Kapite 73

Ko He Samalitana Lotoʼofa

E LAGI ʼe nofo Sesu ʼo ōvi atu ki Petania, ko te kolo ʼaia ʼe vaha ia kilometa e tolu mo Selusalemi. Neʼe fakaōvi age kia te ia te tagata ʼe ina ʼiloʼi lelei te Lao ʼa Moisese ʼo ina fehuʼi age kia te ia: “Faiako, koteā te meʼa ʼe tonu ke ʼau fai ʼe feala ai anai taku maʼu te maʼuli heʼegata?”

ʼE ʼiloʼi lelei pe e Sesu ko te tagata ʼaia, ko he tagata ʼe poto ʼi te lao, neʼe mole ina fai age pe te fehuʼi ʼaia ʼuhi pe ko tana fia mahino, kae neʼe ina fia ʼahiʼahiʼi ia ia. E lagi neʼe ina fia uga ia Sesu ke ina fai mai he tali ʼe fakafeagai anai ki te ʼu loto ʼo te kau Sutea. Neʼe faigaʼi e Sesu ke palalau te tagata, ʼo ina fehuʼi age ki ai: “Koteā koa ʼaē neʼe tohi ʼi te Lao? E feafeaʼi tau lau te faʼahi ʼaia?”

ʼAki te faʼahiga fakasiosio lelei, neʼe lau age e te tagata ʼe poto ʼi te lao, te lao ʼa te ʼAtua ʼaē ʼe tuʼu ia Teutalonome 6:5 pea mo Levitike 19:18, ʼaē ʼe ʼui ai fēnei: “ ‘ ʼE maʼua ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou mālohi katoa, pea mo tou ʼatamai katoa’, pea ‘ke ke ʼofa ki tou kāiga ohage pe ko tau ʼofa ʼaē kia koe totonu’.”

“ ʼE tonu tau tali, ko te ʼui age ʼaia ʼa Sesu; haga fai te meʼa ʼaia pea ʼe ke maʼu ai anai te maʼuli.”

Kae neʼe mole fīmālie te loto ʼo te tagata ʼe poto ʼi te lao. Ko te tali ʼaē ʼa Sesu neʼe mole ina totonu ia. Neʼe loto ia ke fakamoʼoni age e Sesu ʼe lelei tana manatu pea ʼe faitotonu ia ʼo ʼuhiga mo te fai ʼo tana aga ki niʼihi. Koia ʼaē neʼe ina fehuʼi age ai: “Pea ko ai toku kāiga?”

ʼI te manatu ʼa te kau Sutea ko te kupu ʼaē ko te “kāiga” ʼe fakagata ʼaki pe ʼi tonatou ʼu kaugā fagona Sutea, ohage ko tona tuʼu mai ia Levitike 19:18. Pea, ki muli mai, neʼe ʼui fēnei ai e te ʼapositolo ko Petelo: “ ʼE koutou ʼiloʼi lelei pe ʼe tapu ki he tagata Sutea, ia tana fakatahi mo he tagata ʼo he tahi atu lanu peʼe ko he fakaōvi ki ai.” Koia, ko te tagata ʼe poto ʼi te lao pea lagi feiā pe mo te ʼu tisipulo ʼa Sesu neʼe ʼui maʼa nātou ʼe nātou faitotonu mokā e nātou manavaʼofa pe ki niʼihi ʼi te kau Sutea, heʼe, ʼi tanatou manatu, ko ʼaē ʼe mole Sutea ʼe mole ko honatou kāiga.

ʼE feafeaʼi anai te fakatonutonuʼi e Sesu, ʼo tanatou ʼu manatu ke ʼaua naʼa fakatupu tūkia kia nātou ʼaē ʼe fakalogo age? Neʼe ina fakamatala te hisitolia, e lagi ko he hisitolia neʼe hoko moʼoni. “Ko he tagata [Sutea] neʼe hifo mai Selusalemi ki Seliko, pea neʼe fetaulaki ia mo te kau agakovi ʼo nātou kaihaʼa ia ia pea mo tāmateʼi, pea nātou ʼolo, kae nātou siʼaki ia ia kua teitei mate.”

Neʼe hoko atu tana fakamatala: “Pea fokifā pe neʼe hifo ifo te pelepitelo ʼi te ala ʼaia, pea ʼi tana sio ki te tagata, neʼe fetogi kau ala ia pea hoko atu tona fagona. ʼO feiā foki, mo te tagata Levite, ʼi tana kaku mai ki te potu ʼaia pea ʼi tana sio ki ai, neʼe fetogi kau ala ia ʼo hoko atu tona fagona. Kae neʼe ʼi ai leva te Samalitana, neʼe haʼu tona fagona ʼi te ala ʼaia, ʼi tana kaku mai ki ʼona tafa pea, mo tana sio ki ai, neʼe ia te ia te manavaʼofa.”

Tokolahi te ʼu pelepitelo, pea mo te ʼu Levite ʼe tokoni kia nātou ʼi te ʼu fale lotu ʼo Selusalemi, ʼe nonofo ʼi Seliko. Koia, ʼi tanatou toe hifo ki tonatou ʼu ʼapi, ko te mahifo ʼo te ala ʼe ko te ʼu meta e 900, ʼe feala ai foki ke nātou haʼele ʼi he ʼu kilometa e tolugofulu ʼi he ala ʼe fakatupu tuʼutāmaki. E lagi ʼi tatatou manatu ko te pelepitelo pea mo te tagata Levite ʼe nā tokoni anai ki tonā tēhina Sutea ʼe tau mo te mamahi. Kailoa. Neʼe ko te tagata Samalitana ia ʼaē ka ina fai te faʼahi ʼaia. E lahi te fehiʼa ʼa te kau Sutea ki te kau Samalitana, koia ʼaē neʼe nātou tauveleʼi ai Sesu ʼi tanatou ʼui ʼaē ko ia ko te “Samalitana”.

Neʼe feafeaʼi koa te tokoni ʼa te Samalitana ki te tagata Sutea? “Neʼe fakaōvi age kia ia pea ina haʼi tona ʼu lavea, ʼo ina liligi ki ai te moʼi lolo pea mo te moʼi vino. ʼOsi ʼaia pea ina fakaheka ia ia ki tana manu, pea ina ʼave ki he fale tali fagona pea ina taupau lelei ki ai. Pea ʼi te ʼaho ake neʼe ina toʼo tenalio e lua [ʼe ko he totogi ʼaia ʼo he gāue ʼi te ʼu ʼaho e lua], ʼo ina ʼavage ki te tagata ʼo te fale tali fagona ʼo ʼui maʼana: ‘Ke ke taupau lelei ki ai pea, ko te falā ʼaē ka ke toe fakaʼaoga anai ki ai, ʼe ʼau totogi atu anai ʼi taku liliu mai.’ ”

ʼI te ʼosi ʼo tana fakamatala neʼe fehuʼi age leva e Sesu ki te tagata ʼe poto ʼi te lao: “Ko ai ʼi te toko tolu ʼaia neʼe ko te kāiga ʼo te tagata ʼaē neʼe fetaulaki mo te kau agakovi?”

ʼI tana mole leleiʼia te vikiʼi ʼo he Samalitana, neʼe tali age pe e te tagata ki ai: “Ko ia ʼaē neʼe manavaʼofa kia te ia.”

“ ʼAlu, pea mo koe foki, ke feiā tau aga”, ko te ʼui age fakaʼosi ʼaia ʼa Sesu.

Ka na pau la neʼe ʼui age fakahagatonu e Sesu ki te tagata ʼe poto ʼi te lao ko nātou fuli ʼaē ʼe mole Sutea ko tona kāiga, ʼe mole gata ʼaki pe te fakafisi ʼa te tagata ki te faʼahi ʼaia, kae ko ʼihi ia nātou fuli neʼe ʼi ai neʼe feala ke toe kau mo nātou ki te fai palalau mo Sesu. Kae, ko te fakamatala moʼoni ʼaia ʼe hā mai ai ko totatou kāiga ʼe kau ai foki mo te hahaʼi ʼaē ʼe mole lanu tahi pea mo fenua tahi mo tatou. ʼE moʼoni, ko Sesu ko te tagata faiakonaki fakatalakitupua! Luka 10:25-37; Gāue 10:28; Soane 4:9; 8:48.

▪ Koteā te ʼu fehuʼi neʼe fai age e te tagata ʼe poto ʼi te lao kia Sesu, pea koteā koa tana ʼu manatu?

▪ Ki te kau Sutea, ko ai koa ʼaē ko tonatou kāiga? Koteā te ʼu tupuʼaga ʼe feala ke ʼui ai ʼe toe manatu feiā mo te kau tisipulo?

▪ Neʼe feafeaʼi te fakamahino age e Sesu te manatu ʼaē ʼe lelei ke ʼaua naʼa fakafeagai age te tagata ʼe poto ʼi te lao?