KA TOTOGI KOVI TE MAʼULI

Kotou Maʼuli Fakafeʼauga

Ko te hahaʼi ʼae ʼe maʼuli fakafeʼauga ʼe natou maʼuli lelei. Pea ka fetogi tonatou aluʼaga, ʼe natou maʼuʼuli pe ʼo mulimuli ki te foʼi falā ʼae ʼe natou maʼu.

HE KOʼE ʼE MAʼUHIGA?

ʼE ui e te toketa ko Jessica Koehler, ʼi te agamahani ko te hahaʼi ʼae ʼe maʼuli fakafeʼauga ʼe natou maʼu he ʼu manatu ʼe lelei pea ʼe mole natou maheka. Koia ʼae ʼe natou maʼuli fiafia ai pea ʼe mole natou hoha fau. ʼI tona fakahagatonu, ʼe mole lahi te ʼu koloa ʼe maʼu e natou ʼae ʼe maʼuli fiafia. Pea ʼe moʼoni te aluʼaga ʼaia, ʼo ʼuhiga mo te hahaʼi ʼae ʼe tokakaga ki te ʼu faʼahi ʼae ʼe maʼuhiga ʼaupito ki tonatou maʼuli. Ohage la, ko te fiafia ʼae ʼe tou maʼu moka tou fakatahi mo totatou kiʼi famili peʼe ko ʼotatou kaumeʼa.

“Kapau ʼe tou maʼu he meʼa kai pea mo ni mutuʼi meʼa, ʼe tou feʼauga anai ʼi te ʼu meʼa ʼaia.”—1 Timoteo 6:8.

KOTEA ʼE FEALA KE KOTOU FAI?

ʼAua takotou fakatatau ia koutou mo ʼihi. Kapau ʼe kotou fakatatau tokotou maʼuli fakafeʼauga mo te maʼuli koloaʼia ʼo ʼihi, ʼe mole kotou fiafia anai mo maheka. Pea ʼe feala pe ke tou faihala ʼo ʼuhiga mo te ʼu faʼahi ʼae ʼe tou sisio ki ai. ʼE lagi tuʼu maʼua te hahaʼi ʼae ʼe lahi ʼonatou koloa. Ko Nicole ʼae ʼe maʼuli ʼi Sénégal, ʼe ina ui: “ ʼE mole ʼaoga mai he ʼu tuʼuga meʼa ke au maʼuli fiafia ai. Kapau ʼe au feʼauga pe ʼi te ʼu meʼa ʼae ʼe au maʼu, ʼe au fiafia anai tatau aipe pe lahi age te ʼu koloa ʼo ʼihi.”

ʼAhiʼahi fai te faʼahi ʼaeni: ʼAua takotou sioʼi te ʼu fakahaha koloa peʼe ko te ʼu pasina ʼi te Neti ʼae ʼe talanoa ki te falā mo te ʼu koloa ʼae ʼe maʼu e ʼihi.

“Maʼia mo ia ʼae ʼe maʼu koloa, ʼe mole fakalogo tona maʼuli ki te ʼu koloa ʼae ʼe ina maʼu.”—Luka 12:15.

Kotou lotofakafetaʼi. Ko te hahaʼi ʼae ʼe lotofakafetaʼi, ʼe feʼauga pe natou ʼi te ʼu meʼa ʼae ʼe natou maʼu. ʼE mole natou manatu ʼe ʼaoga ke lahi age te ʼu meʼa ʼae ʼe natou maʼu. ʼE ui e Roberton ʼae ʼe maʼuli ʼi Haïti: “ ʼE au toʼo he temi ke au fakakaukauʼi te agalelei ʼae ʼa ʼihi kia au mo toku kiʼi famili. Pea ʼe au fakaha age kia natou ʼe au lotofakafetaʼi ki te ʼu meʼa ʼae ʼe natou fai. ʼE au akoʼi ki toku foha ʼae kua taʼu valu ke fakamalo ki te ʼu meʼa fuli ʼae ʼe foaki age ki ai.”

ʼAhiʼahi fai te faʼahi ʼaeni: ʼI te ʼaho fuli, kotou tohi he tupuʼaga ʼe kotou fiafia ai. ʼE lagi lelei tokotou maʼuli malolo, peʼe logo tahi tokotou kiʼi famili, peʼe kotou maʼu ni kaumeʼa moʼoni peʼe kotou sioʼi te to ʼo te laʼa mo tona taulekaleka.

“Ko ia ʼae ʼe fiafia ʼe kau tuʼumaʼu ki he kaitahi.”—Taʼaga Lea 15:15.

ʼE mole faigafua tuʼumaʼu te maʼuli fakafeʼauga. Kae ʼe tuha ia mo ʼatatou faiga. Kapau ʼe tou filifili ke tou maʼuli fakafeʼauga pea ʼe tou fiafia anai. Ko he aluʼaga ia ʼe mole feala ke totogi ʼaki te paʼaga.