Mai Te Tulivio ʼo Aʼu Ki Te Fakahāo ʼAē Mai Esipito

Neʼe ko te toko valu pe ʼaē neʼe hāo ʼi te Tulivio, kae ʼaki te temi neʼe fakahaʼuhaʼu te kaugamālie ʼo te hahaʼi ʼo lauʼi afe. Ki muli age, ʼi te hili ʼo taʼu e 352 ki te ʼosi ʼo te Tulivio, neʼe tupu ia Apalahamo. ʼE tou ako ai pe neʼe fakahoko feafeaʼi e te ʼAtua tana fakapapau ʼi tana foaki kia Apalahamo tona foha ʼaē neʼe higoa ko Isaake. Ki muli age, ʼi te ʼu foha e lua ʼo Isaake, neʼe ko Sakopo ʼaē neʼe fili e te ʼAtua.

Neʼe hahaʼi te famili ʼo Sakopo, ko tona ʼu foha e toko 12 pea mo tona ʼu ʼofafine. Ko te ʼu foha e toko 10 ʼo Sakopo neʼe nātou fehiʼa ki tonatou tēhina veliveli ʼaē ko Sosefo, pea neʼe nātou fakatau ia ia ke ʼalu ʼo nofo popūla ʼi Esipito. Ki muli age, neʼe liliu ia Sosefo ko he tagata maʼuhiga ʼi Esipito. ʼI te hoko mai ʼo te hoge, neʼe ʼahiʼahiʼi e Sosefo tona ʼu tēhina ke feala ai hana ʼiloʼi peʼe kua fetogi tonatou loto. ʼOsi ʼaia, pea ʼōmai te famili katoa ʼo Sakopo, ia te kau Iselaelite ki Esipito. Neʼe hoko te meʼa ʼaia ʼi te hili ʼo taʼu e 290 ki te ʼosi tupu ʼa Apalahamo.

ʼI te ʼu taʼu e 215 ki muli age, neʼe nonofo te kau Iselaelite ʼi Esipito. ʼI te ʼosi mate ʼo Sosefo, neʼe nātou liliu ko ni hahaʼi popūla ʼi te fenua ʼaia. Pea neʼe tupu leva ia Moisese, pea neʼe fakaʼaogaʼi ia ia e te ʼAtua moʼo fakahāo ʼo te kau Iselaelite mai Esipito. Ko tona fakakatoa ko taʼu e 857 ʼaē neʼe hoko ai te ʼu hisitolia ʼo te Faʼahi LUA.