Ko Te Faʼahiga Faiakonaki ʼa Sesu

ʼI TE tahi ʼaho neʼe ʼui e Sesu ki te tagata, ʼe tonu ke ʼofa ki tona kāiga. Neʼe fehuʼi age e te tagata kia Sesu: ‘Ko ai toku kāiga?’ Neʼe ʼiloʼi e Sesu te manatu ʼa te tagata ʼaia. ʼI te manatu ʼa te tagata, ʼe fakagata pe tona kāiga ki te hahaʼi ʼaē ʼe fenua tahi mo ia pea mo lotu tahi mo ia. Koia tou vakaʼi pe koteā te meʼa ʼaē neʼe ʼui age e Sesu ki ai.

ʼI ʼihi temi ʼe faiakonaki ia Sesu ʼo ina fakamatala he hisitolia. Ko te meʼa ʼaia ʼaē ka ina fai anai ʼi te temi ʼaenī. ʼE ina fakamatala te hisitolia ʼo te tagata Sutea pea mo te tagata Samalitana. Neʼe kua ʼosi tou vakaʼi ko te tokolahi ʼo te kau Sutea ʼe mole nātou ʼoʼofa ki te kau Samalitana. Pea koʼeni te meʼa ʼaē neʼe fakamatala e Sesu:

ʼI te tahi ʼaho neʼe hifo te tagata Sutea ʼi te ala moʼugaʼia ʼo ʼalu ki Seliko. Kae neʼe ʼohofi ia ia e te kau kaihaʼa. Neʼe nātou faʼao tana paʼaga pea nātou tā ia ia ʼo meihiʼi pe ke mate.

Ki muli age, neʼe hifo te pelepitelo ʼi te ala ʼaia. Neʼe sio ia ki te tagata ʼaia ʼaē neʼe tā. ʼI takotou manatu neʼe koteā te meʼa ʼaē neʼe ina fai? Neʼe fakalaka ia ki te tahi kauala pea hoko atu tona fagona. Pea kaku mai te tahi tagata ʼe tauhi lotu. Neʼe ko te Levite. Neʼe tuʼu koa tona fagona? Kailoa, neʼe mole tuʼu ia ʼo tokoni ki te tagata ʼaia neʼe tā. ʼE koutou sio ki te pelepitelo pea mo te tagata Levite ʼaē ʼe hoko atu tonā fagona ʼi te ala.

Kae ʼe koutou sio kia ia ʼaē ʼe nofo mo te tagata ʼaē neʼe tā. ʼE ko te tagata Samalitana. Pea neʼe tokoni ki te tagata Sutea. Neʼe ina haʼi tona ʼu lavea, pea ina ʼave te tagata Sutea ki he potu ʼe feala ke mālōlō ai pea ke faitoʼo ai tona ʼu lavea.

ʼI tana ʼosi fakamatala te hisitolia, neʼe fehuʼi age e Sesu ki te tagata ʼaē neʼe ina lagaʼi te fehuʼi: ‘ ʼI tau manatu ko ai ʼi te ʼu tagata ʼaia e toko tolu ʼe ko te kāiga ʼo te tagata ʼaē neʼe tā? Neʼe ko te pelepitelo koa, pe ko te tagata Levite peʼe ko te tagata Samalitana?’

Neʼe tali age e te tagata: ‘Ko te tagata Samalitana. He neʼe ʼofa ia ki te tagata ʼaē neʼe tā.’

Neʼe ʼui age e Sesu: ‘ ʼE tonu. ʼAlu la pea ke ke toe fai feiā mo koe ki te hahaʼi.’

ʼE koutou leleiʼia koa la te faʼahiga faiakonaki ʼa Sesu? ʼE lahi te ʼu meʼa maʼuhiga ʼe feala ke tou ako ai, mo kapau ʼe tou tokaga lelei ki te ʼu meʼa ʼaē ʼe ʼui e Sesu ʼi te Tohi-Tapu.