Neʼe Fakahoko e Sesu He ʼu Gaue Lalahi ʼi Kapenaume

Neʼe fakaafe e Sesu ia tisipulo ʼe toko fa, ko Petelo, mo Atelea, mo Sakopo pea mo Soane ke natou liliu ko he ʼu tautai tagata. Pea ʼi te Sapato, neʼe natou olo fuli ki te sinakoka ʼi Kapenaume. Neʼe faiakonaki ai ia Sesu. Neʼe toe punamaʼuli mo te hahaʼi ʼi tana faʼahiga faiakonaki koteʼuhi neʼe ina akoʼi natou ohage ko he tahi ʼe ina maʼu te pule, kaʼe mole ohage ko te kau sekelipa.

ʼI te Sapato ʼaia neʼe ʼi ai te tagata neʼe ulu sino ai te temonio. Pea ʼi te sinakoka neʼe kalaga fenei ai te tagata: “Sesu mai Nasaleti, kotea ʼae ʼe ke fai ʼi heni? Neʼe ke haʼu koa ʼo fakaʼauha matou? ʼE au iloʼi lelei pe, ʼe ko koe te Maʼoniʼoni ʼa Te ʼAtua!” Kaʼe neʼe pupulaʼi e Sesu ia te temonio ʼae neʼe ina puleʼi te tagata, ʼo ina ui fenei age: “Fakalogologo, pea ke mavae ia ia.”—Maleko 1:24, 25.

Neʼe tete mo kalaga ai te tagata ʼuhi ko te laumalie kovi. Kaʼe neʼe mavae ia te temonio mai te tagata ʼaia “ ʼo mole ina fai age he meʼa ʼe kovi.” (Luka 4:35) Neʼe punamaʼuli ai ia te hahaʼi ʼae neʼe ʼi ʼona tafaʼaki ʼi te sinakoka. Pea neʼe natou feuiʼaki fenei: “Kotea te meʼa ʼaeni? . . . ʼE ina toe maʼu te malohi moʼo puleʼi te ʼu laumalie kovi, pea ʼe natou fakalogo kia te ia.” (Maleko 1:27) ʼE mahino ia, neʼe mafola ʼi Kalilea katoa ia te logo ʼo ʼuhiga mo te meʼa fakaofoofo ʼae neʼe hoko.

ʼI tana mavae ʼi te sinakoka, neʼe alu leva ia Sesu mo ʼana tisipulo ki te ʼapi ʼo Simone ʼae neʼe toe higoa ko Petelo. Pea ko te faʼe ʼo te ʼohoana ʼo Petelo neʼe mahaki pea neʼe kovi ʼosi tona fiva. Neʼe natou kole mamahi ai kia Sesu ke tokoni kia ia. Neʼe fakaovi ia Sesu kia ia, pea ina puke tona nima pea mo fakatuʼu ake ki ʼoluga. Neʼe malolo atu aipe pea neʼe ina kamata tauhi ai leva kia Sesu mo ʼana tisipulo, ʼo lagi ina teuteuʼi hanatou meʼa kai.

ʼI te to ʼo te laʼa, neʼe ʼomai te hahaʼi ʼo ʼaumai te kau mahahaki ki te ʼapi ʼo Petelo. Neʼe hage neʼe fakatahitahi mai te kolo katoa ki te muʼa matapa. Kotea tona tupuʼaga? Ke fakamalolo natou. ʼI tona fakahagatonu, “ko natou fuli ʼae neʼe natou maʼu ni hahaʼi mahahaki ʼi he faʼahiga mahaki pe, neʼe natou ʼaumai kia te ia. Pea neʼe ina hili ʼona nima kia natou takitahi, ʼo ina fakamalolo natou.” (Luka 4:40) Neʼe fakamalolo natou e Sesu tatau aipe pe kotea ʼonatou mahaki ohage pe ko tona fakakikite. (Esaia 53:4, MN) Pea neʼe ina kapu te ʼu temonio ʼae neʼe ulu sino ʼi te hahaʼi. Pea ʼi te mavae ʼa te ʼu laumalie kovi neʼe natou kalaga fenei: “Ko koe te ʼAlo ʼo te ʼAtua.” (Luka 4:41) Kaʼe neʼe pupulaʼi natou e Sesu pea neʼe mole ina fakagafua age ke natou fakamatala te aluʼaga ʼae neʼe hoko. Neʼe natou iloʼi ko Sesu ʼe ko Kilisito, pea neʼe mole ina loto ke hage ki te hahaʼi ʼe tauhi te kau temonio ki te ʼAtua.