ʼE Fakatagaʼi Nātou ʼUhi Ko Tanatou ʼOʼofa Ki Te Faitotonu

E lagi neʼe koutou logo ki he ʼu kaumeʼa pea mo he ʼu kāiga neʼe nātou ʼui atu ʼe felāveʼi te kau Fakamoʼoni ʼa Sehova mo te ʼu faigataʼaʼia ʼo ʼuhiga mo te lao, ʼe tapuʼi tanatou gāue e ʼihi ʼu puleʼaga, peʼe ko nātou ko he hahaʼi kovi. Koteā koa te tupuʼaga ʼo te palalau kovi ʼaē kia nātou?

Neʼe mole hoko te faʼahi ʼaia ʼuhi he neʼe mole fakaʼapaʼapa te kau Fakamoʼoni ki te lao, kae ʼuhi pe ko tanatou mulimuli ʼaē ki te ʼu ala ʼo Sesu. Neʼe ʼui age e Sesu ki tana ʼu tisipulo ʼe gaohi koviʼi anai ia nātou, mo fakatagaʼi, pea ʼe fakamatala loi anai e te hahaʼi te ʼu meʼa kovi kehekehe ʼo ʼuhiga mo nātou. Ko te tupuʼaga ʼo te faʼahi ʼaia, ko Satana te fakafeagai tāfito ʼaē ʼo te ʼAtua, ko ia te ʼatua ʼo te mālama ʼaenī, pea ʼe faiga ia ke ina fakamaliu te hahaʼi ke ʼaua naʼa nātou kaugana ki te ʼAtua.—Mateo 5:10-12; 10:16-22, 34-39; 24:9, 10; Soane 15:17–16:3; 2 Timoteo 3:12; 1 Petelo 5:8; Fakahā 12:17.

ʼI te temi ʼaē neʼe puke ai te kau ʼapositolo ʼo ʼave ki te telepinale, neʼe mole puke ia nātou ko he hahaʼi fai fakapō, agamālohi, peʼe agatuʼu. Neʼe hoko te faʼahi ʼaia ʼuhi pe ko tanatou faka mafola ia te logo lelei. ʼI te fakaʼui ʼaē e Paulo ke fakamāuʼi ia ia e te ʼu pule māʼoluga, neʼe ina lagolago pea mo faiga ke fakagafua ki te kau Kilisitiano ke nātou faka mafola ia te logo lelei.—Gāue 4:18-20; 5:28-32; Filipe 1:7.

Ia ʼaho nei, ko te kau Fakamoʼoni ʼa Sehova ʼe ko he kau Kilisitiano ʼe nātou fakalogo ki te ʼu lao, ʼo nātou totogi tanatou ʼu tukuhau pea ʼe nātou fakaʼapaʼapa ki te ʼu puleʼaga. ʼE nātou liufaki kia Sesale te ʼu meʼa ʼa Sesale pea ki te ʼAtua te ʼu meʼa ʼa te ʼAtua. Kapau ʼe ʼi ai he fakafeagai mo he puleʼaga, ʼe hoko ʼuhi pe heʼe mole fakagafua e te puleʼaga ʼaia te gāue fai faka mafola, peʼe ʼuhi ko tanatou mole kau ki te ʼu meʼa faka politike ʼo te ʼu puleʼaga. Pea ʼi te faʼahi leva ʼaia ko te kau Fakamoʼoni ʼa Sehova ʼe tonu ke tatau tanatou aga mo te kau ʼapositolo, ʼaē neʼe nātou ʼui fēnei: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gāue 5:29; Maleko 12:17; Soane 18:36; Tito 3:1, 2.

Ko te kau Fakamoʼoni ʼa Sehova ʼe mole nātou kumi te fakataga, kae ʼe nātou fia maʼuli ʼi te tokalelei pea mo fīmālie. Kae, kapau leva ʼe fakatagaʼi ia nātou ʼuhi ko tanatou muliʼi te lao ʼa te ʼAtua pea mo te faʼifaʼitakiʼi ʼo Sesu Kilisito, pea ʼe nātou kātakiʼi anai ʼaki te loto fiafia.—Mateo 5:10-12; Gāue 5:40, 41; 1 Kolonito 4:12; 1 Timoteo 2:2; 1 Petelo 3:14, 15; 4:12-16.

• He koʼe ʼe gaohi koviʼi pea mo fakatagaʼi te kau kaugana ʼa Sehova?

• He koʼe ʼe tautau hoko te ʼu fihifihia ʼi te kau Fakamoʼoni ʼa Sehova mo te ʼu puleʼaga, ohage ko te meʼa ʼaē neʼe hoko ki te kau ʼapositolo ʼa Kilisito?

• E feafeaʼi te aga ʼa te kau Fakamoʼoni ʼa Sehova ʼo ʼuhiga mo te fakataga?

[Talanoa ʼo te pasina 29]

Neʼe ʼave ia Sesu kia muʼa ʼo Pilato pea ko te ʼapositolo ko Paulo neʼe pilisoniʼi, koteʼuhi neʼe ina faka mafola te Puleʼaga ʼo te ʼAtua