Kapite 10

Te ʼu Fagona Ki Selusalemi

KUA hoko mai te fasiga taʼu mātala. Pea kua hoko mai leva ki te famili ʼo Sosefo, ki tona ʼu kāiga pea mo tona ʼu kaumeʼa te temi ʼaē ke nātou fagona ai, ki Selusalemi ohage pe ko te taʼu fuli ki te fakamanatu ʼo te Pāsikate. Ohage ko te māhani, koʼeni te fagona ʼe mavae atu ke ʼalu ia kilometa e teau ki Selusalemi. Kua taʼu 12 leva ia Sesu, pea ʼe atali ia ki te ʼaho ʼaia ʼaki te lototokaga e makehe age.

Kia Sesu pea mo tona famili, ko te Pāsikate ʼe mole ko he ʼaho pe ia e tahi. Koia, neʼe nātou nonofo ai ʼi Selusalemi lolotoga te lafeti ʼo te ʼu Keke mole hona fakatupu ʼaē e ʼaho fitu tona fualoa ʼo kamata ʼi te ʼosi pe ʼo te Pāsikate pea ʼe fakakau ki te temi pāsikate. Koia ko te haʼu ʼaē mai Nasaleti pea mo te toe liliu, ʼo feiā pe mo te temi ʼaē ʼe nātou nonofo ai ʼi Selusalemi, ko tona fualoa ko vāhaʼa e lua. Kae ko te taʼu ʼaia, ʼe toe fualoa age, ʼuhi ko te meʼa neʼe hoko ʼo ʼuhiga mo Sesu.

Koʼeni te meʼa ʼaē neʼe hoko ʼi te liliu mai ʼaē mai Selusalemi. ʼI te manatu ʼa Sosefo pea mo Malia ʼe muli mai ia Sesu mo te ʼu kāiga pea mo te ʼu kaumeʼa ʼaē ʼe fagona mo nātou. Kae, ʼi tanatou tutuʼu ʼo mālōlō heʼe kua tō te pōʼuli neʼe mole nā sisio kia Sesu, pea nā ʼolo ai ʼo fehufehuʼi ki te kau fagona. Ka neʼe mole nā maʼu ia ia. Koia neʼe toe liliu ai Sosefo pea mo Malia ki Selusalemi ʼo kumi ia ia.

Neʼe ʼaho katoa tanā kumi noa mole nā maʼu. ʼO toe feiā aipe mo te lua ʼaho. Pea, ʼi tona tolu ʼaho leva neʼe nā ʼolo ai ki te fale lotu pea neʼe ko te hoki koga meʼa ʼaia neʼe nā maʼu ai Sesu ʼe nofo ʼi muʼa ʼo te ʼu tagata faiako ʼo te kau Sutea, ʼe nofo ia ʼo fakalogo pea mo fai fehufehuʼi kia nātou.

Neʼe ʼui age e Malia, “Tamasiʼi, he koʼe neʼe ke fai feiā kia māua? Sio age ko tau tāmai pea mo ʼau kua ma lotohoha ʼi tou kumi”.

Neʼe punamaʼuli ia Sesu ʼi te mole ʼiloʼi ʼaē e tana ʼu mātuʼa te koga meʼa ʼaē ʼe nofo ai. “Koteā ʼaē ʼe koulua kumi ai ʼau? ko tana fehuʼi age ʼaia. ʼE mole koulua ʼiloʼi koa la ʼe tonu ke ʼau nofo ʼi te fale ʼo taku Tāmai?”

Neʼe mole mahino kia Sesu pe koʼe neʼe mole ʼiloʼi e tana ʼu mātuʼa te meʼa ʼaia. Pea tuʼu ake ai ʼo ʼalu mo tana ʼu mātuʼa ki tonatou ʼapi ʼo hoko atu aipe tana fakalogo kia nāua. Pea neʼe tuputupu ia ʼo lahi tona poto pea mo tona sino, pea neʼe toe tuputupu ia ʼi te ʼofa ʼi muʼa ʼo te ʼAtua pea mo te tagata. ʼIo, ʼo kamata mai te temi neʼe kei veliveli ai, neʼe tuku mai e Sesu he faʼifaʼitaki lelei, ʼaki tana tokaga ki te ʼu meʼa fakalaumālie, pea mo tana fakahā tana fakaʼapaʼapa ki tana ʼu mātuʼa. Luka 2:40-52; 22:7.

▪ Ko te fagona fea koa ʼaē ʼe fai e Sesu ʼi te fasiga taʼu mātala ʼo te taʼu fuli mo tona famili, pea e ʼaho fia te fualoa ʼo te fagona ʼaia?

▪ Koteā te meʼa ʼaē neʼe hoko ʼi te fagona ʼaē neʼe nātou fai ʼi te taʼu 12 ʼo Sesu?

▪ Koteā te faʼifaʼitaki ʼe tuku mai e Sesu ki te ʼu tamaliki ʼo te temi nei?