Te ʼu Fehuʼi ʼa Te Kau Lautohi

Kapau ʼe logo he Kilisitiano ki he ʼu leʼo, ko tona faka ʼuhiga koa ʼe hoko kia ia he ʼu meʼa faka temonio?

Kailoa ia. Logope neʼe fakamatala neʼe feiā te gāue ʼa te ʼu temonio ʼi ʼihi lakaga, kae tokolahi ʼi te hahaʼi ʼe nātou logo ki te ʼu leʼo peʼe nātou logoʼi he ʼu faʼahiga meʼa feiā, neʼe fai te ʼu kumi pea nātou mahino ai ʼe ʼi ai tonatou mahaki.

Māʼia mo te ʼuluaki sēkulō, neʼe ʼiloʼi ʼe teitei tatau te agaaga ʼo he tahi neʼe gaohi e te kau temonio pea mo he tahi ʼe mahaki moa. Ia Mateo 17:14-18, ʼe tou lau ai neʼe fakamālōlō e Sesu ia te tūpulaga. Logope neʼe ʼiloga neʼe mahaki moa te tūpulaga ʼaia, kae ʼi tona fakahagatonu neʼe mahaki ʼuhi ko te temonio. Kae ʼi te tahi lakaga ʼi muʼa atu, ʼi te hahaʼi mahahaki ʼaē neʼe ʼaumai kia Sesu, neʼe kau ai te hahaʼi “neʼe ulusino ai te ʼu temonio, pea mo te ʼu hahaʼi ʼe mahaki moa.” (Mateo 4:24, MN) ʼE ʼiloga ia, neʼe kua mahino te hahaʼi ko ʼihi mahaki moa ʼe mole ko te gāue ʼa te temonio, kae neʼe ko tonatou mahaki fakasino.

ʼE lau ko ʼihi ʼe nātou maʼu te mahaki ʼaē ko te schizophrénie (ko he mahaki ʼulu), ko he mahaki ʼe feala pe hona lelei ʼaki te ʼu faitoʼo, pea ʼe nātou logo ki te ʼu leʼo peʼe faikehe tanatou aga.a ʼE ʼi ai mo te tahi ʼu ʼaluʼaga fakasino ʼe feala ke nātou fakatupu maveuveu te ʼatamai, ʼo feala ai ki ʼihi hahaʼi ke nātou manatu hala ʼe ko he gāue ʼa te kau temonio. Koia, logope ko he tahi ʼe ina fakamatala anai ʼe logo ki he ʼu leʼo peʼe hoko ki ai he ʼu faʼahiga meʼa ʼe lagi mole ko he gāue ʼa he temonio, kae ʼe tonu ke fakaloto mālohiʼi ia ia ke ina kumi fakalelei ke mahino ki te meʼa ʼaē ʼe hoko ki tona sino.

[Kiʼi nota]