Ko Te Hau Agakovi ʼi Esipito

KO TE ʼu tagata ʼaē ʼi te paki ʼe nātou fakamālohiʼi te hahaʼi ke nātou gāue. Koutou sio age muʼa ki te tagata ʼaē ʼe ina haha te tahi tagata gāue ʼaki te huipi! Ko te kau gāue ʼe ko te famili ʼo Sakopo, pea neʼe fakahigoaʼi nātou ko te kau Iselaelite. Pea ko te ʼu tagata ʼaē ʼe nātou fakamālohiʼi nātou ke nātou gāue, ʼe ko te kau Esipito. Kua liliu te kau Iselaelite ko te hahaʼi kaugana ʼa te kau Esipito. Neʼe hoko feafeaʼi te faʼahi ʼaia?

Neʼe maʼuʼuli fīmālie te famili ʼo Sakopo ʼi Esipito lolotoga ni ʼu taʼu. Ko Sosefo, ʼaē neʼe ko te tagata maʼuhiga ʼaupito ʼi Esipito ʼo hoa atu ki te hau ko Falaone, neʼe tokaga ia kia nātou. Kae neʼe mate leva ia Sosefo. Pea neʼe mole ʼofa te Falaone foʼou ki te kau Iselaelite, ʼaē neʼe fakanofo ke hau ʼi Esipito.

Koia, ko te Falaone agakovi ʼaia neʼe ina fakapōpulaʼi te kau Iselaelite. Pea neʼe ina fakanofo te ʼu tagata agakovi pea mo agamālohi ke pule kia nātou. Neʼe nātou fakamālohiʼi te kau Iselaelite ke nātou gāue kinakina moʼo laga te ʼu kolo maʼa Falaone. Kae neʼe tuputupu te kau Iselaelite ʼo kaugamālie. Pea neʼe matataku leva te kau Esipito naʼa liliu te kau Iselaelite ʼo hahaʼi age pea mo mālolohi age ia nātou.

ʼE koutou ʼiloʼi koa pe koteā te meʼa ʼaē neʼe fai e Falaone? Neʼe palalau ia ki te ʼu fafine ʼaē ʼe nātou fakafānauʼi te hahaʼi fafine Iselaelite, ʼo ina ʼui age: ‘ ʼE tonu ke koutou tāmateʼi te ʼu tamaliki tagata fuli ʼaē ʼe nātou fānauʼi.’ Kae neʼe agalelei te ʼu fafine ʼaia pea neʼe mole nātou tāmateʼi te ʼu kiʼi tamaliki.

Koia neʼe fai ai e Falaone te fakatotonu ʼaenī ki tana hahaʼi fuli: ‘Koutou toʼo te ʼu kiʼi tamasiʼi tagata ʼa te kau Iselaelite pea ke koutou tāmateʼi ia nātou. Gata pe ki te tamaliki fafine koutou tuku ke maʼuʼuli.’ ʼE mole fakamataku koa la te fakatotonu ʼaia? Tou vakaʼi muʼa pe neʼe feafeaʼi te hāofaki ʼo te kiʼi tamasiʼi ʼi te ʼu kiʼi tamaliki ʼaia.