Te ʼu Fehuʼi ʼa Te Kau Lautohi

ʼE ʼui mai ia Mateo 17:20, ko te kau ʼapositolo neʼe mole nātou lava fakamālōlō te tama ‘ ʼuhi ko tonatou tui vaivai.’ Kae ia Maleko 9:​29, ko tanatou mole lava fakamālōlō ʼe pipiki ki te mole mālohi ʼo tanatou faikole. He koʼe koa ʼe kehekehe te ʼu fakamahino ʼaē ʼe fakahā mai e te ʼu Evaselio?

ʼI tona fakahagatonu, ʼe mole fefakafeagaiʼaki te ʼu fakamatala ʼaia e lua, kae ʼe nā fefakakatoaʼaki. ʼUluaki, koutou vakaʼi ia Mateo 17:14-20. ʼE talanoa ai ki te tagata ʼaē neʼe mahaki moa tona foha, pea neʼe mole feala ki te kau tisipulo ʼa Sesu ke nātou fakamālōlō te tūpulaga ʼaia. Ki muli age neʼe fakamālōlō e Sesu te tama ʼaia ʼo ina kapu te temonio ʼaē neʼe ina fakamamahiʼi ia ia. Neʼe fehuʼi age e te kau tisipulo pe koʼe neʼe mole nātou lava fai te faʼahi ʼaia. ʼO mulimuli ki te fakamatala ʼa Mateo, neʼe tali fēnei e Sesu: “ ʼE tupu ko takotou tui vaivai. Heʼe ʼau tala moʼoni atu kia koutou, Kapau ʼe koutou maʼu he tui ʼe fualahi ohage ko he tegaʼi sinapi, pea ʼe koutou ʼui age anai ki te moʼuga ʼaenī: ‘Hiki ia koe ʼi henī ki he atu,’ pea ʼe hiki anai ia, pea ʼe mole toe faigataʼa anai he meʼa kia koutou.”

ʼI te temi nei koutou vakaʼi ia Maleko 9:​14-29, pea ʼe koutou maʼu ai anai he tahi ʼu faʼahi ʼo ʼuhiga mo te hisitolia ʼaia. Ohage la, ia Maleko 9:​17 ʼe fakahā mai ʼi te ʼaluʼaga ʼaia ʼe ko te laumālie kovi ʼaē neʼe ina fakatupu te kovi ʼo te mahaki moa. ʼE lelei ke tou fakatokagaʼi ʼe fakahā mai e te tahi ʼu vaega ʼo te Tohi-Tapu, ko Sesu neʼe ina fakamālōlō te hahaʼi mahaki moa pea mo te hahaʼi ʼaē neʼe ulusino ai te ʼu temonio. (Mateo 4:​24) ʼI te ʼaluʼaga makehe ʼaia, neʼe ko te “laumālie noa pea mo tuli,” te laumālie kovi, ʼaē neʼe ina fakatupu te kovi ʼo te mahaki moa ʼo te tama, ohage ko tona fakamoʼoni kiai e te tōketā ko Luka. (Luka 9:​39; Kolose 4:14) Koutou fakatokagaʼi te ʼu palalau ʼaenī ia Maleko 9:​18, “ ʼi he potu pe ʼe ina [te temonio] puke ai.” Koia neʼe mole ʼohofiʼi tuʼumaʼu ia ia e te temonio, kae neʼe hoko pe ʼi ʼihi temi. Logola te faʼahi ʼaia, ko te kau tisipulo neʼe mole nātou lava kapu te temonio pea mo fakamālōlō te tūpulaga ʼaia. ʼI tanatou fehuʼi ʼaē pe koteā tona tupuʼaga, neʼe tali fēnei e Sesu: “Ko te faʼahiga ʼaia, ʼe hoki feala pe ke haʼu ki tuʼa ʼaki te faikole.”

Kae kapau ʼe tou vakaʼi fakalelei te fakamatala ʼa Maleko, ʼe hā ʼaki ai ʼe mole fakafeagai ki te tohi ʼa Mateo. Ia Maleko 9:​19, ʼe tou lau ai neʼe meo ia Sesu ʼuhi ko te heʼe tui ʼo te taʼiake ʼaia. Pea ʼi te vaega 23, ʼe fakahā ai neʼe ina ʼui fēnei ki te tāmai ʼa te tūpulaga: “ ʼE ko meʼa fuli ʼe lavaʼi e ia ʼaē ʼe tui.” Koia ko Maleko ʼe ina toe faka maʼuhigaʼi foki te tui. Pea ʼi te vaega 29 ʼe hilifaki kiai e Maleko te meʼa neʼe ʼui e Sesu ʼo ʼuhiga mo te faikole, kae ko Mateo pea mo Luka neʼe mole nā tohi te faʼahi ʼaia.

Koia koteā ʼaē ʼe feala ke tou ʼui? ʼI te tahi ʼu lakaga, ko te kau ʼapositolo e toko 12 pea mo te kau tisipulo e toko 70, neʼe nātou kapu te ʼu laumālie kovi. (Maleko 3:​15; 6:​13; Luka 10:17) Kae ʼi te lakaga ʼaia ko te kau tisipulo neʼe mole nātou lava kapu te temonio. Koteā tona tupuʼaga? Kapau ʼe tou tānaki te ʼu fakamatala kehekehe ʼaia, pea ʼe mahino kia tatou neʼe mole nātou teuteu ke nātou fai te fakamālōlō ʼaia ʼi te lakaga pe ʼaia. Neʼe lagi tupu ʼuhi ko te faʼahiga temonio ʼaē neʼe ulusino ʼi te tūpulaga, heʼe kehekehe te ʼu temonio, ʼe kehekehe tonatou ʼulugaaga, mo te ʼu meʼa ʼaē ʼe nātou holi kiai, pea mo tonatou ʼu fealagia. Moʼo kapu te temonio ʼaia, neʼe ʼaoga ke nātou tui mālohi pea ke nātou kole fakamalotoloto ke tokoni age te ʼAtua kia nātou. ʼE mahino ia, neʼe feiā te tui ʼa Sesu. Tahi ʼaē meʼa, neʼe lagolago kia ia tana Tāmai, ia Ia ʼaē ʼe fakalogo ki te faikole. (Pesalemo 65:2) Ko Sesu neʼe mole gata ʼaki pe tana fealagia ʼaē ke ina fakamālōlō te tūpulaga ʼo kapu te temonio, kae neʼe ina fai te meʼa ʼaia.