ʼU Tehina Mo Tuagaʼane Matutuʼa, ʼe Kotou Maʼuhiga ʼi Te Kokelekasio

ʼE lagi mole kei ke lava fai he ʼu gaue he ʼe kua ke vaivai. ʼE lagi ke maʼu ai he ʼu manatu ʼe mole lelei ʼo ʼuhiga mo koe totonu, logo pe kua fualoa tau tauhi agatonu kia Sehova. Kae ʼe ke fakatatau te ʼu gaue neʼe ke fai ʼi te temi nei mo ʼae neʼe ke fai ʼi te temi ʼae. Kapau koia, kotea ʼe feala ke ke fai moʼo tekeʼi ia te faʼahiga manatu ʼaia?

TE MEʼA ʼAE ʼE LOTO E SEHOVA KE KE FAI

Ke ke fai te fehuʼi ʼaeni: ‘Kotea ʼae ʼe loto e Sehova ke au fai?’ ʼE feala ke ke maʼu he fakalotofimalie ʼi te ʼu palalau ʼaeni ia Tetelonome 6:5: “ ʼE tonu ke ke ʼofa kia Sehova tou ʼAtua ʼaki tou loto katoa, mo tou maʼuli katoa pea mo tou malohi katoa.”

ʼE ʼasi mai ʼi te vaega ʼaia ʼe loto e Sehova ke ke tauhi age kia te ia ʼaki tou loto katoa, mo tou maʼuli katoa pea mo tou malohi katoa. ʼE tokoni atu ia te manatu ʼaia ke mole ke fakatatau ʼau gaue mo ʼae ʼe fai e ʼihi peʼe mo ʼae neʼe ke fai ʼi tou temi malohi.

ʼI tau kei malohi neʼe lagi ke foaki kia Sehova te meʼa ʼae ʼe lelei tukupau. Kae kotea ʼe ke foaki kia Sehova ia ʼaho nei? ʼE mahino ia, ʼe ke foaki pe te meʼa ʼae ʼe lelei tukupau ʼo mulimuli pe ki tou aluʼaga peʼe ki te ʼu meʼa ʼe ke lava fai ʼi te temi nei. Kapau ʼe ke manatu feia, ʼe ke tokagaʼi pe anai ko te meʼa ʼae ʼe ke foaki kia Sehova ʼi te temi nei ʼe tatau pe mo ʼae neʼe ke foaki ʼi te temi muʼa. ʼI te temi ʼaia neʼe ke foaki kia Sehova te meʼa ʼae ʼe lelei tukupau, pea ʼi temi nei kei hoko atu pe tau fai te faʼahi ʼaia.

ʼE ʼAOGA TE ʼU MEʼA ʼAE NEʼE HOKO KIA KOE MOʼO TOKONI KI ʼIHI

ʼAua naʼa ke manatu ki te ʼu gaue ʼae ʼe mole kei ke lavaʼi. Kae ke ke fakakaukauʼi pe te ʼu faigamalie ʼe feala ai hau tokoni ki ʼihi ʼi tou ʼuhiga matuʼa. ʼE feala tau fai ʼihi faʼahi ʼi te temi nei neʼe mole ke lava fai ʼi tou temi malohi. Ohage la, kotea ʼae ʼe ke lava fai?

ʼE feala hau vaevae mo ʼihi te ʼu meʼa ʼae neʼe hoko kia koe. Fakakaukauʼi te ʼu palalau ʼaeni neʼe fai e he ʼu tagata ʼe lua ʼo te Tohi-Tapu:

Te Hau ko Tavite: “Neʼe au tupulaga kae ʼi te temi nei kua au matuʼa, kae neʼe heʼeki au sio kua liʼakina te tagata faitotonu, peʼe kumi moʼi pane ʼana fanau.”​—Pes. 37:25.

Sosue: “ ʼI te lakaga nei, kotou fakalogo mai! Koʼeni kua au vave mate. ʼE kotou iloʼi lelei pe, neʼe mole to noa he folafola ʼe tahi ʼi te ʼu fakapapau taulekaleka fuli ʼae neʼe fai atu e Sehova, tokotou ʼAtua. Neʼe hoko fuli te ʼu fakapapau ʼaia. ʼEi, neʼe mole to noa he folafola ʼe tahi.”​—Sos. 23:14.

Neʼe kua fualoa te tauhi ʼa Tavite mo Sosue kia Sehova. Koia, neʼe maʼuhiga age tanā ʼu palalau ʼaia he neʼe hoko moʼoni kia naua. ʼE lagi neʼe kua ke fai ʼi tou temi malohi he ʼu palalau feia. Kae ʼe lagi toe malave lahi age anai ki ʼihi ʼi te temi nei he neʼe hoko moʼoni kia koe.

Ohage la kapau kua fualoa tau tauhi ʼae kia Sehova, ʼe ke iloʼi e fakafiafia te tauhi ʼae kia te ia he neʼe ke sio tonu ki ai. Pea ʼe feala hau vaevae mo ʼihi ia te ʼu aluʼaga ʼaia. ʼE ke manatuʼi koa he aluʼaga neʼe ke sio ai neʼe makehe te tokoni ʼa Sehova ki tana hahaʼi? Kapau koia, pea fakamatala ki ʼihi. ʼE feala ke fakalotomalohi te taʼi ʼu fakamatala ʼaia ki te ʼu tehina mo tuagaʼane ʼo toe feia pe kia koe. Koia, ʼe feala ke ke fakalotomalohiʼi natou ʼaki hau fakamatala te ʼu aluʼaga neʼe hoko kia koe ʼi tau tauhi kia Sehova.​—Loma 1:​11, 12.

ʼE feala hau toe fakalotomalohiʼi ʼou tehina mo tuagaʼane moka ke alu ʼo fono ʼi te Fale Fono, mo kapau ʼe feala. ʼE mole ke fakalotomalohiʼi pe anai natou, kae ʼe ke toe maʼu ai anai he ʼu fakalotomalohi. ʼE ui fenei e Connie, ʼae kua tou talanoa ki ai: “Ka au alu ki te ʼu fono ʼe tokoni mai ke mole au lotovaivai. ʼE fakaha mai ai e te ʼu tehina mo tuagaʼane ia tonatou ʼoʼofa ia au. ʼE au faiga ke au lotofakafetaʼi kia natou, ʼo au foaki age hanatou ʼu kiʼi meʼa ʼofa. Pea ʼe au haga kau pe ki te ʼu gaue fakalaumalie fakatahi mo ʼoku tehina mo tuagaʼane.”

ʼE MAʼUHIGA KIA SEHOVA TAU TAUHI AGATONU

ʼE talanoa ʼi te Tohi-Tapu ki he ʼu hahaʼi neʼe mole kei lahi te ʼu gaue neʼe natou fai maʼa Sehova kae neʼe kei ʼofa pe ia natou. Ohage la, ko Simeone te tagata Iselaele, neʼe kua matuʼa ʼi te temi ʼae neʼe tupu ai ia Sesu. ʼI tana alu ki te fale lotu, neʼe lagi sio ki he ʼu tagata malolohi neʼe natou fakahoko he ʼu gaue maʼuhiga. Pea neʼe lagi manatu ia Simeone ʼe mole kei maʼuhiga kia Sehova he ʼe kua matuʼa. Kae neʼe mole ko te manatu ʼaia ʼa Sehova. Neʼe sio ia neʼe ko he tagata “faitotonu pea neʼe manavasiʼi” kia te ia. Neʼe ina foaki age te pilivilesio ʼae ke sio ki te tamasiʼi ko Sesu. Neʼe toe fakaʼaogaʼi pe la ia ia e Sehova moʼo tala he lea fakapolofeta ʼo ʼuhiga mo te Mesia. Pea “neʼe takitaki e te laumalie maʼoniʼoni” ia ia. (Luka 2:​25-​35) Koia, ʼe ha mai ai neʼe tokagaʼi tafito e Sehova te tui malohi ʼa Simeone kae mole ko tana kua vaivai matuʼa.

ʼE ke tui papau ʼe maʼuhiga kia Sehova tau tauhi agatonu kia te ia, logo la ʼe mole kei ke lava fai ʼihi gaue. Ka fai he sakilifisio ‘ ʼo mulimuli ki te meʼa ʼae ʼe tou maʼu, kae mole ki te meʼa ʼae ʼe mole tou maʼu’ ʼe tali lelei e Sehova.​—2 Ko. 8:​12.

Koia, ke ke tokaga tafito ki te meʼa ʼae ʼe ke lavaʼi. Ohage la ke ke fai te ʼu fehuʼi ʼaeni: Kotea la he ʼu faʼahiga fai ʼi te fakamafola kei feala ke au kau ai, maʼia pe mole fualoa? ʼE feala koa haku pauʼi ki he tahi mo faitohi ki ai moʼona fakalotomalohiʼi? Ka tou fai te ʼu kiʼi faʼahi ʼaia ʼaki te ʼofa, ʼe malave anai ki ʼotatou tehina mo tuagaʼane, kae tafito age la moka ʼe fai e he tahi kua fualoa hana tauhi kia Sehova.

ʼE kei lahi pe te ʼu gaue ʼe feala ke ke fai maʼa Sehova, logo la tou kua vaivai matuʼa. ʼE ha te faʼahi ʼaia ʼi te faʼifaʼitaki ʼo te tuagaʼane mai he fenua Afelika. ʼE tou maʼu ʼi te alatike ʼaeni tona fakamatala ʼi te ʼa takai “Neʼe Haofaki Ai Tona Maʼuli.”

Ke ke manatuʼi ʼe feala hau fakalotomalohiʼi ʼihi ʼuhi ko tau tui mo tau nofo agatonu talu mai fualoa. ʼE ke tuku he faʼifaʼitaki lelei ʼo ʼuhiga mo te faʼa kataki. Pea ke ke tui papau ‘ ʼe mole heʼe faitotonu te ʼAtua ke ina galoʼi tau gaue mo te ʼofa ʼae neʼe ke fakaha ki tona huafa ʼi tau tauhi ki te kau maʼoniʼoni ʼi muʼa atu pea mo tau haga fai ʼi te temi nei.’​—Hep. 6:​10.

KE KE MAʼUMAʼUA TUʼUMAʼU

ʼE ha ʼi te ʼu sivi neʼe fai tokolahi te ʼu tagata mo fafine vaivavai, ʼae ʼe tokoni ki ʼihi, ʼe natou maʼu he maʼuli malolo fakasino ʼe lelei. Pea ʼe natou toe maʼu he ʼatamai ʼe lelei pea mo maʼuli fualoa.

ʼE mole tou ui leva ʼe mole hoko kia tatou te ʼu nunuʼa ʼo te vaivai matuʼa moka ʼe lahi te ʼu gaue lelei ʼe tou fai. ʼE ko te Puleʼaga pe ʼo te ʼAtua ʼae ka ina pulihi te agahala, ʼae ʼe tupu ai tatatou vaivai matuʼa pea mo mamate.​—Loma 5:​12.

ʼE maʼuhiga tau tauhi kia Sehova, tafito tau tokoni ki ʼihi ke natou ako ke natou iloʼi ia ia. ʼI tau fai te faʼahi ʼaia, ʼe malohi tuʼumaʼu anai tau ʼamanaki pea ʼe toe fua lelei ki tou maʼuli malolo. Ke ke manatuʼi ʼe maʼuhiga ʼaupito kia Sehova te ʼu gaue ʼe ke fai maʼa te ia, pea ʼe toe maʼuhiga ki te kokelekasio ia tau tui.