te toe ʼo te kau fakanofo. (Loma 2:28, 29) ʼE fakata e te ʼu “tagata e toko hogofulu mai te u lea kehekehe fuli o te atu puleaga” ia ʼihi atu ovi. ʼE ‘puke maʼu’ anai e te ʼu ovi ʼaia ia natou, ko tona fakaʼuhiga ʼe natou nofo agatonu anai ki te kau fakanofo pea mo fakatahi kia natou ki te fai ʼo te tauhi maʼa. Koia ʼae ʼe agatonu ai ʼihi atu ovi ki te kau fakanofo ʼo natou kau mo natou ʼi te po ʼaia ʼo te ʼAho Fakamanatu.
10. Kotea ʼae neʼe fai e Sehova ke hoko te lea fakapolofeta ʼae ia Esekiele 37:15-19, 24, 25?
10 Lau ia Esekiele 37:15-19, 24, 25. Neʼe fakahoko e Sehova te lea fakapolofeta ʼaia. ʼO feafeaʼi? ʼAki tana faiga ke gaue fakatahi te kau fakanofo pea mo ʼihi atu ovi ʼi te logo tahi. E talanoa te lea fakapolofeta kia potu ʼakau ʼe lua. ʼE hage ia natou ʼae ʼe natou maʼu te ʼamanaki ki te maʼuli ʼi selo ko te potu ʼakau “kia Suta.” ʼE tou iloʼi neʼe filifili te ʼu hau ʼo Iselaele ʼi te telepi ʼo Suta. Pea ʼe hage ia natou ʼae ʼe natou maʼu te ʼamanaki ki te maʼuli ʼi te kele ko te potu ʼakau “o Efalaimi.”d E fakatahiʼi anai e Sehova te kau fakanofo pea mo ʼihi atu ovi ke natou liliu ko “he akau e tahi.” Ko tona fakaʼuhiga ʼe natou fakatahi anai ʼi te takitaki ʼo tonatou Hau ʼe tahi ko Kilisito Sesu. ʼI te taʼu fuli, ʼe kau fakatahi te kau fakanofo mo ʼihi atu ovi ki te ʼAho Fakamanatu. ʼE mole natou hage ko he ʼu kutuga ʼe lua ʼe tahi gaue kae ʼe ko “he faga ovi ʼe tahi” ʼe takitaki e he “tagata tauhi ovi ʼe tahi.”—Soa. 10:16.
11. ʼE fakaha feafeaʼi e “te ʼu ovi” ʼae ʼe talanoa ki ai ia Mateo 25:31-36, 40 tanatou lagolago ki te kau fakanofo?
11 Lau ia Mateo 25:31-36, 40. ʼE fakata e “te ʼu ovi” ʼo te lea fakata ʼaia te kau faitotonu ʼo te ʼu temi fakaʼosi, ʼae ʼe natou maʼu te ʼamanaki ki te maʼuli ʼi te kele, ia te tahi ovi. ʼE natou lagolago agatonu ki te toe ʼo te ʼu tehina fakanofo ʼo Kilisito. ʼE natou tokoni tafito ki te fakahoko ʼo te gaue maʼuhiga ʼaeni ko te faifakamafola ʼi te malamanei katoa mo te fai ʼo ni tisipulo.—Mat. 24:14; 28:19, 20.
12-13. Kotea te tahi aluʼaga ʼe feala ke fai e ʼihi atu ovi moʼo lagolago ki te ʼu tehina ʼo Kilisito?
12 ʼI te taʼu fuli, ʼe fakaha e ʼihi atu ovi tanatou lagolago ki te tehina ʼo Kilisito ʼi te ʼu vahaʼa ʼi muʼa ʼo te ʼAho Fakamanatu. ʼE natou fakaafe te hahaʼi fuli ki te ʼaho ʼaia. (Vakaʼi te ʼa takai “Neʼe Ke Fai Koa Hau ʼu Fakatuʼutuʼu Ki Te ʼAho Fakamanatu?”) ʼE toe tokoni te ʼu ovi ʼaia ke fai te ʼAho Fakamanatu ʼi te ʼu kokelekasio fuli ʼi te malamanei katoa, tatau aipe pe ʼe mole ʼi ai he tehina peʼe ko he tuagaʼane fakanofo ʼi tanatou kokelekasio. ʼE fiafia te ʼu ovi ʼaia ʼi te fakahoko ʼo te faʼahi ʼaia he ʼe natou lagolago ki te ʼu tehina ʼo Kilisito. ʼE natou iloʼi e sio ia Sesu ki te ʼu faʼahi ʼae ʼe natou fai ki ʼonatou tehina fakanofo. Pea ʼe hage pe kia ia ʼe natou fai maʼa ia totonu.—Mat. 25:37-40.
13 Kotea te tahi ʼu tupuʼaga ke tou kau fuli ai ki te ʼAho Fakamanatu?
HE KOʼE ʼE TONU KE TOU KAU FULI KI AI?
14. Neʼe fakaha feafeaʼi e Sehova mo Sesu tonā ʼofa mamahi ia tatou?
14 ʼE tou lotofakafetaʼi ki te ʼofa ʼo Sehova mo Sesu kia tatou. ʼE lahi te ʼu aluʼaga neʼe fai e Sehova ʼe ha ai tona ʼofa ia tatou. Kae neʼe ʼi ai te aluʼaga makehe neʼe ina fakaha ai tona ʼofa mamahi ia tatou. Neʼe ina fekauʼi mai tona ʼAlo ʼofaina ke haʼu ʼo mamahi mo mate maʼa tatou. (Soa. 3:16) ʼE tou iloʼi neʼe toe ʼofa mamahi ia Sesu ia tatou he neʼe lotolelei ke ina foaki tona maʼuli maʼa tatou. (Soa. 15:13) ʼE mahino ia, ʼe mole feala ke tou liufaki kia Sehova mo Sesu tonā ʼofa kia tatou. Kae ʼe feala ke tou fakaha tatatou lotofakafetaʼi ʼi totatou maʼuli ʼi te ʼaho fuli. (Kol. 3:15) Pea ka tou kau ki te ʼAho Fakamanatu, ʼe tou manatuʼi ai tonā ʼofa ʼae kia tatou pea ʼe tou toe fia fakaha ai totatou ʼofa ia naua.
15. He koʼe ʼe maʼuhiga ʼaupito te totogi ki te kau fakanofo pea mo ʼihi atu ovi?
15 ʼE tou lotofakafetaʼi lahi ki te totogi. (Mat. 20:28) ʼE maʼuhiga ʼaupito te totogi ki te kau fakanofo he ʼe ina fakafealagia ai ke natou maʼu tanatou ʼamanaki taulekaleka. Neʼe ui e Sehova ʼe natou faitotonu pea neʼe ina vaheʼi natou ko hana ʼu fanau koteʼuhi neʼe natou tui ki te sakilifisio ʼo Kilisito. (Loma 5:1; 8:15-17, 23) ʼE toe lotofakafetaʼi ʼihi atu ovi ki te totogi. ʼE natou tui ki te taʼataʼa ʼae neʼe liligi e Kilisito, koia ʼae ʼe natou maʼa ai ia muʼa ʼo te ʼAtua. Pea ʼe feala ai hanatou fai he tauhi taputapu ki te ʼAtua pea mo fakaʼamu ke natou fakalaka maʼuli ʼi te “toe mamahi lahi.” (Fkha. 7:13-15) ʼE fakaha e te kau fakanofo pea mo ʼihi atu ovi tanatou lotofakafetaʼi ʼo natou kau ki te ʼAho Fakamanatu ʼi te taʼu fuli.
16. Kotea te tahi tupuʼaga ʼo tatatou kau ki te ʼAho Fakamanatu?
16 Koʼeni te tahi tupuʼaga ʼo tatatou kau ki te ʼAho Fakamanatu: ʼE ko tatatou fia fakalogo kia Sesu. Pe ʼe tou maʼu te ʼamanaki ʼae ki selo peʼe ki te kele, kae ʼe tou fia fakalogo fuli ki te fakatotonu ʼaeni ʼa Sesu ʼi te po ʼo te ʼAho Fakamanatu: “Kotou haga fai te faʼahi ʼaeni moʼoku fakamanatu.”—1 Ko. 11:23, 24.
TE ʼU FUA LELEI ʼE FEALA KE TOU MAʼU
17. Ka tou kau ki te ʼAho Fakamanatu, ʼe tokoni feafeaʼi mai ai ke tou fakaovi kia Sehova?
17 ʼE tou fakaovi kia Sehova. (Sakp. 4:8) Ka tou kau ki te ʼAho Fakamanatu, ʼe ko he fealagia ʼaia ke tou fakakaukauʼi te ʼamanaki ʼae ʼe foaki mai e Sehova pea mo metitasio ki tona ʼofa mamahi kia tatou. (Sel. 29:11; 1 Soa. 4:8-10) Koia, ka tou fakakaukauʼi te ʼamanaki ʼae ka tou maʼu pea mo te ʼofa ʼo te ʼAtua kia tatou, ʼe toe malohi age anai totatou ʼofa kia Sehova pea mo ʼatatou felogoi mo ia.—Loma 8:38, 39.
18. Kotea ʼe tou fai anai moka tou metitasio ki te faʼifaʼitaki ʼa Sesu?
18 ʼE tou fia faʼifaʼitakiʼi ia Sesu. (1 Pet. 2:21) ʼI te ʼu ʼaho ʼi muʼa ʼo te ʼAho Fakamanatu, ʼe tou metitasio ki te ʼu hisitolia Fakatohi-tapu ʼo ʼuhiga mo te vahaʼa fakaʼosi ʼo Sesu ʼi te kele, mo tana mate pea mo tona fakatuʼuake. Pea ʼi te po ʼo te ʼAho Fakamanatu, ʼe fakamanatuʼi mai ai ʼi te akonaki te ʼofa ʼo Sesu kia tatou. (Efe. 5:2; 1 Soa. 3:16) Ka tou lau mo metitasio ki te hisitolia ʼo Sesu, ‘ ʼe tou fia haga haʼele anai ohage pe ko tana haʼele.’—1 Soa. 2:6.
19. ʼE feafeaʼi hatatou haga kaumeʼa mo te ʼAtua?
19 ʼE tou fakatotonu ke tou haga kaumeʼa mo te ʼAtua. (Suta 20, 21) Kapau ʼe tou fia haga kaumeʼa mo te ʼAtua, ʼe tou fai anai ia meʼa fuli ke tou fakalogo kia te ia, mo fakatapuha tona huafa pea mo fakafiafiaʼi tona loto. (Taag. 27:11; Mat. 6:9; 1 Soa. 5:3) Pea ka tou kau ki te ʼAho Fakamanatu, ʼe tou toe faiga malohi anai ke tou fakaha kia Sehova ʼi totatou maʼuli ʼe ‘tou fia nonofo ʼi tona ʼofa ʼo talu ai.’
20. He koʼe ʼe tou fia kau ki te ʼAho Fakamanatu?
20 Pe ʼe tou maʼu te ʼamanaki ki te maʼuli ʼo heʼe gata ʼi selo peʼe ʼi te kele, kae ʼe lahi te ʼu tupuʼaga ke tou kau ki te ʼAho Fakamanatu. ʼI te taʼu fuli, ka tou fakatahitahi ʼi te ʼaho ʼaia, ʼe tou manatuʼi te mate ʼo Sesu Kilisito, ʼae ʼe tou ʼofa mamahi. Kae ko te faʼahi ʼae ʼe maʼuhiga ʼaupito, ʼe ko tatatou manatuʼi te ʼofa mamahi ʼo Sehova kia tatou ʼaki tana foaki mai tona ʼAlo ko he totogi. ʼI te taʼu ʼaeni, ʼe fakahoko anai te ʼAho Fakamanatu ʼi te po ʼo te Feliaono ʼaho 15 ʼo Apelili 2022. E tou ʼoʼofa ia Sehova mo tona ʼAlo. Koia ʼae ʼe maʼuhiga ai ke tou kau ki te ʼaho ʼaia he ʼe tou fakamanatu ai te mate ʼo Sesu.
KATIKO 16 Ke Vikiʼi Sehova ʼUhi Ko Tona ʼAlo Fakanofo
a Pe ʼe tou ʼamanaki ke tou maʼuʼuli ʼi selo peʼe ʼi te kele, kae ʼe tou fiafia ʼi te kau ki te ʼAho Fakamanatu ʼi te taʼu fuli. ʼI te alatike ʼaeni, ʼe fakamahino ai ʼaki te Tohi-Tapu pe koʼe ʼe tou kau ki te Fakamanatu ʼo te mate ʼo Sesu pea kotea te ʼu fua lelei ʼe tou taʼofi mai ai.
b Kapau ʼe kotou fia mahino ki te fakaʼuhiga ʼo te fuakava foʼou pea mo te fuakava ki he Puleʼaga, kotou vakaʼi te alatike “ ʼE Kotou Liliu Anai Ko He Puleʼaga Fakapelepitelo,” ʼi Te Tule Leʼo ʼaho 15 ʼo Oketopeli 2014, ʼi te p. 12-15.
c HE ʼU FAKAMAHINO: Ka tou talanoa ki te toe ʼo te kau fakanofo, ʼe ko te kau fakanofo ʼae ʼe kei maʼuʼuli ʼi te kele.
d Kapau ʼe kotou fia mahino ki te lea fakapolofeta ʼo te ʼu potu ʼakau ʼe lua ʼae ʼe talanoa ki ai ia Esekiele kapite 37, kotou vakaʼi te alatike “Te ʼu Fehuʼi ʼa Te Kau Lautohi,” ʼi Te Tule Leʼo ʼo Sulio 2016.