Kapite 23

Ko ʼIhi Milakulo ʼi Kapenaume

NEʼE kua fakaafe e Sesu tana ʼu ʼuluaki tisipulo e fā — ia Petelo, Atelea, Sake pea mo Soane — pea ʼi te sapato ʼaē neʼe hoko mai kiai neʼe nātou ʼolo ki te sinakoka ʼi Kapenaume. Neʼe fai akonaki ai ia Sesu; pea neʼe punamaʼuli te hahaʼi he neʼe akonaki ia ohage ko he tahi ʼe ia te ia te pule, ka mole hage ia ko te kau sekelipa.

ʼI te ʼaho ʼaia, neʼe ʼi ai te tagata neʼe ulusino ai te temonio neʼe nofo ʼi te sinakoka; pea fualoa siʼisiʼipe pea kalaga leʼolahi ia ʼo fēnei: “Koteā te meʼa ke mātou fai mo koe, Sesu, te Nasalea? Neʼe ke haʼu koa ko te fakaʼauha ʼo mātou? ʼE ʼau ʼiloʼi lelei pe ko ai ia koe: ko te Maʼoniʼoni ʼa te ʼAtua.”

Ko te temonio ʼaē neʼe ʼi te tagata ʼe ko te ʼaselo ia ʼa Satana. Neʼe pupulaʼi e Sesu ia ia ʼo ʼui maʼana: “Fakalogologo pea ke haʼu ki tuʼa mai ia te ia!”

Neʼe faka kukuta e te temonio te tagata pea neʼe kekē ia ʼaki tona mālohi katoa. Kae neʼe hū ia ki tuʼa ia ia ʼo mole ina fai he meʼa ʼe kovi ki ai. Ko nātou ʼaē neʼe mamata ki te meʼa ʼaia, neʼe lahi ʼaupito tonatou punamaʼuli. “Koteā koa te meʼa ʼaenī?” ko te fehufehuʼi ʼaki ʼaia ʼa nātou. “Heʼe māʼia mo te ʼu laumālie heʼemaʼa ʼe ina fakatotonu kia nātou ʼaki te mālohi, pea ʼe nātou fakalogo kia te ia.” Ko te logo ʼaia neʼe mafola atu ʼi te fenua katoa ʼe tafa mai.

ʼI te mavae ʼa Sesu pea mo tana kau tisipulo ʼi te sinakoka, neʼe nātou ʼolo ki te ʼapi ʼo Simone, ʼaē ʼe toe higoa ko Petelo. Ko te faʼe ʼo te ʼohoana ʼo Petelo ʼe mahaki kovi; ʼe lahi ʼaupito tona fiva. Neʼe kole age e te kau tisipulo kia Sesu: ‘Fakalelei tou loto, ka ke tokoni kia te ia.’ Pea fakaōvi age ai ia Sesu ki ai, ʼo toʼo tona nima pea ina fakatuʼu ki ʼoluga. ʼI te temi pe ʼaia, neʼe lelei ai tona mahaki, pea ina gaohi ai tanatou meʼa kai.

Ki muli age ʼi te tō ʼo te laʼā, neʼe kamata ʼōmai ai te hahaʼi ʼo te ʼu koga meʼa kehekehe ki te ʼapi ʼo Petelo mo tanatou ʼu hahaʼi mahaki. Kua teitei fonu mai pe te hahaʼi ʼo te kolo katoa ki te muʼa matapā ʼo Petelo. Neʼe fakamālōlō e Sesu te hahaʼi mahaki fuli, tatau aipe pe koteā honatou faʼahiga mahaki. Neʼe ina kapu foki mo te ʼu temonio ʼi te ʼu hahaʼi neʼe ulusino ai. ʼI te haʼu ki tuʼa ʼa te kau temonio ʼaē neʼe ina kapu, neʼe nātou kalaga fēnei: “Ko koe ko te ʼAlo ʼo te ʼAtua.” Kae neʼe pupulaʼi ia nātou e Sesu pea neʼe mole ina fakagafua age ke nātou palalau, heʼe nātou ʼiloʼi ko ia ko Kilisito. Maleko 1:21-34; Luka 4:31-41; Mateo 8:14-17.

▪ Koteā te meʼa ʼaē neʼe hoko ʼi te sinakoka ʼi te sapato ʼaē neʼe hoko atu ki te ʼaho ʼaē neʼe fakaafe ai e Sesu tana ʼu tisipulo e fā ke muli ia te ia?

▪ Neʼe ʼalu ia Sesu kifea ʼi tana mavae mai te sinakoka, pea neʼe ko te milakulo fea ʼaē neʼe ina fai ai?

▪ Koteā te meʼa neʼe hoko ki muli age ʼi te afiafi pe ʼaia?