Ko Te Tā ʼo Te ʼu Tohi Faka Tohi-Tapu Moʼo Fakavikiviki ʼo Te ʼAtua
Ko te kau Fakamoʼoni ʼa Sehova ʼe ʼiloa lelei ia nātou ʼi tanatou faka mafola te Puleʼaga ʼo te ʼAtua ʼaki te ʼu tohi. Talu mai te taʼu 1920 neʼe fakaʼaogaʼi e te Sosiete Watch Tower te hahaʼi ʼe nātou gāue ʼi tonatou lotolelei, pea ko nātou ʼaia ko te kau Fakamoʼoni, ke nātou tā te ʼu nusipepa pea mo te ʼu tohi ke tufa ki te hahaʼi. Ko te faʼahi ʼaia neʼe faigamālie ai te tā ʼo he ʼu tohi ʼe mole faʼa totogi kovi.
Talu mai he ʼu taʼu e 70, neʼe fakatuputupu pea mo fakalahi e te Sosiete te tā ʼo tana ʼu tohi faka Tohi-Tapu, ʼuluaki ʼi Brooklyn pea ki muli age ʼi te tahi ʼu fenua. Ko te gāue fuli ʼaia neʼe fai e te hahaʼi ʼe nātou gāue ʼi tonatou lotolelei pea ʼe mole gata te tuputupu ʼo tonatou kaugamālie.
ʼI te fakaʼosi ʼo te ʼu taʼu 1970 neʼe tuku leva te ʼu faʼahiga meʼa ʼāfea pea neʼe nātou fakaʼaogaʼi te olotinatea, pea mo te masini tā tohi ʼaē ʼe higoaʼi ko te offset. Ko te faigataʼaʼia pe ʼo te masini ʼaia he neʼe faka tuʼakoi te ʼu lea ʼaē ʼe feala ke ina tā kiai te ʼu tohi. Kae, neʼe kua tā e te Sosiete te ʼu tohi ʼi te ʼu lea e 160, pea neʼe ʼaoga ke ina toe ʼai kiai he tahi ʼu lea.
Koia, neʼe pāuiʼi ai te hahaʼi ʼe fia gāue ʼi tonatou lotolelei ke nātou fai he polokalama faka olotinatea ʼe feala ke fakaʼaogaʼi ʼi te ʼu lea kehekehe. Neʼe fua lelei te ʼu faiga ʼaia. Neʼe lavaʼi te pulihi māmālie ʼo te ʼu faigataʼaʼia ʼi te ʼu faʼahi ʼaia, pea neʼe fakatuʼutuʼu ai te faʼahiga polokalama faka olotinatea moʼo fakaliliu, pea mo faka ʼulu ʼo te ʼu alatike ki ʼu pasina, pea mo te photocomposition, ʼaē neʼe fakahigoaʼi ko te MEPS. Ko te polokalama ʼaia neʼe fakatuʼutuʼu ki te ʼu lea e 210. Pea ʼe mole faka tuʼakoi ki te ʼu lea pe ʼaia.
Ia ʼaho nei ko te alatike ʼaē ʼe fakaliliu ʼe fai ʼaki te polokalama MEPS ʼi te ʼu fenua e 100 tupu. Ko te hahaʼi ʼe nātou gāue ʼi tonatou lotolelei neʼe ʼōmai mai te ʼu fenua ʼaia ke akoʼi nātou ke nātou popoto ʼi tona gāueʼi pea mo te taupau ʼo te faʼahiga meʼa gāue ʼaia. Ko te Sosiete ʼe ina tā ʼi te temi nei te ʼu nusipepa ʼi te ʼu lea e 115 tupu, ʼi te ʼu fenua e 33, pea ko te ʼu fenua e 5 ʼi te ʼu fenua ʼaia ʼe nātou toe tā mo te ʼu tohi pea mo te ʼu Tohi-Tapu.
Moʼo fai ʼo te gāue ʼaia ʼe fakamaʼuaʼi kiai he kau gāue—he hahaʼi faitohi, he hahaʼi ke nātou fakaliliu te ʼu tohi ʼi te ʼu lea, he hahaʼi sivi tohi, he hahaʼi gāue ʼi te ʼu masini, he hahaʼi ʼe nātou fakapipiki te ʼu tohi, pea mo he hahaʼi fetuku tohi. Ko ʼihi ʼe hinoʼi ke nātou faka felogoi mo te ʼu kokelekasio. Ko ʼihi ʼe nātou to magisi, ko ʼihi ʼe nātou teuteuʼi te ʼu meʼa kai, ko ʼihi ʼe nātou kau ki te fakamaʼa, ki te fale fō, pea mo ʼihi age ʼu gāue. Ko te ʼu meʼa fuli ʼaenī ʼe fai e te hahaʼi ʼe nātou gāue ʼi tonatou lotolelei ʼi te ʼu fenua kehekehe. ʼI te malamanei katoa ʼi te taʼu 1994, neʼe ko te toko 15 145 hahaʼi ʼe nātou gāue ʼi tonatou lotolelei ʼi te ʼu pilō kehekehe, ʼi te ʼu fale tā tohi, ʼi te ʼu nofoʼaga, pea mo te ʼu fermes.
Ko ai koa te ʼu hahaʼi ʼaia? Ko te ʼu tagata pea mo te ʼu fafine, selipatea pea mo ʼohoana, tūpulaga pea mo matutuʼa, ko nātou fuli kua nātou foaki tonatou maʼuli ko te kau Fakamoʼoni ʼa Sehova. Ko ʼihi kua katoa nei ʼonatou taʼu e 40, peʼe 50, peʼe 60 mo tanatou fai te gāue ʼaia. ʼE nātou gāueʼi te ʼu hola e 44 ʼi te vāhaʼa ʼi te gāue ʼaē neʼe hinoʼi age ke nātou fai, peʼe toe laka atu mokā ʼe ʼaoga. ʼI te ʼu afiafi pea mo te ʼu fakaʼosi vāhaʼa ʼe fakatuʼutuʼu ke nātou kau ai ki te faka mafola ʼo te logo lelei ʼi te ʼu ʼapi, pea mo niʼihi ʼu gāue ʼa te kokelekasio.
ʼI te malamanei katoa ko te kau gāue ʼaia ʼe ʼi ai tonatou ʼu koga fale pea ʼe nātou kakai ʼi te ʼu nofoʼaga ʼo te Sosiete, ʼaē ʼe higoaʼi ko te ʼu Petele. Tahi ʼaē meʼa ʼe foaki kia nātou he kiʼi foʼi falā moʼo huʼi ʼo te falā ʼaē neʼe nātou fakaʼaogaʼi ki tanatou feʼoloʼaki ʼi tonatou minisitelio pea mo te ʼu meʼa ʼaē ʼe ʼaoga kia nātou takitokotahi.
Talu mai te taʼu 1920, ko te hahaʼi ʼaia ʼe nātou gāue ʼi tonatou lotolelei neʼe nātou fai te ʼu Tohi-Tapu e hiva miliale tupu, te ʼu tohi, te ʼu nusipepa, pea mo te ʼu kaupepa ʼi te ʼu lea e 200 tupu ʼo tufa ʼi te malamanei katoa. ʼE nātou fai tanatou gāue ke feala ai te faka mafola ʼo te logo lelei ki te ʼu puleʼaga pea mo te ʼu telepi pea mo te ʼu lea pea mo te ʼu hahaʼi fuli pe.—Fakahā 14:6, 7.
• Koteā te faʼahiga masini tā tohi ʼe fakaʼaogaʼi e te Sosiete Watch Tower, pea koteā tona tupuʼaga?
• Ko ai ʼaē ʼe ina fai te gāue fuli ʼaia, pea e feafeaʼi tonatou maʼuli?
[Paki ʼo te pasina 24]
Ko te hahaʼi ʼe nātou gāue ʼi tonatou lotolelei ʼi te fale tā tohi, ʼi te ʼu fale nofoʼaga, ʼi te pilō, pea mo te ferme ʼi Brooklyn pea mo Wallkill, ʼi Amelika
[Paki ʼo te pasina 25]
Ko te hahaʼi ʼe gāue ʼi tonatou lotolelei ʼe nātou fai te tahi ʼu gāue ʼe pipiki tahi peʼe kailoa ki te tā ʼo te ʼu Tohi-Tapu pea mo te ʼu tohi faka Tohi-Tapu
Sepania
Siamani
Finilani
Kanata
Tanemake
Suete
Potu Toga ʼo Afelika
Pelesile
Holani
Ositalalia