Kei Ke Manatu’i Koa?

Neʼe ke lau fakalelei koa te ʼu Tule Leʼo ʼo te taʼu ʼaeni? Kapau koia, ʼahiʼahi tali ki te ʼu fehuʼi ʼaeni:

Kotea ʼae ʼe ina uga tatou ke tou foaki kia Sehova te kololia?

ʼE tou fakakololiaʼi ia Sehova he ʼe tou fakaʼapaʼapa lahi mo tou ʼoʼofa ia te ia. ʼE tou toe fakakololiaʼi ia Sehova he ʼe tou loto ke iloʼi ia ia e te hahaʼi.​—w25.01, p. 3.

Ka fakamamahiʼi tatou e he tahi, ʼe feafeaʼi hatatou lotofakamolemole?

ʼE mole tonu ke tou meʼa noaʼi te ʼu meʼa ʼae ʼe tou logoʼi. Kae kapau ʼe tou filifili ke mole kei tou iita pea mo pulihi ia tatou he loto ʼe kovi, ʼe tou hao ai mai te ʼu fua kovi ʼo he lotomamahi.​—w25.02, pp. 15-​16.

He koʼe ko te tisipulo ko Maleko ʼe ko he faʼifaʼitaki lelei maʼa te ʼu tehina tupulaga?

Neʼe lotolelei Maleko ke ina fakahoko he gaue pe ʼe foaki age. Logo la neʼe hoko he aluʼaga neʼe lagi lotomamahi ai mo ita kae neʼe kei fia tokoni pe ia Maleko. Neʼe fakakaumeʼa lelei mo Paulo pea mo te tahi ʼu hahaʼi neʼe kua fakapotopoto.​—w25.04, p. 27.

Neʼe ui e Sesu ʼi tana faikole kia Sehova: “Neʼe au fakaha age tou huafa.” (Soa. 17:26) Kotea tona fakaʼuhiga?

Neʼe kua ʼosi iloʼi e ʼana tisipulo te huafa ʼo te ʼAtua. Kae neʼe tokoni Sesu kia natou ke natou iloʼi lelei age ia Sehova, tafito Tana fakatuʼutuʼu ki te kele mo te tagata, mo te ʼu gaue neʼe ina fai mo ʼae ka ina fakahoko anai, ʼo feia pe mo Tona ʼu kalitate.​—w25.05, pp. 20-​21.

Kapau ʼe tou agavaivai, kotea ʼae ʼe tou mahino ki ai?

ʼE tou mahino ʼe ʼi ai te ʼu faʼahi ʼe mole tou iloʼi. Ohage la ʼe mole tou iloʼi te temi ka hoko ai te fakaʼosi peʼe ko te ʼu meʼa ʼae ka fai e Sehova ʼi te temi ʼaia. ʼE mole tou toe iloʼi pe kotea ʼae ka hoko ʼi te apogipogi. Pea ʼe mole tou mahino katoa ki totatou iloʼi lelei e Sehova.​—w25.06, pp. 15-​18.

ʼE ʼaoga feafeaʼi kia tatou he alatike peʼe ko he akonaki ki te kaugamalie?

ʼE feala ke tou fai te ʼu fehuʼi ʼaeni: ‘Kotea te ʼu fakamoʼoni ʼe au maʼu ai, moʼo fakamahino te moʼoni tafito ʼaia? Kotea te faʼifaʼitaki lelei ʼe feala ke au fakaʼaogaʼi mo akoʼi te moʼoni ʼaia ki he tahi? Ko ai la ʼe ina fia iloʼi te manatu ʼaia?’​—w25.07, p. 19.

Kotea ʼae ʼe tou ako ʼo ʼuhiga mo te fakamolemole moka tou tokagaʼi te meʼa ʼae neʼe fai e Sehova kia Tavite?

Logo la te ʼu agahala mamafa ʼae neʼe fai e Tavite, kae neʼe fakamolemole e Sehova ki ai ʼi tana fakahemala moʼoni. (1 Hau 9:​4, 5) Ka kua fakamolemole e Sehova ʼatatou agahala, kua ina galoʼi pea ʼe mole toe palalau ia ki ai.​—w25.08, p. 17.

Kapau ʼe faigataʼa ki he tahi ʼe ina ako te Tohi-Tapu hana mahino ki he manatu, kotea ʼae ʼe feala ke ke fai?

Kapau ʼe faigataʼa hana mahino ki ai logo la ʼau faiga ʼae ke ke fakamahino age ʼaki te Tohi-Tapu, tuku keheʼi muʼa te manatu ʼaia pea hoki kolua toe vakaʼi ki ʼamuli.​—w25.09, p. 24.

ʼE ui ʼi te Tohi-Tapu ko te agahala ’e ko he “malohi kaka.” (Hep. 3:13) Kotea tona fakaʼuhiga?

ʼE feala ke fakaneke tatou e te agahala ke tou fai he ʼu aga ʼe kovi. Pea ʼuhi ko totatou ʼuhiga agahala, ʼe mole kei tou tui ai ʼe ʼofa te ʼAtua ia tatou.​—w25.10, p. 16.

Fakaha faʼahi ʼe tolu ʼe tou fakaovi ai kia Sehova moka tou faikole.

(1) ʼE tou fakakaukauʼi ai ki te ʼu kalitate ʼo Sehova. (2) ʼE tou fakakaukauʼi ai ki ʼotatou fihifihia pea mo palalau ki ai, ohage la te maʼua ʼae ke tou fakamolemole ki he tahi. (3) ʼAua naʼa tou faikole fakavilivili kae tou fakaha kia te ia te ʼu meʼa ʼae ʼe tou logoʼi mo manatu ki ai.​—w25.10, pp. 19-​20.

Kotea ʼe feala ke tou fai moʼo tokoni ki te ʼu tehina mo tuagaʼane ʼae kua matutuʼa?

ʼE feala ke tou olo ʼo fakasiosio natou peʼe pauʼi tuʼumaʼu kia natou. ʼE feala ke tou kaugā olo mo natou ki te toketa pea mo faifakamafola mo natou.​—w25.11, pp. 6-7.

ʼE feafeaʼi he fakamaʼuhigaʼi e he tehina mo he tuagaʼane ia Sehova ʼi tonā ʼaho ʼohoana?

ʼE tonu ke nā fakalogo ki te ʼu lao ʼo te puleʼaga, mo faiga ke maui malie tonā ʼaho ʼohoana pea ke ha lelei ai te fua ʼo te laumalie ʼo te ʼAtua. ʼE tonu ke nā toe mulimuli ki ʼonā fealagia ʼo ʼuhiga mo te filifili ʼo ʼonā teu ʼohoana, ke ʼaua naʼa nā tali ni agaʼi fenua ʼe fakafeagai ki te Tohi-Tapu pea ke nā felogoi lelei moka nā teuteu tonā ʼohoana.​—w25.12, p. 21-​24.