Kapite 61

Te Fakamālōlō ʼo Te Tūpulaga Neʼe Ulusino Ai Te Temonio

ʼI TE lolotoga puli ʼo Sesu, ʼaē e lagi nofo ia ʼi he tumutumu ʼo te moʼuga ko Helemone mo Petelo, Sake pea mo Soane, ko te tahi ʼu tisipulo ʼe nātou tau mo te faigataʼaʼia. ʼI tana liliu mai, neʼe sio atu aipe ia Sesu ʼe ʼi ai te meʼa ʼe haʼele kovi. Neʼe ʼā takatakai tana ʼu tisipulo e te hahaʼi, pea ʼe nātou fetalanoaʼaki mo te kau sekelipa. ʼI tanatou sisio kia Sesu, neʼe punamaʼuli te hahaʼi pea nātou feleleʼi ʼo faka felāveʼi mo ia. “Koteā te meʼa ʼaē ʼe koutou palalau ki ai mo nātou?” ko te fehuʼi age ʼaia ʼa Sesu.

ʼI tana mavae mai ʼi te hahaʼi, neʼe ʼi ai te tagata neʼe tuʼutuli ʼi ʼona muʼa pea ina fakamahino age: “Faiako, neʼe ʼau ʼaumai kia te koe toku foha, heʼe ia te ia te laumālie ʼalelo mate; pea ʼi he potu pe ʼe ina puke ai, ʼe ina peʼehi ia ki te kele, pea ʼe fiho te gutu ʼo te tamasiʼi, pea makiki ʼona nifo pea puli mo tona mālohi. Pea neʼe ʼau ʼui age ki tau ʼu tisipulo ke nātou kapu te laumālie, kae neʼe mole nātou lavaʼi.”

ʼE ʼiloga mai ia neʼe fakaʼaogaʼi e te kau sekelipa te mole lavaʼi ʼaē e te kau tisipulo ke nātou fakamālōlō te tūpulaga ʼaia; koia e lagi ʼe nātou manukinukiʼi tanatou faiga. Pea kaku mai ia Sesu ʼi te temi totonu ʼaia. “ ʼAē taʼiake heʼe tui, ʼe kaku koa ki ʼafea te maʼua ʼaē ke ʼau nofo mo koutou? ʼE kaku koa ki ʼafea te maʼua ʼaē ke ʼau kātakiʼi ia koutou?”

ʼE ʼiloga mai ia ʼe fai age e Sesu te ʼu fakatokaga ʼaia kia nātou fuli ʼaē neʼe tuʼulaki ai, kae mahino papau ia ʼe ina fai tāfito ʼo faka ʼuhiga ki te kau sekelipa, ʼaē neʼe fakatupu kovi ki tana ʼu tisipulo. ʼOsi ʼaia pea ina ʼui age mo hinoʼi te tama: “ ʼAumai ia ia kia te ʼau ki henī.” Kae, ʼi te fakaōvi age ʼa te tama kia Sesu, neʼe peʼehi ia e te temonio ʼaē neʼe ulusino ai ki te kele pea ina gaohi ke femakamiomioʼaki ʼo kukuta mālohi. Neʼe makafulifuli te tama ʼi te kele, mo te fiho ʼi tona ʼu laugutu.

“Kua fualoa feafeaʼi te hoko ki ai ʼo te meʼa ʼaenī?” ko te fehuʼi age ʼaia ʼa Sesu.

“Talu mai tona kei veliveli, ko te tali age ʼaia ʼa tana tāmai; pea neʼe tautau lī [e te temonio] ia ia ki te afi, pe ki te vai ke mate ai ia.” Pea, neʼe ina kole mamahi age: “Kae kapau ʼe ke lavaʼi he fai ʼo he meʼa, pea ke ʼofa mai kia māua pea ke hāofaki ia māua.”

E lagi kua lauʼi taʼu te kumi e te tagata ʼaia he tokoni. Kae ʼi te temi nei, ʼi te mole lavaʼi e te kau tisipulo, ʼe mole kei ina ʼiloʼi ia he meʼa ke haga ki ai. Kae ʼi te tokagaʼi ʼaē e Sesu tana kole, neʼe ina fakaloto mālohiʼi ʼo ʼui maʼana: “Ko te palalau ʼaē: ‘Kapau ʼe ke lavaʼi!’ ʼE ko meʼa fuli ʼe lavaʼi ʼe ia ʼaē ʼe tui.”

“ ʼE ʼau tui!” ko te kalaga ʼaia ʼa te tāmai, kae ʼe ina kole mamahi age: “Haʼu ʼo hāofaki ʼau ʼi te faʼahi ʼaē ʼe ʼaoga ai ke ʼau tui!”

Neʼe fakatokagaʼi e Sesu te feleleʼi mai ʼa te hahaʼi kia nātou; koia neʼe ina pupulaʼi fēnei ai te temonio: “Laumālie tuli mo ʼalelo mate, ʼe ʼau fakatotonu atu kia te koe, mavae mai ia te ia pea ʼaua naʼa ke toe hū ki ai.” ʼI te mavae mai ʼa te temonio ʼi te tūpulaga, neʼe ina toe gaohi ke kalaga pea mo kukuta tuʼa lahi. ʼOsi ʼaia pea ina tuku ai ʼi te kele, ʼo lau ai e ʼihi: “Kua mate ia!” Kae neʼe fā ia Sesu ki te nima ʼo te tama, pea tuʼu ake aipe ia ia ki ʼoluga.

ʼI he ʼu kiʼi temi ki muʼa atu, ʼi te fekauʼi ʼo te ʼu tisipulo ke nātou ʼolo ʼo fai faka mafola, neʼe kua nātou kapu te ʼu temonio. Koia, ʼi tanatou ʼosi fakatahitahi ʼi te ʼapi, neʼe nātou fehuʼi age ai kia Sesu: “He koʼe neʼe mole mātou lavaʼi tona kapu?”

ʼI tana tali, neʼe fakahā age e Sesu neʼe mole nātou lavaʼi ʼuhi he neʼe siʼisiʼi tanatou tui: “Ko te faʼahiga ʼaia ʼe hoki feala pe ke haʼu ki tuʼa ʼaki te faikole.” Neʼe tonu ia ke ʼi ai he faʼahiga teuteu ke lavaʼi ai te kapu ʼo te temonio mālohi ʼaupito ʼaia. ʼE tonu ke mālohi te tui pea mo kole mamahi ki te ʼAtua ke ina foaki mai te mālohi.

ʼOsi ʼaia, neʼe toe ʼui age e Sesu: “Heʼe ʼau tala moʼoni atu kia koutou: Kapau ʼe koutou maʼu he tui ʼe fualahi ohage he tegaʼi sinapi, pea ʼe koutou ʼui age anai ki te moʼuga nei: ‘Hiki ia koe ʼi henī ki he atu’, pea ʼe hiki anai ia, pea ʼe mole toe faigataʼa he meʼa kia koutou.” ʼE mālohi ʼaupito ia te tui!

Ko te ʼu faigataʼaʼia pea mo ʼihi ʼatu faʼahiga meʼa ʼaē ʼe fakatupu kovi ki te gāue ʼaē kia Sehova ʼe feala foki ke faigataʼa kia tatou ohage ia ko he toe moʼuga lahi fakamataku. Kae, ʼe fakahā mai e Sesu kapau ʼe tou fakahomo te tui ʼi totatou loto, kapau ʼe tou tokakaga ʼo taupau ke tuputupu, pea ʼe lahi ake anai ia ʼo kaku ki tona matuʼa pea ʼe ina faka fealagia anai ia tatou ke tou lavaʼi te ʼu faigataʼaʼia pea mo te ʼu fihiʼaga ʼaē ʼe hage ko he ʼu moʼuga. Maleko 9:14-29; Mateo 17:19, 20; Luka 9:37-43.

▪ ʼI tana liliu mai te moʼuga ko Helemone, koteā te meʼa ʼaē neʼe maʼu mai e Sesu?

▪ Koteā te fakaloto mālohi neʼe fai e Sesu ki te tāmai ʼa te tūpulaga ʼaē neʼe ulusino ai te temonio?

▪ He koʼe neʼe mole lava ʼo kapu e te kau tisipulo te temonio?

▪ Ohage ko te meʼa ʼaē neʼe fakahā mai e Sesu, ʼe aʼu kiteā te mālohi ʼo te tui?