Neʼe Fakamalolo E Sesu Ia He Tama Neʼe Ulu Sino Ai He Temonio

ʼI te temi ʼae neʼe hihifo ai ia Sesu, mo Petelo, mo Sakopo pea mo Soane mai te moʼuga, neʼe natou felaveʼi mo te hahaʼi kaugā malie. Neʼe natou tokagaʼi ai neʼe lolotoga hoko he meʼa. Neʼe ʼa takai e te kau sekelipa ia te ʼu tisipulo, pea natou fihi mo natou. Neʼe fiafia te hahaʼi ʼi tanatou sisio kia Sesu, pea neʼe natou feleleʼi mai ʼo fakamalo age kia te ia. Neʼe ina fehuʼi fenei age kia natou: “Kotea ʼae ʼe kotou fefihiʼaki ai mo natou?”—Maleko 9:16.

Neʼe haʼu te tagata mai te hahaʼi kaugā malie ʼo tuʼutuli ia muʼa ʼo Sesu pea ina fakamahino fenei age: “ ʼAliki, neʼe au ʼaumai toku foha ʼe ulu sino ai he laumalie kovi ʼo tupu ai tona ʼalelo mate. ʼI te potu fuli pe ʼae ʼe ina ʼohofi ai ia ia, ʼe ina peʼehi ki te kele. ʼE hali te savai mai te gutu ʼo te tamasiʼi, mo gugu nifo pea mo gaʼegaʼe ʼaupito ai. Neʼe au kole ki ʼau tisipulo ke natou kapu, kaʼe neʼe mole natou lavaʼi.”—Maleko 9:17, 18.

Neʼe lagi valoki e te kau sekelipa ia te ʼu tisipulo ʼi tanatou mole lava fakamalolo ia te tama, ʼo lagi natou manukinukiʼi ʼanatou faiga. Koia neʼe mole palalau age Sesu ki te tamai ʼae neʼe lotomamahi, kaʼe neʼe haga ia ki te hahaʼi ʼo ina ui fenei: “Taʼiake heʼe tui mo aga fakapikopiko, ʼe kaku ki ʼafea taku nofo mo koutou mo taku katakiʼi koutou?” ʼE mahino ia neʼe fakaʼuhiga te ʼu palalau fefeka ʼaia ki te kau sekelipa ʼae neʼe ʼomai ʼo fakatupu kovi ki ʼana tisipulo ʼi tana puli. Pea neʼe haga age leva ia Sesu ki te tamai lotohoha, ʼo ina ui fenei age: “ ʼAumai tou foha ki heni.”—Luka 9:41.

ʼI te fakaovi age ʼa te tama kia Sesu, ko te temonio ʼae neʼe ulu sino ia ia neʼe ina peʼehi ifo ia ia ki te kele pea neʼe tete ai. Neʼe femakafulifuliʼaki ai pea neʼe hali te savai mai tona gutu. Neʼe fehuʼi fenei age e Sesu ki te tamai: “Kua fualoa koa te hoko ʼo te faʼahi ʼaeni ki ai?” Pea neʼe ina tali fenei age: “Talu mai tana kei veliveli, pea neʼe tautau li ia ia e te laumalie kovi ki te afi peʼe ki te vai ke mate ai.” Neʼe kole mamahi fenei age e te tagata: “Kapau ʼe feala ke ke fai he meʼa, pea ke ʼofa ʼo tokoni mai kia maua.”—Maleko 9:21, 22.

Neʼe lotohoha te tamai, koteʼuhi maʼia mo te ʼu tisipulo ʼa Sesu neʼe mole feala ke natou tokoni age ki ai. Moʼo tali age ki te tagata lotohoha ʼaia, neʼe fai e Sesu te fakapapau fakalotomalohi ʼaeni: “He koʼe ʼe ke ui: ‘Kapau ʼe feala’? Ko meʼa fuli ʼe feala kia ia ʼae ʼe tui.” ʼI te temi pe ʼaia, neʼe kalaga fenei ai te tamai: “ ʼE au tui! Tokoni mai ki te faʼahi ʼae ʼe vaivai ai taku tui!”—Maleko 9:23, 24.

Neʼe tokagaʼi e Sesu te feleleʼi age ʼa te hahaʼi kia te ia. Neʼe ina pupulaʼi te temonio, kaʼe sisio ia natou fuli ʼaia, ʼi tana ui fenei: “Laumalie ʼalelo mate mo tuli, ʼe au fakatotonu atu, mavae mai ia ia pea ʼaua naʼa ke toe ulu sino ai!” ʼI te mavae ʼa te temonio, neʼe kalaga te tama pea mo tete. Pea neʼe mole kei gaūgaūe leva. ʼI te sisio ʼa te hahaʼi tokolahi ki te faʼahi ʼaia, neʼe natou ui fenei: “Kua mate ia!” (Maleko 9:25, 26) Kaʼe ʼi te temi ʼae neʼe puke ai e Sesu te nima ʼo te tama, neʼe tuʼu ake ai pea “neʼe malolo atu aipe.” (Mateo 17:18) ʼE mahino papau ia, neʼe manavahe te hahaʼi ʼi te meʼa ʼaia neʼe fai e Sesu.

ʼI muʼa atu, ʼi te fekauʼi e Sesu te ʼu tisipulo ke natou olo ʼo faifakamafola, neʼe feala ke natou kapu te ʼu temonio. Koia, ʼi tanatou fakatahi mo ia ʼi he ʼapi, neʼe natou fehuʼi fenei age: “He koʼe neʼe mole matou lava kapu ia te laumalie kovi?” Neʼe fakamahino age e Sesu neʼe tupu ʼuhi ko tanatou mole tui, ʼo ina ui fenei: “Ko te faʼahiga laumalie ʼaia ʼe hoki mavae pe ia ʼaki te faikole.” (Maleko 9:28, 29) Neʼe tonu ke natou maʼu he tui ʼe malohi pea mo natou kole ki te ʼAtua tana tokoni ke feala hanatou kapu te temonio malohi ʼaia.

Neʼe ui fenei e Sesu: “ ʼE au tala moʼoni atu kia koutou, kapau ʼe hage takotou tui ko he kiʼi tegaʼi sinapi, ʼe kotou ui anai ki te moʼuga ʼaeni: ‘Hiki mai hena ki he,’ pea ʼe hiki anai, pea ʼe mole faigataʼa anai he meʼa kia koutou.” (Mateo 17:20) ʼEi, ʼe malohi ʼaupito te tui.

Ko te ʼu faigataʼaʼia ʼae ʼe natou taʼofi tatatou lakalaka ki muʼa ʼi te tauhi kia Sehova, ʼe feala ke fakatatau ki he moʼuga. ʼE hage ʼe mole feala hatatou tauʼi pea ʼe mole he puleʼaki ki ai. Kaʼe, kapau ʼe tou tui, pea ʼe feala ke tou tauʼi te ʼu faigataʼaʼia ʼaia ʼae ʼe hage tona maʼoluga ko he moʼuga.